| e-texts navigator |
| Wylie |
266b1 པ་སོ་སོའི་སྐྱེ་བོ་མི་མཁས་པ་རྣམས་ནི་ཡང་དག་པ་མ་ཡིན་པར་ལྷུང་བས་སྐྱེ་བ་དང་འགག་པའི་རྣམ་པར་རྟོག་པ་འབྱུང་གི་འཕགས་པ་རྣམས་ནི་མ་ཡིན་ནོ། །དེ་ལ་ཡང་དག་པ་མ་ཡིན་པ་ཞེས་བྱ་བ་ནི་དངོས་པོའི་རང་བཞིན་བརྟགས་པ་དེ་བཞིན་དུ་ཡང་མ་ཡིན། གཞན་དུ་ཡང་མ་ཡིན་ནོ། །གལ
266b2 ཏེ་གཞན་དུ་བརྟགས་ན་ནི་དངོས་པོ་ཐམས་ཅད་ཀྱི་རང་བཞིན་ལ་མངོན་པར་ཞེན་པ་ཉིད་དུ་འབྱུང་བས་རབ་ཏུ་དབེན་པ་མི་མཐོང་ངོ་། །རབ་ཏུ་དབེན་པ་མི་མཐོང་ན་རྣམ་པར་རྟོག་པ་དང་བྲལ་བར་མི་འགྱུར་རོ། །དེའི་ཕྱིར་བློ་གྲོས་ཆེན་པོ་མཚན་མ་མེད་པས་ནི་མཆོག་མཐོང་གི་མཚན་མས་ནི་མ་ཡིན་ཏེ།
266b3 མཚན་མར་མཐོང་བ་ནི་སྐྱེ་བ་ལེན་པའི་རྒྱུ་ཡིན་པའི་ཕྱིར་མཆོག་མ་ཡིན་ནོ། །བློ་གྲོས་ཆེན་པོ་མཚན་མ་མེད་པ་ནི་རྣམ་པར་རྟོག་པ་མི་སྐྱེ་སྟེ། མི་འབྱུང་མི་འགག་པས་ངས་མྱ་ངན་ལས་འདས་པ་ཞེས་བཤད་དེ། བློ་གྲོས་ཆེན་པོ་དེ་ལ་མྱ་ངན་ལས་འདས་པ་ནི་ཡང་དག་པའི་དོན་ཇི་ལྟ་བ་བཞིན་དུ་མཐོང
266b4 བས་སྔར་རྣམ་པར་རྟོག་པའི་སེམས་དང་སེམས་ལས་བྱུང་བའི་ཆོས་རྣམས་སྤངས་པ། དེ་བཞིན་གཤེགས་པའི་སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པ་དེ་ནི་ངས་མྱ་ངན་ལས་འདས་པ་ཡིན་ནོ་ཞེས་བསྟན་ཏོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས
266b5 སུ་བཅད་པ་འདི་དག་གསུངས་སོ། །སྐྱེ་བར་སྨྲ་བ་དེ་བཟློག་ཕྱིར། །མི་སྐྱེ་དོན་ནི་རྣམ་པར་གཞག་།ང་ཡིས་དེ་ལྟར་བཤད་པའི་ཆོས། །བྱིས་པ་རྣམས་ཀྱིས་རིག་མི་ནུས། །ཆོས་རྣམས་ཐམས་ཅད་མི་སྐྱེ་བས། །དངོས་པོ་མེད་ཅིང་སྐྱེ་བ་མེད། །རྨི་ལམ་སྒྱུ་མ་དྲི་ཟའི་གྲོང་། །དངོས་པོ་ཡོད་ཀྱང་རྒྱུ་ནི
266b6 མེད། །མ་སྐྱེས་རང་བཞིན་མེད་པ་དང་། །ཅི་ཕྱིར་སྟོང་པའང་བཤད་པར་བྱ། །འདུས་པ་དག་ནི་ཡོངས་སྤངས་ཤིང་། །བློ་གྲོས་རིག་ན་དངོས་མི་སྣང་། །དེ་ཕྱིར་སྟོང་ཉིད་མ་སྐྱེས་པ། །རང་བཞིན་མེད་པར་ངས་བཤད་དོ། །འདི་ལྟར་རེ་རེ་འདུས་པས་ན། །དངོས་པོ་སྣང་ཡང་ཡོད་མ་ཡིན། །རྣམ་པར
266b7 གཞིག་ན་འདུས་པ་མེད། །མུ་སྟེགས་ལྟ་བ་ལྟར་ཡང་མིན། །རྨི་ལམ་སྒྱུ་མ་སྐྲ་ཤད་དང་། །སྨིག་རྒྱུ་དྲི་ཟའི་གྲོང་ཁྱེར་ལྟར། །འཇིག་རྟེན་དངོས་པོ་སྣ་ཚོགས་ཀུན། །རྒྱུ་མེད་མཚན་ཉིད་རབ་ཏུ་སྣང་། །རྒྱུ་ཡོད་སྨྲ་བ་གདུལ་བའི་ཕྱིར། །མ་སྐྱེས་དོན་ནི་རབ་ཏུ་བསྒྲགས། །སྐྱེ་མེད་རབ་ཏུ་བསྒྲགས་པས
iiif viewer powered by OpenSeadragon
