| e-texts navigator |
| Wylie |
264b1 སྒྲོགས་པར་བྱེད་དེ། ཆོས་ཐམས་ཅད་དང་། ས་ཐམས་ཅད་དང་། མཚན་མ་ཐམས་ཅད་ལ་མི་མཁས་པས་ཚིག་གི་རྣམ་གྲངས་རྟོགས་པས་ཁོང་དུ་མི་ཆུད་དོ། །གལ་ཏེ་ཆོས་ཐམས་ཅད་དང་། ས་ཐམས་ཅད་དང་། མཚན་མ་ཐམས་ཅད་ལ་མཁས་པ་དང་། ཚིག་གི་རྣམ་གྲངས་རྟོགས་པར
264b2 ཁོང་དུ་ཆུད་ཅིང་དངོས་པོའི་དོན་དང་ལྡན་པར་གྱུར་ན། དེ་ཡང་དག་པ་མཚན་མ་མེད་པའི་བདེ་བས་བདག་ཉིད་ཚིམ་པར་བྱེད་ཅིང་སེམས་ཅན་རྣམས་ཀྱང་ཐེག་པ་ཆེན་པོ་མཉམ་པ་ཉིད་ལ་འགོད་པར་བྱེད་དོ། །བློ་གྲོས་ཆེན་པོ་ཐེག་པ་ཆེན་པོ་ཡོངས་སུ་བཟུང་ན། སངས་རྒྱས་དང་། བྱང་ཆུབ་སེམས
264b3 དཔའ་དང་། རང་སངས་རྒྱས་དང་། ཉན་ཐོས་རྣམས་ཡོངས་སུ་བཟུང་བར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་རྣམས་ཡོངས་སུ་བཟུང་བས་ནི་སེམས་ཅན་ཐམས་ཅད་ཡོངས་སུ་བཟུང་བར་འགྱུར་རོ། །སེམས་ཅན་ཐམས་ཅད་ཡོངས་སུ
264b4 བཟུང་བས་ནི་དམ་པའི་ཆོས་ཡོངས་སུ་བཟུང་བར་འགྱུར་རོ། །དམ་པའི་ཆོས་ཡོངས་སུ་བཟུང་བས་ནི་སངས་རྒྱས་ཀྱི་གདུང་རྒྱུན་མི་གཅོད་པ་ཡིན་ནོ། །སངས་རྒྱས་ཀྱི་གདུང་རྒྱུན་མི་གཅོད་པ་ནི་གནས་ཁྱད་པར་ཅན་དུ་འཇུག་པའི་ཤེས་པ་འཐོབ་པར་འགྱུར་རོ། །གནས་ཁྱད་པར་ཅན་དུ་འཇུག
264b5 པའི་ཤེས་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་རྟག་པར་རྫུས་ཏེ་སྐྱེ་ཞིང་ཐེག་པ་ཆེན་པོ་རབ་ཏུ་འཇོག་པས་དབང་བཅུའི་སྟོབས་ཀྱིས་གཟུགས་སྣ་ཚོགས་ཡོངས་སུ་སྟོན་པར་འགྱུར་ཏེ། སེམས་ཅན་གྱི་ཆ་བྱད་དང་། མོས་པ་དང་། ཉོན་མོངས་པའི་མཚན་ཉིད་རྣམས
264b6 རྟོགས་པར་ཁོང་དུ་ཆུད་པས་ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏོ། །དེ་ལ་ཡང་དག་པ་ཇི་ལྟ་བ་བཞིན་དུ་སྟོན་པ་ཞེས་བྱ་བ་ནི་དེ་ཁོ་ན་ཉིད་ལས་གཞན་མ་ཡིན་པ་སྟེ། འོང་བ་དང་། འགྲོ་བ་མེད་པའི་མཚན་ཉིད་དང་། སྤྲོས་པ་ཐམས་ཅད་ཉེ་བར་ཞི་བ་ནི་དེ་ཁོ་ན་ཉིད་ཅེས་བྱའོ། །བློ་གྲོས་ཆེན་པོ
264b7 རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་སྒྲ་ཇི་བཞིན་དུ་གཟུང་ཞིང་མངོན་པར་ཞེན་པར་མི་བྱ་སྟེ། དེ་ཁོ་ན་ཉིད་ནི་མིང་དང་། ཡི་གེ་དང་བྲལ་བའི་ཕྱིར་རོ། །བློ་གྲོས་ཆེན་པོ་ཇི་ལྟར་བླུན་པོ་ཁ་ཅིག་ལ་སོར་མོའི་རྩེ་མོས་དངོས་པོ་བསྟན་ན་བླུན་པོ་དེ་སོར་མོའི་རྩེ་མོ་ལ་ལྟ་བས་ཡང་དག་པའི་དོན་མི་འཐོབ
iiif viewer powered by OpenSeadragon
