| e-texts navigator |
| Wylie |
282b1 ཉེས་པ་རྣམས་དང་བྲལ་བར་བཤད། །མངོན་རྟོགས་ཡེ་ཤེས་ཐོབ་བྱ་དང་། །ལྷག་མེད་མྱ་ངན་འདའ་བ་དང་། །ཞུམ་པ་རྣམས་ཀྱང་སྤྲོ་བྱའི་ཕྱིར། །དེ་ཕྱིར་དགོངས་ཏེ་བཤད་པ་ཡིན། །སངས་རྒྱས་བསྐྱེད་པའི་ཡེ་ཤེས་དག་།དེ་ཉིད་རྣམ་འབྱེད་ལམ་དུ་བཤད། །ཐེག་པ་རྣམས་ནི་ཐེག་མ་ཡིན། །
282b2 དེ་ནི་མྱ་ངན་འདའ་བ་མིན། །འདོད་གཟུགས་སྲིད་དང་ལྟ་བ་རྣམས། །གནས་བཞིའི་སར་ནི་བཤད་པ་ཡིན། །ཡིད་ཀྱི་རྣམ་པར་ཤེས་ལས་འབྱུང་། །རྣམ་ཤེས་ཁྱིམ་དུ་ཡིད་ནི་གནས། །ཡིད་དང་མིག་སོགས་རྣམ་པར་ཤེས། །འགག་པ་ལ་ནི་མི་རྟག་བཤད། །ཡང་ན་མྱ་ངན་འདས་པར་ལྟ། །
282b3 རྟག་པར་གནས་པ་ཉིད་དུ་འདོད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པས་ཞུ་བ་ཞུས་པ། བྱང་ཆུབ་སེམས་དཔའ་ལ་སོགས་པ། །བླ་མེད་བྱང་ཆུབ་ཚོལ་བ་དག་།ཤ་དང་ཆང་དང་སྒོག་བཙོང་རྣམས། །འཚལ་ཞིང་བཏུང་བར་བགྱི་མི་བགྱི། །བླ་ན་མ་མཆིས་གཙོ་མཆོག
282b4 གིས། །ཐུགས་རྗེས་བདག་ལ་བཤད་དུ་གསོལ། །བྱིས་པ་དེ་ལ་བརྐམ་པར་བགྱིད། །དྲི་ང་གྲགས་པ་མ་མཆིས་འགྱུར། །ཤི་ན་གཅན་གཟན་རྣམས་ཀྱི་ཟས། །ཇི་ལྟར་དེ་ནི་འཚལ་བར་རུང་། །འཚལ་ནས་ནོངས་དམིགས་ཅི་མཆིས་དང་། །མ་འཚལ་ཡོན་ཏན་གང་ལགས་པ། །འཚལ་དང་མ
282b5 འཚལ་དགེ་སྡིག་རྣམས། །ཐུགས་རྗེས་བདག་ལ་བཤད་དུ་གསོལ། །བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པ་རྣམས་ཀྱིས་ཞུ་བ་ཞུས་ནས། ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་སོགས་པའི་སླད་དུ་ཤ་འཚལ་བ་དང་མི
282b6 འཚལ་བའི་ནོངས་པ་དང་ཡོན་ཏན་རྣམས་བཤད་དུ་གསོལ། བདག་དང་བྱང་ཆུབ་སེམས་དཔའ་གཞན་རྣམས་ཀྱིས་ད་ལྟར་དང་མ་འོངས་པ་ན་ཤའི་ཟས་ལ་ཆགས་ཤིང་རེ་བའི་སེམས་ཅན་སྣ་ཚོགས་ལ་རྣམ་པར་ཕྱེ་སྟེ་ཆོས་བཤད་པས་སེམས་ཅན་དེ་དག་བྱམས་པའི་སེམས་ཀྱིས་ཕན་ཚུན་གཅིག་ལ
282b7 གཅིག་ལྟ་བ་དང་། བྱམས་པའི་སེམས་ཐོབ་ནས་ཀྱང་སོ་སོའི་ས་ལ་གནས་ཤིང་རྣམ་པར་དག་པ་གསལ་བར་རྟོག་སྟེ་མྱུར་དུ་མཐར་ཐུག་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་དང་། ཉན་ཐོས་དང་། རང་སངས་རྒྱས་དག་རང་གི་ས་ལ་བསྟི་ཞིང་། བསྟིས་ནས་ཀྱང་བླ་ན
iiif viewer powered by OpenSeadragon
