| e-texts navigator |
| Wylie |
275b1 པོ་བྱིས་པ་སོ་སོའི་སྐྱེ་བོ་རྣམས་ཀུན་རྫོབ་ཀྱི་བརྡའི་མིང་དང་རྒྱུ་མཚན་ལ་མངོན་པར་ཞེན་པས་སེམས་ཀྱི་རྗེས་སུ་འབྲང་ངོ་། །རྗེས་སུ་འབྲངས་ནས་མཚན་མའི་ཁ་དོག་སྣ་ཚོགས་འདོད་པས་བདག་དང་བདག་གིར་ལྟ་བར་ལྷུང་བའི་བསམ་པ་ཅན་རྣམས་གཟུགས་བཟང་པོ་ལ་མངོན་པར་ཞེན་པར་བྱེད་དེ། མངོན
275b2 པར་ཞེན་ནས་མི་ཤེས་པས་བསྒྲིབས་པའི་ཕྱིར་མངོན་པར་ཆགས་པ་སྐྱེད་དོ། །མངོན་པར་ཆགས་པར་གྱུར་ནས་ནི་འདོད་ཆགས་དང་། ཞེ་སྡང་དང་། གཏི་མུག་ལས་བྱུང་བའི་ལས་བསགས་སོ། །མངོན་པར་བསགས་ནས་ནི་རྣམ་པར་རྟོག་པས་རང་ལ་འཆིང་བར་བྱེད་དེ། ཇི་ལྟར་དར་གྱི་སྲིན་བུ་སྐོན་པ་བྱེད
275b3 པ་བཞིན་དུ་འཁོར་བའི་རྒྱ་མཚོར་འགྲོ་བ་རྣམས་ཀྱི་སྐོན་པར་ལྷུང་བ་ནི་ཟོ་ཆུན་གྱི་འཁྲུལ་འཁོར་བཞིན་ཏེ། འདི་ལྟར་གཏི་མུག་པའི་ཕྱིར་སྒྱུ་མ་དང་། སྨིག་རྒྱུ་དང་། ཆུའི་ཟླ་བ་དང་མཚུངས་པར་རང་བཞིན་གྱིས་བདག་དང་བདག་གི་དང་བྲལ་བར་མ་ཤེས་ནས་ཡང་དག་པ་མ་ཡིན་པའི་རྣམ་པར་རྟོག་པ
275b4 ཐམས་ཅད་སྐྱེད་པར་བྱེད་དོ། །མཚན་ཉིད་དང་། མཚན་ཉིད་ཀྱི་གཞི་དང་། སྐྱེ་བ་དང་། འཇིག་པ་དང་བྲལ་བ་རང་གི་སེམས་ཀྱི་རྣམ་པར་རྟོག་པ་ལས་སྐྱེས་པ། དབང་ཕྱུག་དང་། དུས་དང་། རྡུལ་ཕྲ་མོ་དང་། གཙོ་བོ་ལས་བྱུང་བ་མ་ཡིན་པར་མ་ཤེས་ནས་བྱིས་པ་སོ་སོའི་སྐྱེ་བོ་རྣམས་མིང་དང་།
275b5 རྒྱུ་མཚན་གྱི་རྗེས་སུ་འབྲང་ངོ་། །དེ་ལ་བློ་གྲོས་ཆེན་པོ་རྒྱུ་མཚན་དེ་ཡང་མིག་གི་རྣམ་པར་ཤེས་པས་སྣང་བར་བྱ་བ་ནི་གཟུགས་ཞེས་བྱའོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པས་སྣང་བར་བྱ་བ་ནི་སྒྲ་དང་། དྲི་དང་། རོ་དང་། རེག་བྱ་དང་། ཆོས
275b6 ཞེས་བྱ་སྟེ། འདི་ནི་རྒྱུ་མཚན་ཞེས་བྱའོ། །བློ་གྲོས་ཆེན་པོ་རྣམ་པར་རྟོག་པ་དེ་ནི་གང་གིས་མིང་མང་པོར་བཏགས་ནས་མཚན་མ་རྣམས་གསལ་བར་བྱེད་པ་སྟེ། འདི་ནི་དེ་བཞིན་གྱི་གཞན་དུ་མ་ཡིན་ནོ་ཞེས་གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་དང་། སྐྱེས་པ་དང་། བུད་མེད་ལ་སོགས
275b7 པའི་མིང་གང་ཡིན་པ་དེ་ནི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་ཡང་དག་པའི་ཡེ་ཤེས་གང་གིས་མིང་དང་། རྒྱུ་མཚན་དེ་དག་མི་དམིགས་ཤིང་ཕན་ཚུན་འགྲོ་བའི་འགྲོན་པོ་དང་མཚུངས་ཏེ། རྣམ་པར་ཤེས་པ་རྣམས་མི་སྐྱེ་བས་རྟག་པ་མེད་པ། ཆད་པ་མེད་པས་མུ་སྟེགས་ཅན་དང་། ཉན
iiif viewer powered by OpenSeadragon
