| e-texts navigator |
| Wylie |
265b1 པའོ། །བཅོམ་ལྡན་འདས་ཀྱིས་ཀྱང་ནམ་མཁའ་དང་། སོ་སོར་བརྟགས་པ་མ་འགགས་པའི་འགོག་པ་དང་། མྱ་ངན་ལས་འདས་པའི་དབྱིངས་ནི་མ་སྐྱེས་པ་དང་། མ་འགགས་པའོ་ཞེས་གསུངས། བཅོམ་ལྡན་འདས་མུ་སྟེགས་ཅན་རྣམས་ཀྱང་རྒྱུ་ལས་འཇིག་རྟེན་རྣམས་སྐྱེའོ་ཞེས
265b2 མཆིའོ། །བཅོམ་ལྡན་འདས་ཀྱིས་ཀྱང་མ་རིག་པ་དང་། སྲེད་པ་དང་། ལས་དང་། རྣམ་པར་རྟོག་པ་རྣམས་ཀྱིས་རྐྱེན་བྱས་ནས་འཇིག་རྟེན་རྣམས་སྐྱེ་བར་བཀའ་སྩལ་ཏེ། རྒྱུ་དེ་དང་རྐྱེན་འདི་མིང་ལ་བྱེ་བྲག་མཆིས་པར་བས་སོ། །ཕྱི་རོལ་གྱི་དངོས་པོའི་རྒྱུ་དང་རྐྱེན་རྣམས་ཀྱང་དེ་བཞིན་ཏེ།
265b3 དེ་ལྟ་བས་ན་བཅོམ་ལྡན་འདས་ཀྱིས་ཡང་མུ་སྟེགས་ཅན་གྱི་སྨྲ་བ་ཡང་བྱེ་བྲག་མ་མཆིས་པར་འགྱུར་རོ། །མུ་སྟེགས་ཅན་ཡང་འདི་སྐད་དུ་རྡུལ་ཕྲ་མོ་དང་། གཙོ་བོ་དང་། དབང་ཕྱུག་དང་། སྐྱེ་དགུའི་བདག་པོ་ལ་སོགས་པ་རྫས་དགུ་དང་བཅས་པ་མ་སྐྱེས་མ་འགགས་པའོ་ཞེས་མཆི་ལ།
265b4 བཅོམ་ལྡན་འདས་ཀྱིས་ཀྱང་དངོས་པོ་ཐམས་ཅད་མ་སྐྱེས་པ་དང་། མ་འགགས་པས་ཡོད་པ་དང་། མེད་པ་མི་དམིགས་སོ་ཞེས་བཀའ་སྩལ། མུ་སྟེགས་ཅན་རྣམས་ཀྱང་འབྱུང་བ་ཆེན་པོ་བཞི་མི་འཇིགས་པས་རང་གི་མཚན་ཉིད་མི་སྐྱེ་མི་འགག་གོ། །འབྱུང་བ་ཆེན་པོ་བཞི་པོ་རྣམས་ནི་རྟག་པར
265b5 འབྱུང་བ་ཆེན་པོ་ཉིད་དེ་འགྲོ་བ་ཀུན་ལ་ཁྱབ་པར་འཇུག་ཀྱང་རང་བཞིན་ནི་མི་འདོར་རོ་ཞེས་མཆིས་པས་ན། བཅོམ་ལྡན་འདས་ཀྱིས་བཀའ་སྩལ་པ་ཡང་དེ་བཞིན་ཏེ། དེའི་སླད་དུ་བདག་འདི་སྐད་དུ་ངོ་མཚར་ཆེ་བ་མ་ལགས་སོ་ཞེས་མཆིའོ། །བཅོམ་ལྡན་འདས་ངོ་མཚར་ཆེ་ཞིང་མུ་སྟེགས་ཅན
265b6 རྣམས་ལས་ཁྱད་པར་དུ་གྱུར་པའི་བྱེ་བྲག་བཤད་དུ་གསོལ། ཅི་སྟེ་བྱེ་བྲག་མ་མཆིས་ན་ནི་མུ་སྟེགས་ཅན་རྣམས་ཀྱང་སངས་རྒྱས་ལགས་པར་འགྱུར་ཏེ། འདི་ལྟར་སྐྱེ་བ་མ་མཆིས་པ་དང་། འགགས་པ་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་ནི་འཇིག་རྟེན་གྱི་ཁམས་གཅིག
265b7 ཏུ་སངས་རྒྱས་མང་པོ་འབྱུང་བ་ནི་གནས་མེད་དོ་ཞེས་ཀྱང་གསུངས་ལ། འདི་ལྟར་ཇི་སྐད་བཀའ་སྩལ་པ་དང་སྦྱར་ན་ནི་འཇིག་རྟེན་གྱི་ཁམས་གཅིག་ཏུ་སངས་རྒྱས་མང་པོ་འབྱུང་བར་འགྱུར་ཏེ། བྱེ་བྲག་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། ངས
iiif viewer powered by OpenSeadragon
