| e-texts navigator |
| Wylie |
250b1 པར་ལྷུང་བའི་བློ་ཅན་དག་གིས་བཅིངས་པ་དང་གྲོལ་བ་ཡོད་པར་ཤེས་སོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་ཐམས་ཅད་ལ་ཡོད་པ་དང་། མེད་པ་དང་། སེམས་ཅན་མི་དམིགས་པའི་ཕྱིར་རོ། །གཞན་ཡང་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཀྱི་མཚམས
250b2 སྦྱོར་བ་ནི་རྣམ་པ་གསུམ་ཡོད་དེ། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་ཡིན་ཏེ། མ་འོངས་པ་ལ་སྲེད་པ་ཡང་སྲིད་པ་ལ་དགའ་བའི་འདོད་ཆགས་དང་ལྡན་པ་དེས་མཚམས་སྦྱོར་བའི་ཕྱིར་སྲིད་པའི་འགྲོ་བ་རྣམས་སུ་མཚམས་སྦྱོར་བར་འགྱུར་རོ། །དེའི
250b3 མཚམས་སྦྱོར་བ་ནི་འགྲོ་བ་ལྔ་པོ་རྣམས་སུ་མཚམས་སྦྱོར་བ་ཡིན་ཏེ། བློ་གྲོས་ཆེན་པོ་མཚམས་སྦྱོར་བ་བཅད་པ་ལ་ནི་མཚམས་སྦྱོར་བ་དང་། མཚམས་སྦྱོར་བ་མ་ཡིན་པའི་མཚན་ཉིད་གང་ཡང་མེད་དོ། །གཞན་ཡང་བློ་གྲོས་ཆེན་པོ་གསུམ་འདུས་པའི་རྐྱེན་དང་། བྱ་བའི
250b4 སྦྱོར་བ་ལ་མངོན་པར་ཞེན་པ་རྣམ་པར་ཤེས་པ་རྣམས་ཀྱི་མཚམས་སྦྱོར་བ་བར་ཆད་མེད་པར་འབྱུང་ངོ་། །སྦྱོར་བ་ལ་མངོན་པར་ཞེན་པས་སྲིད་པའི་མཚམས་སྦྱོར་བར་འགྱུར་ཏེ། གསུམ་འདུས་པའི་རྐྱེན་གྱིས་རྣམ་པར་ཤེས་པ་སྤངས་ཤིང་རྣམ་པར་ཐར་པ་གསུམ་མཐོང་ན།
250b5 མཚམས་སྦྱོར་བ་ཐམས་ཅད་མི་འབྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཡང་དག་མ་ཡིན་རྣམ་རྟོག་ནི། །མཚམས་སྦྱོར་མཚན་ཉིད་ཅེས་བྱ་སྟེ། །དེ་དག་ཡང་དག་ཡོངས་ཤེས་ན།
250b6 མཚམས་སྦྱོར་དྲ་བ་ཆོད་པར་འགྱུར། །དངོས་པོ་རྣམས་ནི་མ་ཤེས་པས། །སྒྲ་ཡི་རྗེས་སུ་འཛིན་པར་བྱེད། །ཇི་ལྟར་དར་གྱི་སྲིན་བུ་བཞིན། །མཚམས་སྦྱོར་དྲ་བས་རང་ལ་འཆིང་། །བྱིས་པ་རྣམ་རྟོག་རབ་བཅིངས་པས། །མཚམས་སྦྱོར་སོ་སོར
250b7 རྟོག་མི་བྱེད། ། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་དྲུག་པ། ཡང་བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཇི་སྐད་དུ་རྣམ་པར་རྟོག་པ་གང་དང་གང་གིས
iiif viewer powered by OpenSeadragon
