| e-texts navigator |
| Wylie |
241a1 བྱས་པ་རྣམས་མངོན་པར་རྟོགས་པ་མི་འཐོབ་པར་གཅིག་ཏུ་ངེས་པ་ཡང་མེད་དེ། རང་གི་སེམས་སྣང་བ་ཙམ་དུ་ཁོང་དུ་ཆུད་པ་དང་། ལུས་དང་ལོངས་སྤྱོད་དུ་རྣམ་པར་རྟོག་པ་དང་། བདག་དང་བདག་གིར་འཛིན་པ་དང་བྲལ་བ་དང་། གལ་ཏེ་བརྒྱ
241a2 ལམ་ན་དགེ་བའི་བཤེས་གཉེན་དང་ཕྲད་ནས་འགྲོ་བ་གཞན་དུ་མཚམས་སྦྱོར་བའི་རྣམ་པར་རྟོག་པ་ལས་གྲོལ་བར་འགྱུར་བ་ནི་མ་གཏོགས་སོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འདོད་པའི་སྲིད
241a3 པ་མ་ཞེས་བྱ། །མ་རིག་པ་ནི་ཕ་ཡིན་ནོ། །ཡུལ་རིག་རྣམ་ཤེས་སངས་རྒྱས་ཏེ། །བག་ལ་ཉལ་ནི་དགྲ་བཅོམ་པ། །ཕུང་པོ་འདུས་པ་དགེ་འདུན་ཡིན། །མཚམས་མེད་རིམ་གྱིས་བཅད་པས་ན། །དེ་ན་མཚམས་མེད་ལྔ་ཡིན་ཏེ། །མནར་མེད་དམྱལ་བར་ལྟུང་མི
241a4 འགྱུར། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་རྣམས་ཀྱི་སངས་རྒྱས་པ་ཉིད་བདག་ལ་བཀའ་སྩལ་དུ་གསོལ། །བཅོམ་ལྡན་འདས་ཇི་ལྟར་ན་སངས་རྒྱས་རྣམས་ཀྱི་སངས་རྒྱས
241a5 པ་ཉིད་ལགས། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་གང་ཟག་དང་ཆོས་ལ་བདག་མེད་པར་རྟོགས་པ་དང་། སྒྲིབ་པ་གཉིས་ཡོངས་སུ་ཤེས་ཤིང་ཁོང་དུ་ཆུད་པ་དང་། ཤི་འཕོ་རྣམ་པ་གཉིས་དང་བྲལ་བ་དང་། ཉོན་མོངས་པ་རྣམ་པ་གཉི་ག
241a6 སྤངས་པ་དེ་ནི་སངས་རྒྱས་རྣམས་ཀྱི་སངས་རྒྱས་པ་ཉིད་ཅེས་བྱའོ། །བློ་གྲོས་ཆེན་པོ་ཉན་ཐོས་དང་། རང་སངས་རྒྱས་རྣམས་ཀྱིས་ཆོས་དེ་དག་ཉིད་ཁོང་དུ་ཆུད་ན་དེ་ཡང་སངས་རྒྱས་པ་ཉིད་ཅེས་བྱ་སྟེ། དེས་ན་དེའི་ཕྱིར་ངས་ཐེག་པ་གཅིག་ཏུ་བཤད་དོ། །དེ་ནས་བཅོམ་ལྡན
241a7 འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །བདག་མེད་རྣམ་གཉིས་མཁས་པ་དང་། །སྒྲིབ་གཉིས་ཉོན་མོངས་རབ་སྤངས་དང་། །ཤི་འཕོ་གཉིས་དང་གཏན་བྲལ་བ། །དེ་ནི་སངས་རྒྱས་ཉིད་ཅེས་བྱ། །དེ་ནས་ཡང་བྱང་ཆུབ་སེམས་དཔའ་བློ
iiif viewer powered by OpenSeadragon
