| e-texts navigator |
| Wylie |
272a1 ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སེམས་ཙམ་དང་ནི་སྣང་མེད་དང་། །གནས་འདི་དང་ནི་སངས་རྒྱས་ས། །འདས་དང་མ་འོངས་ད་ལྟར་གྱི། །དུས་གསུམ་སངས་རྒྱས་རྣམས་ཀྱིས་བཤད། །སེམས་ཙམ་ས་ནི་བདུན་པ
272a2 ཡིན། །སྣང་བ་མེད་ནི་ས་བརྒྱད་པ། །ས་གཉིས་དག་ནི་གནས་ཞེས་བྱ། །སངས་རྒྱས་ས་ནི་མཆོག་ཡིན་ནོ། །རང་རིག་ཡེ་ཤེས་རྣམ་པར་དག་།དེ་ནི་ང་ཡི་ས་ཡིན་ནོ། །དབང་ཕྱུག་དང་ནི་མཆོག་གི་གནས། །རྣམ་པར་བརྟག་ཅིང་རབ་བཀོད་པ། །གསལ་བྱེད་འབར་བའི་མེ་ལྟ་བུར། །འོད་ཟེར
272a3 ཀུན་དུ་ཁྱབ་པར་སྣང་། །འོད་ཟེར་འབར་བས་མིག་མི་ཉམས། །སྲིད་གསུམ་ཀུན་དུ་འདུལ་བར་བྱེད། །སྤྲུལ་པས་སྲིད་གསུམ་གནས་པར་སྟོན། །ཁ་ཅིག་སྔ་ནས་སྤྲུལ་པ་སྟེ། །དེར་ནི་ཐེག་པ་རྣམས་སྟོན་པ། །ཐམས་ཅད་དེ་བཞིན་གཤེགས་ཀྱིས། །ས་བཅུ་དེ་ནི་དང་པོ་ཡིན། །དང་པོ་པ་ནི
272a4 བརྒྱད་པ་ཡིན། །དགུ་པ་ཡང་ནི་བདུན་པ་སྟེ། །བདུན་པ་དེ་ཡང་བརྒྱད་པ་ཡིན། །གཉིས་པ་དེ་ནི་གསུམ་པ་ཡིན། །བཞི་པ་ཡང་ནི་ལྔ་པ་ཡིན། །གསུམ་པ་ཡང་ནི་དྲུག་ཡིན་ཏེ། །སྣང་བ་མེད་ལ་རིམ་ཅི་ཡོད།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས།
272a5 བམ་པོ་བརྒྱད་པ་སྟེ་ཐ་མ། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྟག་པ་ཞིག་གམ། འོན་ཏེ་མི་རྟག་པ་ཞིག་ལགས། བཅོམ་ལྡན
272a6 འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ། འདི་ལྟར་གཉི་ག་ཡང་ཉེས་པ་ཡོད་པའི་ཕྱིར་རོ། །གལ་ཏེ་རྟག་པར་གྱུར་ན་ནི་བྱེད་པའི་བདག་པོ་ཡོད་པའི་ཉེས་པར་འགྱུར་རོ། །
272a7 མུ་སྟེགས་ཅན་དག་རྟག་པ་ནི་བྱེད་པ་པོས་བྱས་པ་མ་ཡིན་པའོ་ཞེས་ཟེར་ཏེ། དེ་བས་ན་དེ་བཞིན་གཤེགས་པ་ནི་རྟག་ཀྱང་རྟག་པ་མ་ཡིན་ཏེ། བྱས་པ་མ་ཡིན་པ་རྟག་པའི་ཉེས་པར་འགྱུར་བའི་ཕྱིར་རོ། །ཅི་སྟེ་དེ་བཞིན་གཤེགས་པ་མི་རྟག་པ་ཡིན་ན་ནི་བྱས་པ་ཡོད་པའི་མི་རྟག་པའི་ཉེས་པར་འགྱུར་ཏེ།
iiif viewer powered by OpenSeadragon
