| e-texts navigator |
| Wylie |
243b1 འཇིག་པར་བྱེད་པ་ཡིན། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གང་དེས་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་ཁས་བླངས་ལ་སླད་ཀྱིས་ནི་ཁས་མི་ལེན་པ་དག་ལགས་སོ། །བཅོམ་ལྡན་འདས་ཀྱིས་བཀའ་སྩལ
243b2 པ། བློ་གྲོས་ཆེན་པོ་ལེགས་སོ་ལེགས་སོ། །གང་ཁྱོད་ཀྱིས་དེ་ལྟར་གོ་བ་ནི་ལེགས་སོ། །བློ་གྲོས་ཆེན་པོ་དེ་ནི་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་དངོས་པོ་མེད་པ་འབའ་ཞིག་རྣམ་པར་འཇིག་པར་བྱེད་པ་མ་ཡིན་གྱི་ཉན་ཐོས་དང་རང་སངས་རྒྱས
243b3 རྣམས་ཀྱང་རྣམ་པར་འཇིག་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། ནང་དང་ཕྱི་རོལ་མི་དམིགས་པའི་ཕྱིར་དང་ཉོན་མོངས་པ་རྣམས་ཐ་དད་པ་དང་། ཐ་དད་པ་མ་ཡིན་པའི་ཕྱིར་རོ། །བློ་གྲོས་ཆེན་པོ་འདོད་ཆགས་དང་། ཞེ་སྡང་དང་། གཏི་མུག་རྣམས་ནི
243b4 ནང་དང་ཕྱི་རོལ་ན་ཡང་མི་དམིགས་ཏེ། འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་ལུས་མེད་པའི་ཕྱིར་དང་། ཁས་ལེན་པ་མེད་པའི་ཕྱིར་རོ། །སངས་རྒྱས་དང་། ཉན་ཐོས་དང་། རང་སངས་རྒྱས་རྣམས་ནི་རྣམ་པར་འཇིག་པར་བྱེད་པ་མ་ཡིན་ཏེ།
243b5 སངས་རྒྱས་དང་། ཉན་ཐོས་དང་། རང་སངས་རྒྱས་དེ་དག་ནི་རང་བཞིན་གྱིས་རྣམ་པར་གྲོལ་བའི་ཕྱིར་དང་། འཆིང་བ་དང་བཅིང་བའི་རྒྱུ་དངོས་པོ་མེད་པའི་ཕྱིར་རོ། །བློ་གྲོས་ཆེན་པོ་བཅིང་བར་བྱ་བ་ཡོད་ན་བཅིང་བ་ཡང་ཡོད་དེ། བཅིང་བའི་རྒྱུ་ཡིན་པའི་ཕྱིར་རོ། །
243b6 བློ་གྲོས་ཆེན་པོ་དེ་སྐད་དུ་རྣམ་པར་འཇིག་པར་བྱེད་པ་སྨྲ་བ་འདི་ཡང་མེད་པའི་མཚན་ཉིད་ཅེས་བྱའོ། །བློ་གྲོས་ཆེན་པོ་ངས་དེ་ལ་དགོངས་ནས་གང་ཟག་ཏུ་ལྟ་བ་རི་རབ་ཙམ་ཡོད་པ་ནི་བླའི། མངོན་པའི་ང་རྒྱལ་ཅན་གྱི་སྟོང་པ་ཉིད་དུ་ལྟ་བ་ནི་མ་ཡིན་ནོ་ཞེས་བཤད་དེ།
243b7 བློ་གྲོས་ཆེན་པོ་མེད་པའི་མངོན་པའི་ང་རྒྱལ་ཅན་ནི་རྣམ་པར་འཇིག་པར་བྱེད་པ་ཡིན་ནོ། །རང་དང་སྤྱིའི་མཚན་ཉིད་དུ་ལྟུང་བའི་བསམ་པ་ཅན་དག་རང་གི་སེམས་སྣང་བ་ཙམ་དུ་མི་ཤེས་པས་ཕྱི་རོལ་གྱི་དངོས་པོ་རྣམས་མི་རྟག་ཅིང་སྐད་ཅིག་མ་གཅིག་ནས་གཅིག་ཏུ་རྣམ་པར
iiif viewer powered by OpenSeadragon
