| e-texts navigator |
| Wylie |
21a1 ས་རྣམས་ལ་ནི་གང་སྣང་བ། །འོན་ཏམ་ཚངས་པས་ཕྱུང་བའམ། །འགྲོ་བ་མཐུ་བོ་ཆེ་ཡིས་སམ། །ཁྱུ་མཆོག་གིས་སམ་སྤུན་ཟས་སམ། །སེར་སྐྱ་ཡིས་སམ་རང་གིས་སམ། །གཅེས་པའི་རྐྱེན་གྱིས་བྱས་སམ་པ། །རང་བཞིན་གྱིས་སམ་དབང
21a2 པོས་སམ། །དུས་དང་ཕྱོགས་ཀྱིས་བསྐྱེད་པའམ། །འོན་ཏམ་མ་རིག་སྲེད་པས་སམ། །ལྷ་ཡི་དྲང་སྲོང་ཐེ་ཙོམ་ཟ། །ལྷ་ཡི་ཚོགས་ཀྱང་དེ་བཞིན་ཏེ། །གྲུབ་དང་དྲི་ཟའི་རྒྱལ་པོ་རྣམས། །ས་ལ་གནས་པའི་རྣལ་འབྱོར་ཅན། །འོན་ཏམ་འདི་དག་མིག་འཕྲུལ་ལམ། །
21a3 འགྲོ་བ་དྲི་ཟ་འདྲ་ཞིག་གམ། །རྨི་ལམ་ཡིན་ནམ་སྨིག་རྒྱུ་འམ། །སྔོན་མེད་རྣམ་པར་རྟོག་ཡིན་ནམ། །གཟུང་དང་འཛིན་པའི་དངོས་པོར་ཡང་། །ཁ་གཉིས་སྦྲུལ་བཞིན་གནས་པའམ། །འོན་ཏམ་རང་བཞིན་འདི་མེད་དམ། །འཁྲུལ་འཁོར་རོ་ལངས་བཞིན་གནས་སམ། །
21a4 མགལ་པ་བསྐོར་བ་འདྲ་བའམ། །འོན་ཏམ་སྐྲ་ཡི་ཚོགས་ལྟ་བུའམ། །བྱེད་དང་ལས་ཀྱིས་མ་བྱས་ཤིང་། །དབང་པོ་ཀུ་བེ་རས་མ་བྱས། །མཆོད་སྦྱིན་སྦྱིན་བསྲེག་མཆོད་འབྲས་སམ། །སྨྲང་གི་གཞུང་གི་ལམ་གྱིས་སམ། །རྒྱུ་རྣམས་ཤིན་ཏུ་ཕལ་ཆེ་བས། །ནན
21a5 ཏན་རྟག་པ་མ་ཡིན་ཏེ། །འགྲོ་བ་འཛིན་པ་མེད་པའང་མིན། །རྒྱུ་རྣམས་ཀྱི་ཡང་རྒྱུ་དག་སྟེ། །འགྲོ་བ་ངོ་བོ་ཉིད་ཀྱིས་གྲུབ། །ལས་ཀྱི་བག་ཆགས་རྣམས་ལས་བྱུང་། །རྣམ་ཤེས་བརྒྱད་པོའི་སྐྱེས་བུ་ནི། །ཀུན་གཞི་ཞེས་ཀྱང་བྱ་བ་སྟེ། །དེས་ནི་སྣ་ཚོགས་འདི་དག་ཀུན། །
21a6 རྫ་མའི་འཁྲུལ་འཁོར་བཞིན་དུ་བསྐོར། །ཏིལ་བཀྲུམ་ཏིལ་མར་ཇི་བཞིན་དུ། །ལན་ཚྭའི་ཚ་བྲོ་ཇི་ལྟ་བུར། །གཟུགས་ལ་མི་རྟག་ཉིད་ཇི་བཞིན། །སྐྱེས་བུ་འདི་ཡང་དེ་བཞིན་གནས། །ཇི་ལྟར་བསུང་ལ་སོགས་ལས་དྲི། །ཡོན་ཏན་རྣམས་ལ་ཡོན་ཏན་མཚན། །ཉི་ཟླ་གཉིས
21a7 ཀྱི་འོད་ཟེར་བཞིན། །དེ་ལྟར་སྐྱེས་བུ་གནས་པ་ཡིན། །དགོས་དང་བྱེད་པ་མེད་པ་སྟེ། །ཡོད་དང་མེད་ཀྱི་ཕྱོགས་ཀྱིས་སྤངས། །གཅིག་དང་ཐ་དད་མེད་པ་སྟེ། །མུར་འདུག་ཕྱོགས་ཀྱིས་རྣམ་པར་སྤངས། །རྗེས་སུ་འགྲོ་བའི་ཤེས་པ་མེད། །ནམ་ཡང་རྣམ་པར་མི་བརྟག་སྟེ། །
iiif viewer powered by OpenSeadragon
