| e-texts navigator |
| Wylie |
268a1 འདུ་བྱེད་ཐམས་ཅད་མི་རྟག་པས། །སྐྱེ་ཞིང་འཇིག་པའི་ཆོས་ཅན་ནོ་ཞེས་བཀའ་སྩལ་ན། འདིའི་དོན་ཇི་ལྟ་བུ་ལོག་པའམ། ཡང་དག་པ་ཞིག་ལགས། མི་རྟག་པ་ཉིད་ལ་ནི་རྣམ་པ་དུ་མཆིས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མུ་སྟེགས་ཅན་རྣམས་ལ
268a2 ནི་མི་རྟག་པ་རྣམ་པ་བདུན་ཡོད་ཀྱི། ངའི་བསྟན་པ་ལ་ནི་མ་ཡིན་ནོ། །རྣམ་པ་བདུན་གང་ཞེ་ན། དེ་དག་ཁ་ཅིག་འདི་སྐད་དུ་མངོན་པར་འདུས་བྱས་ནས། ཡོངས་སུ་སྤངས་པ་ནི་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་དབྱིབས་རྣམ་པར་འཇིག་པ་ནི་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི
268a3 གཟུགས་ཉིད་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་གཟུགས་རྣམ་པར་འགྱུར་བའི་གནས་སྐབས་ནི་མི་རྟག་པ་ཉིད་ཅེས་བྱ་སྟེ། བར་ཆད་མེད་པར་རང་གི་ངང་གིས་འབྲེལ་ཞིང་འཇིག་པས། ཇི་ལྟར་འོ་མ་ལས་ཞོར་འགྱུར་བ་ལ་སོགས་པའི་བྱེ་བྲག་ཐ་དད་པ་མཐོང་བར་མི་ནུས་པ་དེ་བཞིན་དུ
268a4 དངོས་པོ་ཐམས་ཅད་ལ་ཡང་རྣམ་པར་འཇིག་པའི་མི་རྟག་པ་ཉིད་དུ་འཇུག་གོ་ཞེས་ཟེར་རོ། །ཁ་ཅིག་ནི་དངོས་པོ་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་དངོས་པོའི་དངོས་པོ་མེད་པ་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་ཆོས་ཐམས་ཅད་མི་སྐྱེ་བས་མི་རྟག་པ་ཉིད་དེ། ཆོས་ཐམས་ཅད
268a5 ཀྱི་ནང་དུ་འཇུག་པའོ་ཞེས་ཟེར་རོ། །དེ་ལ་བློ་གྲོས་ཆེན་པོ་དངོས་པོ་མེད་པ་མི་རྟག་པ་ཉིད་ཅེས་བྱ་བ་ནི་འདི་ལྟ་སྟེ། འབྱུང་བ་ཆེན་པོ་བཞི་དང་། འབྱུང་བ་ལས་གྱུར་པའི་རང་གི་མཚན་ཉིད་འཇིག་ཅིང་འབྱུང་བ་ཆེན་པོ་བཞིའི་རང་བཞིན་ནི་མི་དམིགས་པ་དང་མི་སྐྱེ་བའོ། །དེ་ལ་མི་སྐྱེ་བའི་མི་རྟག་པ
268a6 ཞེས་བྱ་བ་དེ་ནི་རྟག་པ་དང་། མི་རྟག་པ་ཡིན་པས་ཆོས་ཐམས་ཅད་ཡོད་པ་དང་མེད་པ་མི་སྐྱེ་བ་དང་། རྡུལ་ཕྲ་མོའི་བར་དུ་རབ་ཏུ་བཤིག་སྟེ། མི་མཐོང་བ་འདི་ནི་མི་སྐྱེ་བའི་དོན་ཡིན་གྱི་སྐྱེ་བ་ནི་མ་ཡིན་པས་འདི་ནི་མི་སྐྱེ་བའི་མི་རྟག་པ་ཉིད་ཀྱི་མཚན་ཉིད་ཡིན་ཏེ། འདི་ཁོང་དུ་མ་ཆུད་པ་ནི
268a7 མུ་སྟེགས་ཅན་རྣམས་ཀྱི་སྐྱེ་བ་མི་རྟག་པའི་དོན་དུ་ལྷུང་བར་འགྱུར་རོ། །བློ་གྲོས་ཆེན་པོ་དངོས་པོ་མི་རྟག་པ་ནི་རང་གིས་བློས་རྣམ་པར་བརྟགས་པ་སྟེ། རྟག་པ་དང་། མི་རྟག་པའི་དངོས་པོ་ནི་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། མི་རྟག་པ་ནི་རང་གི་ངོ་བོ་ཉིད་ཀྱིས་མི་འཇིག
iiif viewer powered by OpenSeadragon
