| e-texts navigator |
| Wylie |
275a1 སེམས་ནི་གར་མཁན་བཞིན་དུ་གནས། །ཡིད་ནི་རམ་བུ་ཐོག་པ་འདྲ། །རྣམ་ཤེས་ལྔ་ནི་གྲོགས་ལྟ་བུ། །རྣམ་རྟོག་གར་རྣམས་རབ་ཏུ་ལྟ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཆོས་ལྔ་དང་། རང
275a2 བཞིན་དང་། རྣམ་པར་ཤེས་པ་དང་། བདག་མ་མཆིས་པ་གཉིས་ཡོངས་སུ་རྟོགས་པར་འགྱུར་བ་རྣམ་པར་དབྱེ་བའི་མཚན་ཉིད་བཤད་དུ་གསོལ། དེས་བདག་དང་བྱང་ཆུབ་སེམས་དཔའ་གཞན་རྣམས་ཀྱང་ས་ཐམས་ཅད་ཀྱི་མཚམས་སྦྱོར་ཞིང་ཆོས་འདི་དག་རྣམ་པར་དབྱེ་བ་དང་། སངས
275a3 རྒྱས་ཀྱི་ཆོས་ཐམས་ཅད་ཀྱི་རྗེས་སུ་འཇུག་པར་འགྱུར་ཏེ། སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་ཞུགས་པ་ནི་དེ་བཞིན་གཤེགས་པའི་རང་གིས་རིག་པའི་སའི་བར་དུ་འཇུག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་པར་ཉོན་ལ་ཡིད་ལ་ཟུང་ཤིག་།བློ་གྲོས
275a4 ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་རྣམ་པར་དབྱེ་བ་དང་རབ་ཏུ་འཇུག་པའི་མཚན་ཉིད་ནི་འདི་ལྟ་སྟེ།
275a5 མིང་དང་། རྒྱུ་མཚན་དང་། རྣམ་པར་རྟོག་པ་དང་། ཡང་དག་པའི་ཡེ་ཤེས་དང་། དེ་བཞིན་ཉིད་དེ། རྣལ་འབྱོར་པ་རྣམས་ཀྱིས་བསྒོམས་ན། དེ་བཞིན་གཤེགས་པའི་རང་གིས་རིག་པ་འཕགས་པའི་ཚུལ་ལ་རབ་ཏུ་འཇུག་ཅིང་རྟག་པ་དང་། ཆད་པ་དང་། ཡོད་པ་དང་། མེད་པ་ལ་སོགས་པའི
275a6 ལྟ་བ་སྤངས་ནས་མཐོང་བའི་ཆོས་ལ་བདེ་བར་སྙོམས་པར་འཇུག་པ་ལ་གནས་པ་མངོན་སུམ་དུ་འགྱུར་རོ། །བློ་གྲོས་ཆེན་པོ་ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་དང་། རང་གི་སེམས་སྣང་བ་དང་། ཕྱི་རོལ་གྱི་དངོས་པོ་དེ་དག་ཁོང་དུ་མ་ཆུད་པའི་ཕྱིར་སོ
275a7 སོའི་སྐྱེ་བོ་རྣམ་པར་རྟོག་པར་བྱེད་ཀྱི་འཕགས་པ་རྣམས་ནི་མ་ཡིན་ནོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་བྱིས་པ་སོ་སོའི་སྐྱེ་བོ་རྣམས་རྣམ་པར་རྟོག་པ་སྐྱེ་ལ་འཕགས་པ་རྣམས་ཀྱིས་མ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན
iiif viewer powered by OpenSeadragon
