| e-texts navigator |
| Wylie |
267a1 ན། །ཆོས་ཀྱི་ཚུལ་ནི་རྒྱུན་མི་འཆད། །རྒྱུ་མེད་རབ་ཏུ་སྨྲ་བ་ནི། །འཇིགས་པའི་མུ་སྟེགས་ཅན་རྣམས་ཏེ། །ཇི་ལྟར་ཅི་ཡི་ཕྱིར་ན་ནི། །དེ་ཡང་ཅི་ཕྱིར་སྐྱེ་བར་འགྱུར། །གང་དག་ཏུ་ནི་འདུས་གྱུར་ན། །རྒྱུ་མེད་པར་ནི་སྨྲ་བར་བྱེད། །འདུས་བྱས་ཆོས་རྣམས་རབ་བརྟགས་ན། །རྒྱུ་མེད
267a2 རྒྱུ་ཡོད་མ་ཡིན་ཏེ། །སྐྱེ་དང་འཇིག་པར་སྨྲ་བ་ཡི། །ལྟ་བ་དག་ནི་དེ་ནས་ལྡོག་།དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་དེ་ཞུ་བ་ཞུས་པ། ཅི་ཡི་སླད་དུ་སྐྱེ་མ་མཆིས། །འོན་ཏེ་དངོས་པོ་མ་མཆིས་སམ། །དེ་སྟེ་རྐྱེན་ལ་བརྟགས་པའམ། །ཆོས་མཆིས་མི་སྐྱེ་ཞེས་བགྱི་འམ། །
267a3 མིང་ནི་དོན་མ་མཆིས་མི་རིགས། །རྣམ་པར་དབྱེ་ཞིང་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། དངོས་མེད་མི་སྐྱེ་མ་ཡིན་ཏེ། །རྐྱེན་ལ་བཏགས་པའང་མ་ཡིན་ནོ། །དངོས་པོ་ཡོད་པས་མིང་ཡོད་མིན། །མིང་ལ་དོན་མེད་པ་ཡང་མིན། །མུ་སྟེགས
267a4 ཅན་ནི་ཐམས་ཅད་དང་། །ཉན་ཐོས་དང་ནི་རང་རྒྱལ་དང་། །ས་བདུན་སྤྱོད་ཡུལ་མ་ཡིན་པ། །དེ་ནི་མི་སྐྱེ་མཚན་ཉིད་དོ། །རྒྱུ་དང་རྐྱེན་རྣམས་ཡོངས་སྤངས་ཤིང་། །བྱ་བ་ཐམས་ཅད་ཡོངས་བྲལ་ཏེ། །ཤིན་ཏུ་ཕྲ་བའི་སེམས་ཅན་གནས། །མཚན་ཉིད་མཚན་གཞི་ཉིད་སྤངས་ནས། །དེ་ལུས་རབ་ཏུ
267a5 གྱུར་པ་ནི། །སྐྱེ་བ་མེད་པར་ངས་བཤད་དོ། །ཕྱི་རོལ་དངོས་པོ་དངོས་མེད་མིན། །སེམས་ཅན་ཡོངས་སུ་གཟུང་བ་མེད། །ལྟ་བ་ཐམས་ཅད་རབ་སྤངས་པ། །སྐྱེ་བ་མེད་པར་ངས་བཤད་དོ། །འདི་ལྟར་རང་བཞིན་མེད་པ་དང་། །སྟོང་པ་ལ་སོགས་དབྱེ་བར་བྱ། །སྟོང་ཕྱིར་སྟོང་ཞེས་བཤད་པ་མིན། །སྐྱེ
267a6 བ་མེད་ཕྱིར་སྟོང་ཞེས་བཤད། །རྒྱུ་རྐྱེན་གྲངས་ནི་འདུས་པ་ལས། །སྐྱེ་དང་འཇིག་པ་ཡོད་པར་གྱུར། །རྒྱུ་རྐྱེན་གྲངས་ལས་ལོགས་ཤིག་ན། །སྐྱེ་བ་དང་ནི་འཇིག་པ་མེད། །རྒྱུ་རྐྱེན་གྲངས་ལས་ལོགས་ཤིག་ན། །དངོས་པོ་ཐ་དད་ཡོད་མ་ཡིན། །གཅིག་དང་ཐ་དད་ཅེས་བྱ་བ། །མུ་སྟེགས་རྣམ་པར
267a7 རྟོག་པ་ཡིན། །ཡོད་མེད་དངོས་པོ་མི་སྐྱེ་སྟེ། །ཡོད་པ་མ་ཡིན་མེད་པའང་མིན། །གྲངས་འགྱུར་བ་ནི་མ་གཏོགས་པར། །གང་ཡང་དམིགས་པར་མི་འགྱུར་རོ། །ཀུན་རྫོབ་ཙམ་དུ་གྲངས་ཡོད་པས། །ཕན་ཚུན་དུ་ནི་འབྲེལ་པར་བྱེད། །རྒྱུ་རྐྱེན་འབྲེལ་ལས་ལོགས་ཤིག་ན། །སྐྱེ་བའི་དོན་ནི་མི
iiif viewer powered by OpenSeadragon
