| e-texts navigator |
| Wylie |
261b1 བ་ལང་དང་རྟའི་དངོས་པོ་དེ་ཡང་དག་པར་ཡོད་པ་ཡང་མ་ཡིན། མེད་པ་ཡང་མ་ཡིན། ཡང་དེ་རང་གི་མཚན་ཉིད་མེད་པ་ནི་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་ཆོས་ཐམས་ཅད་རང་གི་མཚན་ཉིད་མེད་པ་ཡང་མ་ཡིན་ཏེ། རང་གི་མཚན་ཉིད་ཡོད་ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་བདག་མེད་པ
261b2 ཁོང་དུ་ཆུད་པར་ནུས་པ་མ་ཡིན་ཏེ། འདི་ལྟར་རྣམ་པར་རྟོག་པའི་ཕྱིར་རོ། །དེ་བཞིན་དུ་ཆོས་ཐམས་ཅད་སྟོང་པ་དང་། སྐྱེ་བ་མེད་པ་དང་། རང་བཞིན་མེད་པ་ཡང་དེ་བཞིན་དུ་རིག་པར་བྱའོ། །དེ་བཞིན་དུ་དེ་བཞིན་གཤེགས་པ་ནི་ཕུང་པོ་རྣམས་དང་། ཐ་དད་པ་ཡང་མ་ཡིན། གཅིག་པ་ཡང
261b3 མ་ཡིན་ཏེ། གལ་ཏེ་ཕུང་པོ་རྣམས་དང་ཐ་དད་པ་མ་ཡིན་ན་ནི་མི་རྟག་པ་ཡིན་པར་འགྱུར་རོ། །ཅི་སྟེ་ཐ་དད་ན་ནི་སྦྱོར་བ་རྣམས་དོན་མེད་པར་འགྱུར་རོ། །གལ་ཏེ་གཉིས་སུ་གྱུར་ན་ནི་ཐ་དད་པར་འགྱུར་ཏེ། ཇི་ལྟར་བ་ལང་གི་རྭ་བཞིན་དུ་འདྲ་བའི་ཕྱིར་ཐ་དད་པ་ཡང་མ་ཡིན་ལ། རིང་ཐུང་བྱེ་བྲག
261b4 ཡོད་པའི་ཕྱིར་ཐ་དད་པ་ཡང་མ་ཡིན་ཏེ། ཆོས་ཐམས་ཅད་ཀྱང་དེ་བཞིན་ནོ། །བློ་གྲོས་ཆེན་པོ་ཇི་ལྟར་བ་ལང་གི་རྭ་གཡས་པ་ནི་རྭ་གཡོན་པ་ལས་ཐ་དད་ལ། རྭ་གཡོན་པ་ནི་རྭ་གཡས་པ་ལས་ཐ་དད་པས། དེའི་ཕྱིར་རྭ་གཉིས་ནི་གདོན་མི་ཟ་བར་ཐ་དད་པ་ཡིན་པར་རིག་པར་བྱ་སྟེ།
261b5 དེ་བཞིན་དུ་རིང་པོ་དང་། ཐུང་ངུ་དང་། གཟུགས་སྣ་ཚོགས་རྣམས་ཀྱང་ཕན་ཚུན་ཐ་དད་དོ། །བློ་གྲོས་ཆེན་པོ་དེ་བཞིན་གཤེགས་པ་ཡང་ཕུང་པོ་དང་། ཁམས་དང་། སྐྱེ་མཆེད་རྣམས་དང་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་བཞིན་དུ་དེ་བཞིན་གཤེགས་པ
261b6 ཡང་ཐར་པ་དང་ཐ་དད་པ་ཡང་མ་ཡིན་ཐ་མི་དད་པ་ཡང་མ་ཡིན་པས། འདི་ལྟར་དེ་བཞིན་གཤེགས་པ་ནི་ཐར་པའི་མིང་གིས་བསྟན་ཏོ། །གལ་ཏེ་དེ་བཞིན་གཤེགས་པ་དང་ཐར་པ་ཐ་དད་ན་ནི་གཟུགས་ཀྱི་མཚན་ཉིད་ལས་མངོན་པར་འགྲུབ་པར་འགྱུར་ཏེ། གཟུགས་ཀྱི་མཚན་ཉིད་ལས
261b7 མངོན་པར་འགྲུབ་པའི་ཕྱིར་མི་རྟག་པར་འགྱུར་རོ། །ཅི་སྟེ་ཐ་མི་དད་ན་ནི་རྣལ་འབྱོར་པ་རྣམས་ཀྱིས་ཐོབ་པའི་མཚན་ཉིད་བྱེ་བྲག་མེད་པར་འགྱུར་ཏེ། རྣལ་འབྱོར་པ་རྣམས་ཀྱིས་བྱེ་བྲག་ཀྱང་མཐོང་བས་ན་དེའི་ཕྱིར་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་བཞིན་དུ་ཤེས་པ
iiif viewer powered by OpenSeadragon
