| e-texts navigator |
| Wylie |
26b1 རྣམས་བཅུ་པོ་དེ་དག་དང་། །སྟོབས་དང་མངོན་མཁྱེན་ཏིང་ངེ་འཛིན། །ཡིད་ཀྱི་རྒྱུ་ལས་བྱུང་བའི་སྐུས། །སངས་རྒྱས་དེ་ན་རྣམ་པར་མཛེས། །ས་རྣམས་བཅུ་པོ་ཀུན་བསྒོམས་ཏེ། །རྣམ་ཐར་བདེན་པ་སྟོང་པ་ཉིད། །མཚན་མེད་སྨོན་པ་མེད་པ་དང་། །ཕ་རོལ་ཕྱིན་དྲུག་དེ
26b2 བཞིན་ཏེ། །བསྒོམ་དང་སྦྱིན་དང་ཚུལ་ཁྲིམས་དང་། །ཤེས་རབ་རྣམས་ཀྱིས་དེ་སྐུ་འཐོབ། །ཡན་ལག་གཟུགས་ཀུན་མེ་ཏོག་གི། །འདུས་མ་བྱས་པ་སངས་རྒྱས་སྐུའོ། །རྟོག་མེད་རྟོག་དང་བྲལ་བ་སྟེ། །བདག་མེད་ཡིད་དང་དབང་པོ་རྣམས། །ཤེས་རབ་དབང་པོའི་སྒོར་ལྡན
26b3 ཞིང་། །མཚན་གྱིས་ཀུན་ནས་ཤིན་ཏུ་བསགས། །སྦྱིན་དང་ཚུལ་ཁྲིམས་ལ་སོགས་ཀྱིས། །དཀར་པོའི་ལས་རྣམས་བྱས་པས་ན། །སངས་རྒྱས་སྐུ་ཡི་གནས་ཀྱི་མཆོག་།སྟུག་པོའི་རིས་སུ་འཐོབ་པར་འགྱུར། །དེ་བཞིན་གཤེགས་པའི་ལྷ་རྫས་གནས། །ཉི་ཟླ་རྣམ
26b4 པར་སྤངས་པ་སྟེ། །རྒྱུ་སྐར་སྐར་ཕྲན་སྣང་བ་དང་། །ཟླ་བ་དུས་དང་ལྟད་མོ་མེད། །རྣལ་འབྱོར་ཅན་གྱི་འོད་འཆར་དང་། །སངས་རྒྱས་རྣམས་ཀྱི་འོད་ཀྱིས་ཀྱང་། །ཀུན་ནས་བཟང་པོའི་སྟུག་པོ་དེ། །ཉི་མ་བཞིན་དུ་ཀུན་ནས་སྣང་། །དུས་ཀྱི་འབྲི་བ་དེ་ན་མེད། །ནད་རྣམས་གང
26b5 ཡང་ཡོད་པ་མིན། །འཆི་རྒ་མེད་པའི་གནས་ཡིན་ཏེ། །སྟུག་པོ་དེ་ནི་ཞིང་གི་མཆོག་།ཐམས་ཅད་གཟུགས་ལྡན་ཞི་བའི་གནས། །དྲི་མེད་མཐོང་བའི་ཚོགས་ཅན་གྱི། །སངས་རྒྱས་ཞིང་སྟུག་བསོད་ནམས་ཏེ། །ལྷ་རྣམས་ཀུན་གྱིས་སྨོན་པར་བྱ། །རྣལ་འབྱོར་ཅན་རྣམས་ཁྱད་པར་དུ། །
26b6 ས་དང་ས་ལ་གནས་པ་དག་།སེམས་ཙམ་རང་བཞིན་དངོས་པོ་རྣམས། །གང་ཕྱིར་རབ་ཏུ་བསྟན་པས་ན། །ཡིད་དང་སེམས་དང་ཀུན་གཞིའི་ཚུལ། །རང་བཞིན་གསུམ་པོ་དེ་བཞིན་ཏེ། །ཆོས་ལ་བདག་མེད་རང་བཞིན་ཅན། །གནས་ནི་གཞན་དུ་འགྱུར་བ་སྟེ། །ལུས་ནི་ཤིན་ཏུ
26b7 གནས་གྱུར་པས། །ཐུབ་པ་རྣམས་ནི་དེར་འདོང་སྟེ། །རྣལ་འབྱོར་ཅན་གྱི་གནས་ཀྱི་མཆོག་།སྟུག་པོ་ཞིང་རབ་དམ་པར་རོ། །སྟུག་པོར་འཇུག་པ་ཞེས་བྱ་བ་སྟེ་ལེའུ་གསུམ་མོ།། །།ལུས་ནི་རྫས་དགུའི་རང་བཞིན་ཅན། །འདུས་བྱས་རྡུལ་ཕྲན
iiif viewer powered by OpenSeadragon
