| e-texts navigator |
| Wylie |
124a1 བསལ་ཏོ། །སྐྱེ་བ་དང་ཞི་བར་ཅིག་ཅར་བསལ་ན། ང་སྐྱེ་བའི་ཕྱི་མོ་མི་སྐྱེ་སྟེ་སེམས་རྟག་པར་སྟོང་ཞིང་མི་གཡོའོ། །སྟོང་ཞིང་མི་གཡོ་ལ་ཆགས་པ་མེད་ན་སེམས་ལ་ཆགས་པ་མེད་དེ་གདོད་སྐྱེ་བ་མེད་པ་ཡིན་ནོ། །གྲོལ་ཐར་བྱང་ཆུབ་སེམས་དཔས་ཡང་སངས་རྒྱས་ལ
124a2 གསོལ་པ། བཙུན་པ་སེམས་ལ་ཆགས་པ་མེད་ན་བསླབ་ཅིང་སྦྱང་བ་ཅི་མཆིས། འོན་ཀྱང་བསླབ་པ་ཅི་མཆིས་སམ། སངས་རྒྱས་ཀྱིས་བཀའ་སྩལ་པ། བྱང་ཆུབ་སེམས་དཔའ་སྐྱེ་བ་མེད་པའི་སེམས་ལས་བྱུང་བ་དང་། འཇུག་པའི་སེམས་མེད་དེ་ཕྱི་མོ་ཡང་དག་པར་གཤེགས་པའི
124a3 མཛོད་དེ། ངོ་བོ་ཉིད་སྟོང་ཞིང་མི་གཡོ་བས་བསླབ་པ་ཡོད་པ་ཡང་མ་ཡིན་བསླབ་པ་མེད་པ་ཡང་མ་ཡིན་ནོ། །བསླབ་པ་ཡོད་པ་དང་། བསླབ་པ་མེད་པ་དང་། མེད་པའང་མེད་ན་དེ་ནི་བསླབ་པ་ཡང་མེད་པའོ། །བསླབ་པ་མེད་པ་ཡང་མ་ཡིན་པ་དེ་ནི་མིང་བསླབ་པའོ། །གྲོལ་ཐར་བྱང་ཆུབ
124a4 སེམས་དཔས་སངས་རྒྱས་ལ་གསོལ་པ། བཙུན་པ་ཇི་ལྟ་བུར་ན་ཡང་དག་པར་གཤེགས་པའི་མཛོད་ཀྱི་ངོ་བོ་ཉིད་སྟོང་ཞིང་མི་གཡོ་བ་ཞེས་བགྱི། སངས་རྒྱས་ཀྱིས་གསུངས་པ། ཡང་དག་པར་གཤེགས་པའི་མཛོད་ནི་ལྡང་དུབ་ཀྱི་སེམས་ཀྱི་མཛོད་དེ། ངོ་བོ་ཉིད་སྟོང་པ་སྟེ་མི་གཡོ་བའོ། །མཚན་མ་ཤེས
124a5 པར་བྱ་ན་གཞུང་འཁྱིམས་ཏེ་མི་མངོན་ནོ། །ཡང་དག་པར་གཤེགས་པའི་མཛོད་ནི་ངོ་བོ་ཉིད་སྟོང་པ་སྟེ་མི་གཡོའོ། །གྲོལ་ཐར་བྱང་ཆུབ་སེམས་དཔས་སངས་རྒྱས་ལ་གསོལ་པ། བཙུན་པ་ཅི་ལྟ་བུར་ན་ལྡང་དུབ་ཀྱི་སེམས་ཀྱིས་མཚན་མ་ཤེས་པར་རུང་། སངས་རྒྱས་ཀྱིས་བཀའ་སྩལ་པ། བྱང་ཆུབ་སེམས
124a6 དཔའ་གཞུང་ལ་ནི་རུང་བ་དང་མི་རུང་བ་ཡང་མེད་དོ། །རུང་བ་དང་མི་རུང་བ་ཡང་ཡོད་དུ་ཟིན་ནི་སེམས་སོ་ཅོག་སྐྱེས་ནས་སྟོང་ཞིང་ཁྲིའི་བསམ་པ་གཡོས་ཏེ་དེ་ནི་ལྡང་དུབ་ཀྱི་གཟུགས་ཡིན་ནོ། །བྱང་ཆུབ་སེམས་དཔས་ཕྱི་མོའི་ངོ་བོ་ཉིད་ཀྱི་མཚན་མ་ལ་བརྟགས་ན་གཞུང་རང་གང་རྒྱས་སོ། །སྟོང་བསམས
124a7 ཁྲི་མནོས་ཀྱང་ལམ་གྱི་གཞུང་ལ་མི་ཕན་ཏེ། གཡོས་ཤིང་དཀྲུགས་པས་སེམས་ཀྱི་ཕྱི་མོ་བདག་པོ་སྟོར་བར་གྱུར་ཏོ། །བསམ་ཞིང་མནོ་བ་མེད་ན་ལྡང་དུབ་ཀྱང་མི་སྐྱེ་སྟེ་ཡང་དག་པ་བཞིན་དུ་མི་གཡོའོ། །རྣམ་པར་ཤེས་པ་རྣམས་བདེ་ཞིང་སྟོང་ན་འབབ་ཅིང་འཁོར་བར་མི་སྐྱེ་སྟེ་གཙང་མའི་ཆོས་ལྔ
iiif viewer powered by OpenSeadragon
