| e-texts navigator |
| Wylie |
239a1 བཀའ་སྩལ་ཏོ། །བློ་གྲོས་ཆེན་པོ་དེ་ལ་འཕགས་པ་སྔ་མ་རྣམས་ཀྱིས་ཁོང་དུ་ཆུད་ནས་གཅིག་ནས་གཅིག་ཏུ་བརྒྱུད་དེ། ཀུན་བརྟགས་པ་དངོས་པོ་མེད་པར་བསྟན་པ་ལ་བརྟེན་ནས། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་གཅིག་པུ་དབེན་པར་སོང་ནས།
239a2 རང་གི་བློས་རྣམ་པ་དཔྱོད་པ། གཞན་གྱི་དྲིང་ལ་མི་འཇོག་ཅིང་ལྟ་བ་དང་། རྣམ་པར་རྟོག་པ་སྤངས་ཏེ། གོང་ནས་གོང་དུ་ཁྱད་པར་ཅན་དུ་གྱུར་ནས། དེ་བཞིན་གཤེགས་པའི་ས་ལ་རབ་ཏུ་འཇུག་པ་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་མཚན་ཉིད་ཅེས་བྱའོ། །དེ་ལ་བློ་གྲོས
239a3 ཆེན་པོ་ཐེག་པ་གཅིག་གི་མཚན་ཉིད་གང་ཞེ་ན། འདི་ལྟ་སྟེ། ཐེག་པ་གཅིག་གི་ལམ་རིག་པ་ནི་ངས་ཐེག་པ་གཅིག་ཅེས་བཤད་དོ། །ཐེག་པ་གཅིག་གི་ལམ་ཁོང་དུ་ཆུད་པ་གང་ཞེ་ན། འདི་ལྟ་སྟེ། གཟུང་བ་དང་། འཛིན་པའི་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་གྱི་གནས
239a4 ལ་རྣམ་པར་རྟོག་པ་མི་སྐྱེ་བ་ནི་ཐེག་པ་གཅིག་ཁོང་དུ་ཆུད་པ་ཞེས་བྱའོ། །བློ་གྲོས་ཆེན་པོ་ཐེག་པ་གཅིག་ཁོང་དུ་ཆུད་པ་འདི་ནི་དེ་བཞིན་གཤེགས་པ་མ་གཏོགས་པར་གཞན་མུ་སྟེགས་ཅན་དང་། ཉན་ཐོས་དང་། རང་སངས་རྒྱས་དང་། ཚངས་པ་ལ་སོགས་པས་ཐོབ་པ་མ་ཡིན་ནོ། །
239a5 དེའི་ཕྱིར་ཐེག་པ་གཅིག་ཅེས་བྱའོ། །བཅོམ་ལྡན་འདས་ལ་བློ་གྲོས་ཆེན་པོས་གསོལ་པ། བཅོམ་ལྡན་འདས་ཀྱིས་ཅིའི་སླད་དུ་ཐེག་པ་གསུམ་དུ་བཀའ་སྩལ་ལ་ཐེག་པ་གཅིག་ཏུ་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བདག་ཉིད་ཡོངས་སུ་མྱ
239a6 ངན་ལས་མི་འདའ་བའི་ཆོས་ཅན་ཡིན་པའི་ཕྱིར་ཉན་ཐོས་དང་། རང་སངས་རྒྱས་ཐམས་ཅད་ལ་ཐེག་པ་གཅིག་ཏུ་མ་བཤད་དེ། འདི་ལྟར་ཉན་ཐོས་དང་། རང་སངས་རྒྱས་ཐམས་ཅད་ནི་དེ་བཞིན་གཤེགས་པའི་འདུལ་བ་དང་། རབ་ཏུ་དབེན་པའི་སྦྱོར་བས་རྣམ་པར་གྲོལ
239a7 བ་འཐོབ་ཀྱི། བདག་ཉིད་ཀྱི་མཐུས་ནི་མ་ཡིན་པའི་ཕྱིར་ཐེག་པ་གཅིག་ཏུ་མ་བཤད་དོ། །གཞན་ཡང་བློ་གྲོས་ཆེན་པོ་ཉོན་མོངས་པའི་སྒྲིབ་པ་དང་། ལས་ཀྱི་བག་ཆགས་མ་སྤངས་པའི་ཕྱིར་ཉན་ཐོས་དང་། རང་སངས་རྒྱས་ཐམས་ཅད་ལ་ཐེག་པ་གཅིག་ཏུ་མ་བཤད་དོ། །ཆོས
iiif viewer powered by OpenSeadragon
