| e-texts navigator |
| Wylie |
266a1 བཤད་པའི་སྐྱེ་བ་མེད་པ་དང་། འགག་པ་མེད་པ་ནི་མུ་སྟེགས་ཅན་རྣམས་ཀྱི་སྐྱེ་བ་མེད་པ་དང་འགག་པ་མེད་པ་དང་མཚུངས་པ་མ་ཡིན་ཏེ། དེ་ཅིའི་ཕྱིར་ཞེ་ན། མུ་སྟེགས་ཅན་དེ་དག་ནི་དངོས་པོའི་རང་བཞིན་ཡོད་པས་མ་སྐྱེས་པ་དང་། མི་འགྱུར་བའི་མཚན་ཉིད་མི་འཐོབ་ཀྱི་ང
266a2 ནི་དེ་ལྟར་ཡོད་པ་དང་། མེད་པའི་ཕྱོགས་སུ་ལྷུང་བ་མ་ཡིན་ནོ། །བློ་གྲོས་ཆེན་པོ་ང་ནི་ཡོད་པ་དང་མེད་པའི་ཕྱོགས་དང་བྲལ་བ། སྐྱེ་བ་དང་འཇིག་པ་དང་བྲལ་བ། དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན་ཏེ། སྒྱུ་མ་དང་། རྨི་ལམ་གྱི་གཟུགས་སྣ་ཚོགས་ལྟ་བུར་སྣང་བའི་ཕྱིར་དངོས
266a3 པོ་མེད་པ་ཡང་མ་ཡིན་ནོ། །ཇི་ལྟར་ན་དངོས་པོ་མེད་པ་ཡིན་ཞེ་ན། འདི་ལྟ་སྟེ། གཟུགས་ཀྱི་རང་བཞིན་གྱི་མཚན་ཉིད་མེད་ཅིང་གཟུང་བ་རྣམས་སྣང་བ་དང་མི་སྣང་བའི་ཕྱིར་དང་། འཛིན་པས་ཡོངས་སུ་མ་བཟུང་བའི་ཕྱིར་དེས་ན་དངོས་པོ་ཐམས་ཅད་ནི་དངོས་པོ་ཡང་མ་ཡིན། དངོས་པོ་མེད་པ་ཡང
266a4 མ་ཡིན་ནོ། །འདི་ལྟར་རང་གི་སེམས་སྣང་བ་ཙམ་དུ་ཁོང་དུ་ཆུད་པས་རྣམ་པར་རྟོག་པ་མི་སྐྱེ་ཞིང་ཤིན་ཏུ་བདེ་བས་འཇིག་རྟེན་གྱི་བྱ་བ་རྣམས་རབ་ཏུ་ཞི་བ་ཡིན་ན། བྱིས་པ་སོ་སོའི་སྐྱེ་བོ་མི་མཁས་པ་རྣམས་བྱ་བ་ཡོད་པར་རྣམ་པར་རྟོག་གི་འཕགས་པ་རྣམས་ནི་མ་ཡིན་ནོ། །ཡང་དག་པ་མ་ཡིན་པའི
266a5 རྣམ་པར་རྟོག་པ་ནི་དྲི་ཟའི་གྲོང་ཁྱེར་དང་། སྒྱུ་མ་དང་། སྤྲུལ་པའི་སྐྱེས་བུ་ལྟ་བུའོ། །བློ་གྲོས་ཆེན་པོ་དཔེར་ན་དྲི་ཟའི་གྲོང་ཁྱེར་གྱི་ནང་དུ་སྒྱུ་མ་དང་། སྤྲུལ་པའི་སྐྱེས་བུའི་འདྲེན་པ་མང་པོ་སྣ་ཚོགས་འབྱུང་ཞིང་འཇུག་པ་ལ། བྱིས་པ་མི་མཁས་པའི་རྣམ་པར་རྟོག་པས་བདེན་པར་འདི་དག་འབྱུང་ངོ་། །
266a6 འཇུག་གོ་ཞེས་སྨྲ་ཡང་ཡང་དག་པར་འབྱུང་ཞེས་བྱ་བའམ། འཇུག་པ་ཞེས་བྱ་བ་མེད་དེ། དེ་ནི་རྣམ་པར་རྟོག་པ་ཙམ་དུ་ཟད་པའི་ཕྱིར་རོ། །དེ་བཞིན་དུ་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་མི་མཁས་པ་རྣམས་སྐྱེ་བ་མེད་པ་དང་། འགག་པ་མེད་པའི་ནོར་པ་སྐྱེད་པར་བྱེད་དེ། དེ་དག་ལ་ནི་འདུས
266a7 བྱས་སམ། འདུས་མ་བྱས་གང་ཡང་མེད་དོ། །སྒྱུ་མའི་སྐྱེས་བུ་ལྟར་སྐྱེ་ཡང་ཡང་དག་པར་དེ་ལ་སྐྱེ་བའམ་འགག་པ་ཅི་ཡང་མེད་དེ། དངོས་པོ་དང་དངོས་པོ་མེད་པ་གང་ཡང་ཡོད་པ་མ་ཡིན་པའི་ཕྱིར་རོ། །ཆོས་ཐམས་ཅད་ཀྱང་དེ་བཞིན་ཏེ། སྐྱེ་བ་དང་འགག་པ་སྤངས་པ་ཡིན་ན། བྱིས
iiif viewer powered by OpenSeadragon
