| e-texts navigator |
| Wylie |
240b1 པ་དང་། གཞན་ཡང་ཏིང་ངེ་འཛིན་གྱི་སྒོ་དང་། མཚན་མ་དང་། སྟོབས་དང་། དབང་དང་། མངོན་པར་ཤེས་པ་དཔག་ཏུ་མེད་པ་འཐོབ་སྟེ། མེ་ཏོག་ལྟར་རྒྱས་ཤིང་ཡིད་བཞིན་དུ་མགྱོགས་པ་དང་། སྒྱུ་མ་དང་། རྨི་ལམ་དང་། ཆུ་ཟླ་དང་། གཟུགས་བརྙན་ལྟ་བུ་འབྱུང་བ
240b2 ལས་གྱུར་པ་མ་ཡིན་ཡང་འབྱུང་བ་ལས་གྱུར་པ་དང་འདྲ་བ། གཟུགས་རྣམ་པ་སྣ་ཚོགས་ཐམས་ཅད་ཀྱིས་ཡན་ལག་ཕུན་སུམ་ཚོགས་པར་བརྒྱན་པ། སངས་རྒྱས་ཀྱི་ཞིང་ཐམས་ཅད་དུ་འཁོར་གྱི་དཀྱིལ་འཁོར་གྱི་རྗེས་སུ་འཇུག་པ། ཆོས་ཀྱི་ངོ་བོ་ཉིད་རྟོགས་པར་ཁོང་དུ་ཆུད་པའི
240b3 ཕྱིར་དེ་ནི་ཆོས་ཀྱི་ངོ་བོ་ཉིད་རྟོགས་པ་ལས་བྱུང་བའི་ལུས་ཞེས་བྱའོ། །བློ་གྲོས་ཆེན་པོ་དེ་ལ་རིས་སུ་ལྷན་ཅིག་སྐྱེས་པ་མངོན་པར་འདུ་བྱ་བ་མེད་པའི་ཡིད་ལས་བྱུང་བའི་ལུས་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་རྟོགས་ཤིང་རང་གིས་ཐོབ་པའི་བདེ་བའི
240b4 མཚན་ཉིད་ལ་དམིགས་པ་དེ་ནི་རིས་སུ་ལྷན་ཅིག་སྐྱེས་པ་མངོན་པར་འདུ་བྱ་བ་མེད་པའི་ཡིད་ལས་བྱུང་བའི་ལུས་ཞེས་བྱ་སྟེ། བློ་གྲོས་ཆེན་པོ་ལུས་གསུམ་པོ་དེ་དག་གི་མཚན་ཉིད་རབ་ཏུ་དབྱེ་བ་རྟོགས་པ་འདི་ལ་རབ་ཏུ་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་དོན
240b5 དེ་ཉིད་ཡང་དག་པར་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ང་ཡིས་ཐེག་པ་ཐེག་ཆེན་མིན། །བཤད་པ་མེད་ཅིང་ཡི་གེ་མེད། །བདེན་པ་མ་ཡིན་རྣམ་གྲོལ་མིན། །སྤྱོད་ཡུལ་མེད་པའང་མ་ཡིན་ཏེ། །འོན་ཀྱང་ཐེག་ཆེན་ཐེག་པ་ནི། །ཏིང་ངེ
240b6 འཛིན་ལ་དབང་བྱེད་ཅིང་། །ཡིད་ལས་བྱུང་ལུས་སྣ་ཚོགས་ལ། །དབང་གི་མེ་ཏོག་དག་གིས་བརྒྱན། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་སྐད་དུ་རིགས་ཀྱི་བུའམ། རིགས
240b7 ཀྱི་བུ་མོ་གང་ལ་ལ་ཞིག་གིས་མཚམས་མེད་པ་ལྔའི་ལས་སྤྱོད་ཀྱང་མནར་མེད་པའི་དམྱལ་བར་ལྷུང་བར་མི་འགྱུར་བའི་ཕྱིར་དང་། སྤྲོ་བ་རབ་ཏུ་བསྐྱེད་པའི་ཕྱིར་བྱིན་གྱི་རླབས་ཀྱིས་སྤྲུལ་པ་དག་མངོན་པར་རྟོགས་པར་རབ་ཏུ་སྟོན་ཏོ། །མཚམས་མེད་པའི་དངོས་པོ
iiif viewer powered by OpenSeadragon
