| e-texts navigator |
| Wylie |
270b1 སྙོམས་པར་འཇུག་གི་། ཉན་ཐོས་དང་། རང་སངས་རྒྱས་རྣམས་ནི་མ་ཡིན་ཏེ། ཉན་ཐོས་དང་། རང་སངས་རྒྱས་རྣམས་ནི་མངོན་པར་འདུ་བྱེད་པའི་བློ་ཅན་གཟུང་བ་དང་། འཛིན་པའི་མཚན་ཉིད་དུ་ལྷུང་བས་འགོག་པའི་སྙོམས་པར་འཇུག་གོ། །དེ་བས་ན་ས་བདུན་པ་ནི་ཡིད་ལ་བྱེད་པས་སྙོམས
270b2 པར་འཇུག་པ་མ་ཡིན་ཏེ། ཆོས་ཐམས་ཅད་བྱེ་བྲག་མེད་པའི་མཚན་ཉིད་ཐོབ་པས་རིམ་གྱིས་མཚན་ཉིད་ཀྱི་དངོས་པོ་སྣ་ཚོགས་ཐོབ་པ་ནི་མ་ཡིན་ནོ། །དགེ་བ་དང་མི་དགེ་བའི་ཆོས་ཐམས་ཅད་ཀྱི་རང་གི་མཚན་ཉིད་ཁོང་དུ་ཆུད་དེ། སྙོམས་པར་འཇུག་པས་དེའི་ཕྱིར་ས་བདུན་པ་ལ་དགེ་བའི་སེམས
270b3 ཀྱིས་སྙོམས་པར་འཇུག་པ་མེད་དོ། །བློ་གྲོས་ཆེན་པོ་ས་བརྒྱད་པའི་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་རྣམ་པར་རྟོག་པ་དང་། འདུ་ཤེས་ལྡོག་པར་འགྱུར་རོ། །ས་དང་པོ་ནས་ས་བདུན་པའི་བར་གྱི་བྱང་ཆུབ
270b4 སེམས་དཔའ་དེ་དག་ཁམས་གསུམ་པ་འདི་ནི་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཙམ་མོ་ཞེས་སོ་སོར་རབ་ཏུ་རྟོག་སྟེ། བདག་དང་བདག་གི་དང་བྲལ་བ། རང་གི་རྣམ་པར་རྟོག་པའི་སྤྱོད་པ་ཅན། ཕྱི་རོལ་གྱི་དངོས་པོ་སྣ་ཚོགས་ཀྱི་མཚན་ཉིད་དུ་ལྟུང་བ། བྱིས་པ་སོ་སོའི་སྐྱེ་བོ་རྣམས་ཀྱི་རང
270b5 གི་མཚན་ཉིད་གཟུང་བ་དང་། འཛིན་པའི་དངོས་པོ་རྣམ་པ་གཉིས་སུ་གྱུར་པས་མི་ཤེས་པའི་རྗེས་སུ་སོང་བ། ཐོག་མ་མེད་པའི་དུས་ནས་རྣམ་པར་སྤྲོས་པའི་གནས་ངན་ལེན་གྱི་བག་ཆགས་ཀྱིས་ཡོངས་སུ་བསྒོས་པ་རྣམས་ཁོང་དུ་མི་ཆུད་དོ། །བློ་གྲོས་ཆེན་པོ་ས་བརྒྱད་པའི་བྱང་ཆུབ་སེམས་དཔའ
270b6 སེམས་དཔའ་ཆེན་པོ་དང་། ཉན་ཐོས་དང་། རང་སངས་རྒྱས་རྣམས་ཀྱིས་མྱ་ངན་ལས་འདས་པ་མཚུངས་ཀྱང་བྱང་ཆུབ་སེམས་དཔའ་ནི་ཏིང་ངེ་འཛིན་བློས་ཡོངས་སུ་བཟུང་བས། དེའི་ཕྱིར་ཏིང་ངེ་འཛིན་གྱི་སྒོའི་བདེ་བས་ཡོངས་སུ་མྱ་ངན་ལས་མི་འདའོ། །གལ་ཏེ་ཡོངས་སུ་མ་བཟུང་དུ་ཟིན་ན་ནི་དེ་བཞིན
270b7 གཤེགས་པའི་ས་ཡོངས་སུ་རྫོགས་པར་མི་འགྱུར་ཞིང་སེམས་ཅན་གྱི་བྱ་བ་ཐམས་ཅད་ཡོངས་སུ་སྤང་བར་འགྱུར་ལ། དེ་བཞིན་གཤེགས་པའི་རིགས་ཀྱི་གདུང་ཡང་ཆད་པར་འགྱུར་བས་ན། སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་བསམ་གྱིས་མི་ཁྱབ་པའི
iiif viewer powered by OpenSeadragon
