| e-texts navigator |
| Wylie |
269b1 གསེར་གྱི་རང་བཞིན་འཇིག་པ་མ་ཡིན་གྱི། རྒྱན་གྱི་དབྱིབས་ལ་འཇིག་པ་ཡོད་པ་དེ་བཞིན་དུ་དངོས་པོ་གཞན་རྣམ་པར་འགྱུར་བ་ལ་སོགས་པ་ཡང་དེ་བཞིན་ནོ་ཞེས་དེ་ལ་སོགས་པའི་རྣམ་པས་མུ་སྟེགས་ཅན་རྣམས་མི་རྟག་པའི་ལྟ་བར་རྣམ་པར་རྟོག་གོ། །འདི་ལྟར་མེས་འབྱུང་བ་ཆེན་པོ
269b2 རྣམས་སྲེགས་པའི་ཚེ་རང་གི་མཚན་ཉིད་ལ་ནི་མི་སྲེག་གོ། །ཅི་སྟེ་སོ་སོ་ནས་རང་གི་མཚན་ཉིད་གཅིག་གིས་གཅིག་འཇིག་པར་བྱེད་ན་ནི་འབྱུང་བ་དག་རྒྱུར་བྱས་པའི་གཟུགས་རྣམས་འཆད་པར་འགྱུར་བའི་རིགས་སོ། །བློ་གྲོས་ཆེན་པོ་ངའི་ཆོས་ནི་བྱུང་བ་ཉིད་ན་རྟག་པ་ཡང་མ་ཡིན། མི་རྟག་པ
269b3 ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཕྱི་རོལ་གྱི་དངོས་པོ་མ་ངེས་པའི་ཕྱིར་སྲིད་པ་གསུམ་སེམས་ཙམ་དུ་བསྟན་གྱི། མཚན་ཉིད་སྣ་ཚོགས་དང་། སྐྱེ་བ་དང་། འཇིག་པ་ཡོད་པར་ནི་མ་བསྟན་ཏོ། །འབྱུང་བ་ཆེན་པོ་འདུས་པའི་བྱེ་བྲག་དང་། འབྱུང་བ་དང་འབྱུང་བ་ལས་གྱུར
269b4 པའི་ཕྱིར་རྣམ་པ་གཉིས་ཀྱི་དངོས་པོ་གཟུང་བ་དང་འཛིན་པར་རྣམ་པར་རྟོག་པར་འགྱུར་བ་དང་། རྣམ་པར་རྟོག་པ་གཉིས་ཡོངས་སུ་ཤེས་པ་དང་། ཕྱི་རོལ་གྱི་དངོས་པོ་དང་དངོས་པོ་མེད་པར་ལྟ་བ་གཉིས་དང་བྲལ་བ་དང་། རང་གི་སེམས་སྣང་བ་ཙམ་དུ་ཁོང་དུ་ཆུད་ཅིང་རྣམ་པར་རྟོག་པའི་བསམས
269b5 པའི་མངོན་པར་འདུ་བྱེད་པ་ལས་སྐྱེའི། མངོན་པར་འདུས་མ་བྱས་པ་ནི་མ་ཡིན་ནོ། །ཞེས་སེམས་དངོས་པོ་དང་དངོས་པོ་མེད་པའི་རྣམ་པར་རྟོག་པ་དང་བྲལ་བས་ན་འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པ་མཆོག་གི་ཆོས་ཐམས་ཅད་ནི་རྟག་པ་ཡང་མ་ཡིན།
269b6 མི་རྟག་པ་ཉིད་ཀྱང་མ་ཡིན་ནོ། །རང་གི་སེམས་སྣང་བ་ཙམ་དུ་ཁོང་དུ་མ་ཆུད་པས་མཐའ་གཉིས་ཀྱི་ལྟ་བ་ངན་པའི་རྒྱུན་དུ་ལྷུང་བར་འགྱུར་ཏེ། མུ་སྟེགས་ཅན་ཐམས་ཅད་ཀྱིས་རང་གི་རྣམ་པར་རྟོག་པ་ཁོང་དུ་མི་ཆུད་དོ། །སོ་སོའི་སྐྱེ་བོ་དེ་དག་ལ་གཞི་ཅི་ཡང་མེད་པས་འདི་ལྟར་འཇིག་རྟེན་པ་དང་།
269b7 འཇིག་རྟེན་ལས་འདས་པ་དང་། འཇིག་རྟེན་ལས་འདས་པ་མཆོག་གི་ཆོས་ཚིག་གི་རྣམ་པར་རྟོག་པ་ལས་སྐྱེ་བར་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་ཆུད་པ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དང་པོ
iiif viewer powered by OpenSeadragon
