| e-texts navigator |
| Wylie |
248b1 ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ལས་རྣམས་སོགས་པ་རྣམས་ཤེས་ཏེ། །མི་སོགས་དེ་ནི་ཡེ་ཤེས་སོ། །ཆོས་རྣམས་སོ་སོར་རབ་བརྟགས་ཏེ། །སྣང་བ་མེད་པར་རྟོགས་པ་དང་། །དབང་དང་སྟོབས་ཀྱང་ཐོབ་གྱུར་ན། །དེ་ནི་ཤེས
248b2 རབ་ཅེས་བྱའོ། །ཡུལ་དང་འབྲེལ་བ་སེམས་ཡིན་ཏེ། །རྣམ་རྟོགས་རིག་པ་ཡེ་ཤེས་ཡིན། །སྣང་བ་མེད་དང་ཁྱད་པར་ལས། །ཤེས་རབ་དག་ནི་སྐྱེ་བར་འགྱུར། །སེམས་དང་ཡིད་དང་རྣམ་ཤེས་དང་། །རྟོག་པའི་འདུ་ཤེས་སྤངས་པ་དང་། །རྣམ་རྟོག་མེད
248b3 པའི་ཆོས་ཐོབ་པ། །རྒྱལ་སྲས་ཡིན་ཏེ་ཉན་ཐོས་མིན། །རབ་ཞི་ཁྱད་པར་བཟོད་པ་དང་། །དེ་བཞིན་གཤེགས་པ་རྣམ་དག་གི། །ཡེ་ཤེས་ལས་ནི་དོན་དགེ་སྐྱེ། །ཀུན་དུ་སྤྱོད་པ་རྣམ་པར་སྤངས། །དེ་ཡི་ཡེ་ཤེས་རྣམ་གསུམ་སྟེ། །འཕགས་པས་ཡང་དག་རབ
248b4 ཏུ་ཕྱེ། །མཚན་ཉིད་དེ་ལ་རྟོག་པ་ནི། །དངོས་པོ་རྣམས་དང་འབྲེལ་པའོ། །ཐེག་པ་གཉིས་ནི་ལྡན་པ་མིན། །ཡེ་ཤེས་སྣང་བ་རྣམ་པར་སྤངས། །དངོས་པོ་ཡོད་པར་ཞེན་པ་ནི། །ཉན་ཐོས་རྣམས་ལས་བྱུང་བ་ཡིན། །སེམས་ཙམ་ལས་ནི་འདས་པ་ན། །བདེ་གཤེགས
248b5 ཡེ་ཤེས་དྲི་མ་མེད། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ལ་རྣམ་པར་འགྱུར་བར་སྨྲ་བ་རྣམ་པ་དགུ་ཡོད་པས་མུ་སྟེགས་ཅན་རྣམས་ཀྱི་འགྱུར་བར་ལྟ་བ་སྐྱེའོ། །འདི་ལྟ་སྟེ། དབྱིབས་འགྱུར་བ་དང་། མཚན་ཉིད་འགྱུར་བ་དང་། རྒྱུ་འགྱུར་བ་དང་།
248b6 རིགས་འགྱུར་བ་དང་། ལྟ་བ་འགྱུར་བ་དང་། ངོ་བོ་ཉིད་འགྱུར་བ་དང་། རྐྱེན་སྣང་བར་བྱེད་པ་འགྱུར་བ་དང་། བྱ་བ་སྣང་བར་བྱེད་པ་འགྱུར་བ་དང་། དངོས་པོ་འགྱུར་བའོ། །བློ་གྲོས་ཆེན་པོ་འདི་ནི་རྣམ་པར་འགྱུར་བའི་ལྟ་བ་རྣམ་པ་དགུ་ཞེས་བྱ་སྟེ། དེའི་རྒྱུས་མུ་སྟེགས
248b7 ཅན་ཐམས་ཅད་ཡོད་པ་དང་མེད་པ་ལས་སྐྱེ་བའི་རྣམ་པར་འགྱུར་བ་སྨྲ་བར་འགྱུར་བ་ཡིན་ནོ། །དེ་ལ་དབྱིབས་འགྱུར་བ་གང་ཞེ་ན། འདི་ལྟར་དབྱིབས་གཞན་དུ་འགྱུར་བར་མཐོང་བ་སྟེ། དཔེར་ན་གསེར་ལས་སྣོད་དང་། རྒྱན་སྣ་ཚོགས་སུ་བྱས་པས་དབྱིབས
iiif viewer powered by OpenSeadragon
