| e-texts navigator |
| Wylie |
260b1 དེ་དག་སེམས་ཀྱི་རྟོག་ལས་སྐྱེས། །ཐར་པའི་ཐབས་ནི་ཡོད་མ་ཡིན། །འཆིང་དང་བཅིང་བྱ་ལ་རྨོངས་པ། །ཐབས་མཁས་ཡོངས་སུ་སྤངས་པས་ན། །མུ་སྟེགས་ཐར་པ་འདུ་ཤེས་པ། །ཐར་པ་ནམ་ཡང་སྐྱེ་མི་འགྱུར། །ཤེས་པ་མང་པོས་ཐ་དད་འཇུག་།མུ་སྟེགས་ཅན་གྱིས་མཐོང་བའི
260b2 ཚུལ། །དེ་དག་ཐར་པ་ཡོད་མ་ཡིན། །བླུན་ཞིང་གཏི་མུག་རྣམ་རྟོག་ཕྱིར། །མུ་སྟེགས་བླུན་པོས་ཐམས་ཅད་ཀུན། །རྣམ་རྟོག་བྱེད་དང་བྱ་བར་མཐོང་། །ཡོད་མེད་ཕྱོགས་སུ་སྨྲ་བ་རྣམས། །དེ་དག་ལ་ནི་ཐར་པ་མེད། །བྱིས་པ་རྣམ་པར་རྟོག་ལ་མོས། །ཡང་དག་བློ་གྲོས་ཐོས་མི་འགྱུར། །སྨྲ
260b3 བ་སྡུག་བསྔལ་གསུམ་གྱི་གནས། །ཡང་དག་སྡུག་བསྔལ་འཇིག་པའི་རྒྱུ། །ཇི་ལྟར་མེ་ལོང་གཟུགས་བརྙན་དག་།སྣང་བ་ཡོད་པ་མ་ཡིན་ལྟར། །རྣམ་རྟོག་སེམས་ཀྱི་མེ་ལོང་ལ། །བྱིས་པ་དག་གིས་གཉིས་ཡོད་མཐོང་། །སེམས་དང་དམིགས་པ་མ་ཤེས་པ། །རྣམ་པར་རྟོག་པ་གཉིས
260b4 སྐྱེ་སྟེ། །སེམས་དང་ཡུལ་ནི་ཡོངས་ཤེས་ན། །རྣམ་པར་རྟོག་པ་སྐྱེ་མི་འགྱུར། །སེམས་ནི་སྣ་ཚོགས་འགྱུར་བ་སྟེ། །མཚན་ཉིད་མཚན་གཞི་ཡོངས་སྤངས་པས། །བྱ་བ་སྣང་ཡང་སྣང་བ་མེད། །ཇི་ལྟར་བྱིས་པས་རྣམ་བརྟགས་བཞིན། །སྲིད་གསུམ་རྣམ་པར་རྟོག་ཙམ་པས། །ཕྱི་རོལ་གྱི
260b5 ནི་དོན་མེད་དེ། །རྣམ་པར་རྟོག་པ་སྣ་ཚོགས་སྣང་། །བྱིས་པ་དག་གིས་མི་རྟོགས་སོ། །མདོ་དང་མདོ་ལས་རྣམ་རྟོག་བཤད། །ནམ་ཡང་མིང་ལས་འདའ་མི་འགྱུར། །བརྗོད་པ་དག་ནི་མ་གཏོགས་པར། །བརྗོད་པར་བྱ་བ་ཅི་ཡང་མེད།། །།འཕགས་པ་ལང་ཀར་གཤེགས་པ
260b6 རིན་པོ་ཆེའི་མདོ་ལས། བམ་པོ་བདུན་པ། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་པ་ཉིད་བཤད་དུ་གསོལ། དེ་ནས་བདག་དང་བྱང་ཆུབ་སེམས་དཔའ་སེམས་དཔའ
260b7 ཆེན་པོ་གཞན་རྣམས་དེ་བཞིན་གཤེགས་པའི་རང་བཞིན་ལ་མཁས་ཤིང་། བདག་དང་གཞན་རྣམས་ཁོང་དུ་ཆུད་པར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཁྱོད་ཇི་ལྟར་འདོད་པ་བཞིན་དུ་དྲིས་ཤིག་དང་། ངས་ཇི་ལྟར་ཁྱོད་ཀྱིས་དྲིས་པ་དེ་བཞིན
iiif viewer powered by OpenSeadragon
