| e-texts navigator |
| Wylie |
267b1 རིགས་སོ། །སྐྱེ་བ་མེད་པས་དངོས་མི་འགྱུར། །མུ་སྟེགས་ཅན་གྱི་སྐྱོན་རྣམས་སྤངས། །རྐྱེན་གྱི་འབྲེལ་པ་ཙམ་བཤད་དེ། །བྱིས་པ་རྣམས་ཀྱིས་མི་རིག་གོ། །རྐྱེན་གྱི་འབྲེལ་ལས་ལོགས་ཤིག་ན། །དངོས་པོ་སྐྱེ་བ་ཡོད་ཅེས་པ། དེ་ནི་རྒྱུ་མེད་སྨྲ་བ་སྟེ། །འབྲེལ་པའི་དོན་ནི་འཇིག་པར་བྱེད། །
267b2 མར་མེའི་གཟུགས་རྣམས་སྣང་བྱེད་ལྟར། །འབྲེལ་པ་སྣང་བའང་དེ་བཞིན་ན། །དེ་ནི་འབྲེལ་ལས་ལོགས་ཤིག་ན། །དངོས་པོ་རྣམས་ནི་ཡོད་པའི་རིགས། །དངོས་པོ་མེད་པ་སྐྱེ་མེད་པས། །ནམ་མཁའི་རང་བཞིན་ལྟ་བུའོ། །འབྲེལ་པ་དག་ལས་ལོག་གྱུར་ན། །བློ་ཡིས་རྟོག་པར་བྱ་བ་མེད། །གཞན
267b3 ཡང་སྐྱེ་བ་མེད་ཡོད་དེ། །འཕགས་པས་ཐོབ་པའི་ཆོས་ཉིད་དོ། །གང་དེའི་སྐྱེ་བ་མི་འབྱུང་བ། །དེ་ནི་མི་སྐྱེ་བཟོད་པ་ཡིན། །ནམ་ཞིག་འཇིག་རྟེན་འདི་དག་ཀུན། །འབྲེལ་པ་ཙམ་དུ་རབ་རྟོག་ན། །ཐམས་ཅད་འབྲེལ་པ་ཡོངས་སྤངས་ནས། །དེ་ནས་ཏིང་འཛིན་འཐོབ་པར་འགྱུར། །མི་ཤེས་སྲེད་པ
267b4 ལས་ལ་སོགས། །དེ་ནི་ནང་གི་འབྲེལ་པ་ཡིན། །མི་ཤེས་འཇིམ་གོང་འཁོར་ལོ་དང་། །ས་བོན་ལ་སོགས་ཕྱི་རོལ་ཡིན། །གལ་ཏེ་དངོས་པོ་གཞན་ཡོད་དེ། །རྒྱུ་དང་རྐྱེན་ལས་སྐྱེ་ཞེ་ན། །དེ་ནི་འབྲེལ་པའི་དོན་མིན་པས། །དེ་ཡང་འགྲུབ་པར་མི་འགྱུར་རོ། །གལ་ཏེ་སྐྱེ་བ་རང་བཞིན་མེད། །དེ་ནི་སུ
267b5 ཡི་འབྲེལ་པར་འགྱུར། །ཕན་ཚུན་དུ་ནི་བསྐྱེད་པའི་ཕྱིར། །རྒྱུ་རྐྱེན་དོན་དུ་ཤེས་པར་བྱ། །སྲ་གཤེར་དྲོད་དང་གཡོ་བའི་ཆོས། །བྱིས་པས་རྣམ་པར་བརྟགས་པ་སྟེ། །གྲངས་ལས་མ་གཏོགས་ཆོས་གཞན་མེད། །དེའི་ཕྱིར་དངོས་པོ་མེད་པར་བཤད། །སྨན་པས་ནད་རྣམས་གསོ་བ་དག་།བསྟན་བཅོས
267b6 ཐ་དད་མེད་ཀྱང་ནི། །ནད་ནི་ཐ་དད་བྱེ་བྲག་གིས། །གཉེན་པོ་སྣ་ཚོགས་བཤད་པ་ལྟར། ང་ཡང་སེམས་ཅན་དེ་དག་གི། །ཉོན་མོངས་ནད་རྣམས་གཞིག་པའི་ཕྱིར། །དབང་པོ་དག་ནི་རབ་ཤེས་ནས། །དེ་ལ་སྒྲོལ་བའི་སྒོ་བཤད་དོ། །ཉོན་མོངས་དབང་པོ་ཐ་དད་པས། །ཆོས་ནི་སྣ་ཚོགས་ཡོད་མ་ཡིན། །
267b7 ཐེག་གཅིག་འབའ་ཞིག་ཆོས་སྟོན་པ། །དེ་ནི་ཐེག་པ་ཆེན་པོ་ཡིན། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མུ་སྟེགས་ཅན་ཐམས་ཅད་ཀྱང་མི་རྟག་པ་ཉིད་དོ་ཞེས་རྣམ་པར་རྟོག་པར་བགྱིད། བཅོམ་ལྡན་འདས་ཀྱིས་ཀྱང
iiif viewer powered by OpenSeadragon
