| e-texts navigator |
| Wylie |
261a1 དུ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བགྱིས་པའམ། མ་བགྱིས་པའམ། དངོས་པོའམ། རྒྱུའམ། མཚན་ཉིད་དམ། མཚན་ཉིད་ཀྱི
261a2 གཞི་འམ། བརྗོད་པའམ། བརྗོད་པར་བགྱི་བའམ། བློའམ། རིག་པར་བགྱི་བའམ། དེ་ལྟ་བུ་ལ་སོགས་པའི་ཚིག་རྣམས་དང་། ཐ་དད་པའམ། ཐ་དད་པ་མ་ལགས་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ
261a3 ཡང་དག་པར་རྫོགས་པའི་སངས་རྒྱས་ནི་དེ་ལྟ་བུ་ལ་སོགས་པའི་ཚིག་གི་དངོས་པོ་ཡང་མ་ཡིན། རྒྱུ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། གཉི་ག་ཡང་ཉེས་པར་འགྱུར་བའི་ཕྱིར་རོ། །བློ་གྲོས་ཆེན་པོ་གལ་ཏེ་དེ་བཞིན་གཤེགས་པ་དངོས་པོ་ཡིན་མིན་བྱས་པའམ། མི་རྟག་པར
261a4 འགྱུར་ཏེ། མི་རྟག་པའི་ཕྱིར་དངོས་པོ་ཐམས་ཅད་ཀྱང་དེ་བཞིན་གཤེགས་པར་འགྱུར་བས་ན། དེ་ནི་ང་དང་དེ་བཞིན་གཤེགས་པ་ཐམས་ཅད་ཀྱང་མི་བཞེད་དོ། །ཅི་སྟེ་བྱས་པ་མ་ཡིན་ན་ནི་དམིགས་སུ་མེད་པའི་ཕྱིར་སྦྱོར་བ་རྣམས་དོན་མེད་པར་འགྱུར་ཏེ། རི་བོང་གི་རྭ་དང་། མོ
261a5 ཤམ་གྱི་བུ་ལྟར་ཡོད་པ་མ་ཡིན་པའི་ཕྱིར་རོ། །བློ་གྲོས་ཆེན་པོ་གང་དངོས་པོ་ཡང་མེད། རྒྱུ་ཡང་མེད་པ་ནི་ཡོད་པ་ཡང་མ་ཡིན་མེད་པ་ཡང་མ་ཡིན། གང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ནི་མཐའ་བཞི་ལས་འདས་པའོ། །མཐའ་བཞི་གང་ཡིན་པ་དེ་ནི་འཇིག་རྟེན་གྱི་བརྗོད
261a6 པའོ། །གང་མཐའ་བཞི་ལས་འདས་པ་དེ་ནི་མཐའ་བཞིར་མ་ལྷུང་བའོ། །མ་ལྷུང་བའི་ཕྱིར་མཁས་པ་རྣམས་ཀྱིས་ལེན་པར་བྱེད་དེ། དེ་བཞིན་གཤེགས་པ་ཐམས་ཅད་ཀྱིས་ཚིག་གི་དོན་ཀྱང་དེ་བཞིན་དུ་རིག་པར་བྱའོ། །བློ་གྲོས་ཆེན་པོ་བློ་དང་ལྡན་པ་རྣམས་ཀྱིས་ཇི་ལྟར་ངས་ཆོས་ཐམས་ཅད
261a7 བདག་མེད་པའོ་ཞེས་བཤད་པ་དེའི་དོན་ཀྱང་ཁོང་དུ་ཆུད་པར་བྱའོ། །བདག་མེད་པའི་དངོས་པོ་ནི་བདག་མེད་པ་ཉིད་དེ་ཆོས་ཐམས་ཅད་ནི་རང་གི་དངོས་པོར་ཡོད་ཀྱི་གཞན་གྱི་དངོས་པོར་ནི་མེད་དོ། །ཇི་ལྟར་བ་ལང་དང་རྟ་བཞིན་ཏེ། བློ་གྲོས་ཆེན་པོ་དཔེར་ན་བ་ལང་དང་། རྟའི་དངོས་པོ་མ་ཡིན་པ་ལ
iiif viewer powered by OpenSeadragon
