| e-texts navigator |
| Wylie |
105b1 ཆོས་བཞི་དང་ལྡན་ན་མངོན་པར་ཤེས་པ་རྣམས་ཀྱིས་མངོན་པར་འཕགས་པ་རྣམས་ཡིན་ཏེ། བཞི་གང་ཞེ་ན། ཡང་དང་ཡང་དུ་ཚངས་པའི་གནས་པ་བཞིའི་གནས་པ་དང་། རྟག་པར་རྒྱུན་དུ་རབ་ཏུ་དབེན་པར་གནས་པ་དང་། ཆོས་ཟབ་མོ་ལ་བཟོད་པ་དང་། ལུས་དང་སེམས་མཉམ་པ་ཉིད
105b2 དུ་ཤེས་པ་སྟེ། ཆོས་བཞི་པོ་དེ་དག་དང་ངོ་། །དེ་ལ་འདི་སྐད་ཅེས་བྱ་སྟེ། ཚངས་པའི་གནས་པ་དག་ལ་རྟག་ཏུ་རབ་གནས་ཤིང་། །དབེན་པར་གནས་པ་ལ་ཡང་དགའ་བ་སྐྱེད་བྱེད་ལ། །ཤེས་པས་ཟབ་མོའི་བཟོད་ལས་ངེས་པ་ཐོབ་གྱུར་ཅིང་། །མཁའ་དང
105b3 མཉམ་པའི་སེམས་དང་ལྡན་པར་གྱུར་པ་སྟེ། །དེ་ལྟར་མངོན་པར་བརྩོན་པའི་འཇིག་པ་མེད་པ་རྣམས། །མངོན་ཤེས་ལྔ་པོ་དག་གིས་མངོན་པར་འཕགས་གྱུར་ཅིང་། །དེ་དག་སངས་རྒྱས་རྣམས་ཀྱི་སྤྱན་སྔར་འདུག་འདྲ་ལ། །སེམས་ཅན་མང་པོ་རྣམས་ཀྱང་ཡོངས་སུ་སྨིན་བྱེད
105b4 འགྱུར། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བདུད་ཐམས་ཅད་ཀྱིས་ཐུབ་པ་དཀའ་བ་རྣམས་ཡིན་ཏེ། བཞི་གང་ཞེ་ན། སྟོང་པ་ཉིད་ཀྱི་རྣམ་པས་མངོན་པར་བསྒྲུབ་པའི་བསམ་གཏན་བཞི་དང་། སེམས་ཅན་ཐམས་ཅད་མི་གཏོང
105b5 བའི་སྙིང་རྗེ་ཆེན་པོ་དང་། དཀོན་མཆོག་གསུམ་གྱི་གདུང་རྒྱུན་མི་གཅོད་པའི་བརྩོན་འགྲུས་དང་། ཐབས་ལ་མཁས་པ་མངོན་པར་བསྒྲུབ་པའི་ཕ་རོལ་ཏུ་ཕྱིན་པ་དྲུག་སྟེ། ཆོས་བཞི་པོ་དེ་དག་དང་ངོ་། །དེ་ལ་འདི་སྐད་ཅེས་བྱ་སྟེ། མཚན་མེད་སྟོང་པས་ངེས་པའི
105b6 བསམ་གཏན་བཞི་བསྒོམ་ཞིང་། །སེམས་ཅན་ཡོངས་སུ་སྐྱབས་ཕྱིར་རྟག་ཏུ་སྙིང་རྗེ་ལྡན། །དཀོན་མཆོག་གསུམ་རྒྱུན་མི་གཅོད་བརྩོན་འགྲུས་ཐོབ་གྱུར་ཅིང་། །ཀུན་ཏུ་ཐབས་ལྡན་ཕ་རོལ་ཕྱིན་པ་དྲུག་ལ་འཇུག་།དེ་ལྟར་སྤྱོད་མཁས་བློ་ལྡན་ཆེ་བདག་ཡིད་གཞུངས
105b7 པ། །དེ་དག་བདུད་བཞི་དག་ལས་ཡང་དག་འདས་གྱུར་ཅིང་། །བདུད་ཀྱི་ལྕགས་ཀྱུས་ཟིན་པའི་འགྲོ་བ་མགོན་མེད་རྣམས། །མྱ་ངན་འདའ་བར་འགྲོ་བའི་ལམ་ལ་འགོད་པར་བྱེད། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བློས
iiif viewer powered by OpenSeadragon
