| e-texts navigator |
| Wylie |
255a1 ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །ང་ཡི་ཚུལ་ནི་རྣམ་གཉིས་ཏེ། །གྲུབ་པའི་མཐའ་དང་བསྟན་པའོ། །བྱིས་པ་རྣམས་ལ་བརྗོད་པ་བཤད། །རྣལ་འབྱོར་པ་ལ་གྲུབ་མཐའོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས
255a2 བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་དུས་གཅིག་གི་ཚེ་འདི་སྐད་དུ་འཇིག་རྟེན་རྒྱང་པན་པའི་སྨྲ་བ་དང་། སྤོབས་པ་ཅན་སྣ་ཚོགས་ལ་བསླབ་ཅིང་བསྙེན་པར་མི་བྱའོ། །དེ་ལ་སློབ་ཅིང་བསྙེན་ན་ཟང་ཟིང་སྡུད་དེ་ཆོས
255a3 སྡུད་པ་མ་ཡིན་ནོ། །ཞེས་གསུངས་ན། བཅོམ་ལྡན་འདས་ཅིའི་སླད་དུ་དེ་སྐད་ཅེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་འཇིག་རྟེན་རྒྱང་པན་པ་རྣམས་ནི་སྣ་ཚོགས་པའི་ཚིག་གི་ཚོགས་དང་། རྒྱུ་དང་རྐྱེན་དང་། དཔེ་རྣམས་སྡུད་ཅིང་འགོད
255a4 པ་དག་གིས་བྱིས་པ་སོ་སོའི་སྐྱེ་བོ་རྣམས་སླུ་ཞིང་རྣམ་པར་རྨོངས་པར་བྱེད་པས་ཡང་དག་པ་དེ་ཁོ་ནའི་རང་གི་ཚུལ་ལ་འཇུག་པར་མི་བྱེད་ལ་ཆོས་ཐམས་ཅད་ཁོང་དུ་མི་ཆུད་དེ། ཕྱིན་ཅི་ལོག་ཏུ་རྣམ་པར་རྟོག་པས་མཐའ་གཉིས་སུ་ལྷུང་བ་དང་། བྱིས་པ་དག་ཤིན་ཏུ་རྨོངས་པར་བྱེད་ཅིང
255a5 བདག་ཉིད་ཀྱིས་ཡང་རྣམ་པར་འཇིག་པས་འགྲོ་བ་རྣམས་སུ་མཚམས་སྦྱོར་གྱི། རྣམ་པར་གྲོལ་ན་མི་འཐོབ་སྟེ། རང་གི་སེམས་སྣང་བ་ཙམ་དུ་ཁོང་དུ་མ་ཆུད་ཅིང་ཕྱི་རོལ་གྱི་དངོས་པོའི་རང་བཞིན་མ་སྤངས་པ་དང་། རྣམ་པར་རྟོག་པ་ལ་མངོན་པར་ཞེན་པས་སོ། །དེ་ལྟ་བས
255a6 ན་འཇིག་རྟེན་རྒྱང་པན་པ་སྤོབས་པ་སྣ་ཚོགས་ཅན་ནི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། འཁྲུགས་པ་ལས་ཡོངས་སུ་མི་འགྲོལ་ཏེ། ཡོངས་སུ་སླུ་ཞིང་ཤིན་ཏུ་རྨོངས་པར་བྱེད་པ་ཡིན་ནོ། །བློ་གྲོས
255a7 ཆེན་པོ་བརྒྱ་བྱིན་ལྷའི་དབང་པོ་བསྟན་བཅོས་མང་པོ་ལ་མཁས་པས་བདག་ཉིད་ཀྱིས་སྒྲའི་བསྟན་བཅོས་བྱས་པ་ལས་འཇིག་རྟེན་རྒྱང་པན་པ་དེའི་སློབ་མ་ཀླུའི་གཟུགས་དང་ཆ་བྱད་འཛིན་པ་ཞིག་བརྒྱ་བྱིན་ལྷའི་དབང་པོའི་གནས་སུ་སོང་ནས། འདི་སྐད་དུ་དམ་བཅས་སོ། །བདག་ཁྱོད་དང
iiif viewer powered by OpenSeadragon
