| e-texts navigator |
| Wylie |
247b1 སེམས་དང་རང་བཞིན་ལ་སོགས་པ་ལ་སྒྲ་ཇི་བཞིན་དུ་མངོན་པར་ཞེན་པ་ལ་བརྟེན་ནས་མངོན་པར་ཞེན་པ་ནི་སྒྲོ་འདོགས་པ་དང་། སྐུར་པའི་མཐར་ལྷུང་བ་ཡིན་ནོ། །ལྟ་བ་རྣམ་པ་གཞན་དུ་གནས་ལ་རྣམ་པར་གཞག་པ་གཞན་དུ་རྣམ་པར་རྟོག་པ་ནི་སྒྱུ་མ་ལྟ་བུའི་རྣམ་པར
247b2 རྟོག་པ་སྣ་ཚོགས་སུ་སྣང་སྟེ། ཇི་ལྟར་སྒྱུ་མ་སྣ་ཚོགས་སུ་སྣང་བ་དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་རྣམ་པ་གཞན་དུ་སོ་སོར་རྣམ་པར་རྟོག་གི་འཕགས་པ་རྣམས་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར། ཚིགས་སུ་བཅད་པ་འདི་དག
247b3 གསུངས་སོ། །སྒྲ་བཞིན་རྣམ་རྟོག་དེ་དག་གིས། །ཆོས་རྣམས་གང་དག་རྣམ་གཞག་པ། །དེ་ལྟར་དེ་དག་སྒྲོ་བཏགས་པས། །ཤི་འཕོས་དམྱལ་བའི་གནས་སུ་ལྷུང་། །ཕུང་པོ་རྣམས་ལ་བདག་མེད་དེ། །ཕུང་པོ་ཉིད་ཀྱང་བདག་མ་ཡིན། །དེ་དག་བཏགས་པ་བཞིན་དུ
247b4 མེད། །མེད་པ་ཉིད་ཀྱང་མ་ཡིན་ནོ། །དངོས་པོ་ཐམས་ཅད་ཡོད་གྱུར་ལ། །ཇི་ལྟར་བྱིས་པས་བརྟགས་པ་ལྟར། །དེ་སྟེ་མཐོང་བཞིན་དེ་ཡོད་ན། །ཐམས་ཅད་བདེན་པ་མཐོང་བར་འགྱུར། །ཆོས་རྣམས་དངོས་པོ་མེད་ན་ནི། །རྣམ་དག་མ་དག་ཡོད་མ་ཡིན། །ཇི་ལྟར་མཐོང་བ
247b5 བཞིན་མིན་ཏེ། །དེ་དག་མེད་པའང་མ་ཡིན་ནོ། །གཞན་ཡང་བློ་གྲོས་ཆེན་པོ་ཡེ་ཤེས་དང་རྣམ་པར་ཤེས་པའི་མཚན་ཉིད་བཤད་པར་བྱ་སྟེ། གལ་ཏེ་ཡེ་ཤེས་དང་རྣམ་པར་ཤེས་པའི་མཚན་ཉིད་རབ་ཏུ་དབྱེ་བ་ལ་མཁས་པར་གྱུར་ན། ཁྱོད་དང་བྱང་ཆུབ་སེམས་དཔའ
247b6 རྣམས་ཡེ་ཤེས་དང་། རྣམ་པར་ཤེས་པའི་མཚན་ཉིད་རྟོགས་པར་ཁོང་དུ་ཆུད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་བློ་གྲོས་ཆེན་པོ་ཡེ་ཤེས་དེ་ནི་རྣམ་པ་གསུམ་ཡོད་དེ། འདི་ལྟ་སྟེ། འཇིག
247b7 རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པའི་མཆོག་གོ། །དེ་ལ་འཇིག་རྟེན་པའི་ཡེ་ཤེས་གང་ཞེ་ན། འདི་ལྟ་སྟེ། མུ་སྟེགས་ཅན་དང་། བྱིས་པ་སོ་སོའི་སྐྱེ་བོ་རྣམས་ཡོད་པ་དང་། མེད་པ་ལ་མངོན་པར་ཞེན་པའོ། །འཇིག་རྟེན་ལས
iiif viewer powered by OpenSeadragon
