| e-texts navigator |
| Wylie |
254b1 ནོ། །བཅོམ་ལྡན་འདས་ཅི་ནས་ཀྱང་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཚུལ་རྣམ་པ་གཉིས་ལ་མཁས་པས་མ་འོངས་པའི་དུས་ན་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་རྣམས་ཀྱིས་གླགས་རྙེད་པར་མི་འགྱུར་བའི
254b2 བཤད་པའི་ཚུལ་དང་། གྲུབ་པའི་ཚུལ་བདག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ
254b3 གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །དུས་གསུམ་གྱི་དེ་བཞིན་གཤེགས་པ་རྣམས་ཀྱི་ཆོས་ཀྱི་ཚུལ་རྣམ་པ་གཉིས་ཡོད་དེ། འདི་ལྟ་སྟེ། བསྟན་པའི་ཚུལ་དང་། རང་གི་གྲུབ
254b4 པའི་མཐའི་ཚུལ་ལོ། །དེ་ལ་བསྟན་པའི་ཚུལ་ནི་འདི་ལྟ་སྟེ། སེམས་ཅན་རྣམས་ཀྱི་སེམས་ཀྱི་མོས་པ་ཇི་ལྟ་བ་བཞིན་དུ་ཚོགས་སྣ་ཚོགས་ཀྱི་མདོ་སྡེ་བཤད་པ་སྟེ། དེ་ནི་བསྟན་པའི་ཚུལ་ཞེས་བྱའོ། །དེ་ལ་རང་གི་གྲུབ་པའི་མཐའི་ཚུལ་ནི་འདི་ལྟ་སྟེ། རྣལ་འབྱོར་པ་རྣམས་རང་གི
254b5 སེམས་སྣང་བའི་རྣམ་པར་རྟོག་པ་སྣ་ཚོགས་ཡོངས་སུ་སྤངས་ནས། འདི་ལྟ་སྟེ། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པའི་ཕྱོགས་སུ་མ་ལྷུང་བ། སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་ཐམས་ཅད་ལས་ཤིན་ཏུ་འདས་པ།
254b6 སོ་སོ་རང་གིས་རིག་པ་འཕགས་པའི་སྤྱོད་ཡུལ། རྒྱུ་དང་། རིགས་པ་དང་། ལྟ་བའི་མཚན་ཉིད་དང་བྲལ་བ། མུ་སྟེགས་ཅན་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་མཐའ་གཉིས་སུ་ལྷུང་བ་ཐམས་ཅད་ཀྱིས་མི་ཤེས་པ་དེ་ནི་ངས་རང་གི་གྲུབ་པའི་མཐའི་ཚུལ་གྱི་ཆོས་སོ
254b7 ཞེས་བཤད་དོ། །བློ་གྲོས་ཆེན་པོ་དེ་ནི་རང་གི་གྲུབ་པའི་མཐའི་ཚུལ་དང་། བསྟན་པའི་ཚུལ་གྱི་མཚན་ཉིད་ཅེས་བྱ་སྟེ། དེ་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བསྒྲུབ་ཅིང་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད
iiif viewer powered by OpenSeadragon
