| e-texts navigator |
| Wylie |
208b1 བྱང་ཆུབ་སེམས་དཔའ་ལ། །གནོད་པར་མི་བྱེད་རབ་བསྡམས་དང་། །གང་ཞིག་ཆོས་དང་ལྡན་པ་ཡི། །ཆོས་སྨྲ་དེ་དག་སྲུང་བྱེད་པ། །ངན་འགྲོ་རྣམས་ནི་ཀུན་སྤངས་ནས། །བརྒྱ་བྱིན་རྫུ་འཕྲུལ་ཆེན་པོར་འགྱུར། །ཚངས་པ་འཐབ་བྲལ་དགའ་ལྡན་དང་། །དབང་བྱེད་པར་ཡང་དེ་འགྱུར་རོ། །
208b2 གལ་ཏེ་མིར་ནི་གྱུར་ན་ཡང་། །རྟག་ཏུ་འཁོར་ལོས་སྒྱུར་བར་འགྱུར། །ཚོང་དཔོན་དང་ནི་ཁྱིམ་བདག་འགྱུར། །རྟག་ཏུ་སྐྱིད་ཅིང་ནོར་ཆེར་འགྱུར། །ཇི་ལྟར་གང་གཱའི་བྱེ་སྙེད་ཀྱི། །བསྐལ་པ་དེ་སྙེད་རྟག་ཏུ་ཡང་། །འཇིགས་མེད་དྲན་པ་ཕུན་སུམ་ཚོགས། །བདེ་དང་ལྡན་ཞིང་གནོད་པ
208b3 མེད། །ཚེ་རབས་ཚེ་རབས་ཕྱི་ཕྱིར་ཞིང་། །རྟག་ཏུ་སངས་རྒྱས་མཆོད་པར་འགྱུར། །བློ་ལྡན་གང་ཞིག་སངས་རྒྱས་ལ། །བསྐལ་པ་དེ་སྙེད་མཆོད་པ་བས། །ཕྱི་དུས་ཆོས་ནི་འཇིག་པ་ན། །གང་དག་མདོ་སྡེ་འདི་འཛིན་པ། །ཆོས་གང་འཇིག་རྟེན་མགོན་པོ་ཡིས། །བསྟན་པའི་མདོ་སྡེ
208b4 འདི་ལ་དེས། །ཉིན་ཞག་གཅིག་ཏུ་བཟུང་བ་ཡི། །དེ་ནི་བསོད་ནམས་ཁྱད་པར་འཕགས། །ཕྱོགས་བཅུའི་སངས་རྒྱས་གང་བཞུགས་པ། །དེ་དག་ཀུན་ལ་མཆོད་པར་འགྱུར། །མདོ་སྡེ་འདི་འདྲ་འཛིན་པ་ནི། །གང་དག་མ་འོངས་སངས་རྒྱས་དང་། །འདས་པའི་སངས་རྒྱས་གང་དག
208b5 དང་། །དེ་དག་དེ་ཡིས་མཆོད་པར་འགྱུར། །འཇམ་དཔལ་བྱང་ཆུབ་སེམས་དཔའ་གང་ལ་ལ་ཞིག་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ལ་མོས་པའི་བྱང་ཆུབ་སེམས་དཔའ་ལ་གནོད་སེམས་དང་། ཐ་བ་དང་ཁྲོ་བ་སྐྱེད་དམ། འདུམ་པར་མི་བྱེད་དམ། བརྙས
208b6 ཐབས་གང་ཡང་རུང་བས་བརྙས་ཏེ། ངན་པའི་རིགས་སུ་སྐྱེས་པ་ཞེའམ། རྙེད་པ་ཆུང་བ་ཞེའམ། ཡིད་གཞུངས་པ་ཆུང་བ་ཞེའམ། ཤེས་རབ་ཆུང་བ་ཞེས་བརྙས་སམ་ཅི་ཡང་རུང་སྟེ། ཚུལ་ཁྲིམས་ཀྱི་ཡན་ལག་ཉམས་པ་ཞེའམ། མདོག་ངན་པ་ཞེའམ། གཟུགས་དང་མི
208b7 ལྡན་པ་ཞེའམ། གཟི་བརྗིད་ཆུང་བ་ཞེས་བརྙས་སམ། ཐ་ན་ཡུད་ཙམ་ཞིག་ཁྲོས་ཏེ་ལྟ་ན་ཡང་དེ་མི་དགེ་བའི་ལས་དེས་བསྐལ་པ་བྱེ་བ་གྲངས་མེད་པ་ཚང་བར་ངན་སོང་རྣམས་སུ་སྲེག་པར་འགྱུར་རོ། །འཇམ་དཔལ་ངས་ནི་ཇི་ལྟར་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས
iiif viewer powered by OpenSeadragon
