| e-texts navigator |
| Wylie |
274b1 བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་འདི་ནི་རང་བཞིན་གྱིས་ཡོངས་སུ་དག་པ་ཡིན་མོད་ཀྱི། ཉན་ཐོས་དང་། རང་སངས་རྒྱས་རྟོག་པའི་ལྟ་བ་ཅན་ཐམས་ཅད་བློ་བུར་གྱི་ཉོན་མོངས་པས་བསྒྲིབས་པའི་ཕྱིར་ཡོངས་སུ་མ་དག་པ་མཐོང་གི་།དེ་བཞིན་གཤེགས་པ་རྣམས་ནི་མ་ཡིན
274b2 ནོ། །བློ་གྲོས་ཆེན་པོ་དེ་བཞིན་གཤེགས་པ་ནི་མངོན་སུམ་གྱི་སྤྱོད་ཡུལ་ཅན་ཡིན་པས། དཔེར་ན་ལག་མཐིལ་གྱི་སྐྱུ་རུ་རའི་འབྲས་བུ་བཞིན་དུ་གཟིགས་སོ། །བློ་གྲོས་ཆེན་པོ་ངས་དོན་འདི་རྫུ་འཕྲུལ་གྱི་མཐུས་རྣམ་པར་གཞག་པས་བཙུན་མོ་ཕྲེང་ལྡན་མ་དང་། གཞན་ཡང་ཤེས་རབ་རྣོ་ཞིང་ཡོངས་སུ་རྫོགས
274b3 པའི་བྱང་ཆུབ་སེམས་དཔའ་རྣམས་ཀྱི་ཆེད་དུ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བྱ་བ་རྣམ་པར་ཤེས་པ་བདུན་དང་ལྷན་ཅིག་སྐྱེ་བར་བསྟན་ཅིང་བཤད་དེ། ཉན་ཐོས་རྣམས་གང་ཟག་ལ་བདག་མེད་པར་མཐོང་བ་ལ་མངོན་པར་ཞེན་པའི་ཕྱིར་བཙུན་མོ་ཕྲེང་ལྡན་མ་སངས་རྒྱས་ཀྱི་བྱིན
274b4 གྱི་རླབས་ཀྱི་མཐུས་དེ་བཞིན་གཤེགས་པའི་སྤྱོད་ཡུལ་བཤད་དེ། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་རྣམས་ཀྱི་སྤྱོད་ཡུལ་ནི་མ་ཡིན་ནོ། །བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ནི་དེ་བཞིན་གཤེགས་པ་ཉག་གཅིག་དང་། གཞན་ཡང་ཤེས་རབ
274b5 རྣོ་ཞིང་དོན་ལ་རྟོན་པའི་བྱང་ཆུབ་སེམས་དཔའ་ཤེས་རབ་ཅན་རྣམས་ཀྱི་སྤྱོད་ཡུལ་ཡིན་ཏེ། དེ་ལྟ་བས་ན་བློ་གྲོས་ཆེན་པོ་ཁྱོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་འདི་ལ་རབ་ཏུ་བརྩོན་ཞིང་བསླབ་པར་བྱ་སྟེ། ཐོས་པ
274b6 དང་། ཤེས་པ་ཙམ་གྱིས་ཆོག་པའི་འདུ་ཤེས་སུ་མི་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཟབ་མོ་དེ་བཞིན་གཤེགས་པ་ཡི། །སྙིང་པོ་རྣམ་ཤེས་བདུན་དག་དང་། །ལྷན་ཅིག་འཛིན་གཉིས་རབ་ཏུ་འཇུག་།མཁས་པ་དག་ནི
274b7 ཡོངས་སུ་སྤོང་། །མེ་ལོང་གཟུགས་བཞིན་སེམས་སྣང་སྟེ། །ཐོག་མ་མེད་ནས་བག་ཆགས་བསྒོས། །ཡང་དག་ཇི་བཞིན་རབ་རྟོགས་ན། །དངོས་པོ་རྣམས་ནི་དངོས་པོ་མེད། །ཇི་ལྟར་བྱིས་པ་སོར་མོའི་རྩེར། །འཛིན་ཅིང་ཟླ་བ་མི་ལྟ་བ། །དེ་བཞིན་ཡི་གེར་ཞེན་པ་རྣམས། །ང་ཡི་ཡང་དག་མཐོང་མི་འགྱུར། །
iiif viewer powered by OpenSeadragon
