| e-texts navigator |
| Wylie |
238b1 ཡོངས་སུ་དག་རིག་པ། །དེ་ནི་དོན་དམ་ཞེས་བྱའོ། །ཀུན་བརྟགས་རྣམ་པ་བཅུ་གཉིས་ཏེ། །གཞན་གྱི་དབང་ནི་རྣམ་པ་དྲུག་།སོ་སོ་རང་རིག་ཡེ་ཤེས་ཀྱིས། །ཤེས་བྱ་དེ་ལ་བྱེ་བྲག་མེད། །ཆོས་ལྔ་ཡང་དག་ཉིད་ཡིན་ཏེ། །རང་བཞིན་ལ་ནི་རྣམ་གསུམ་ཡོད། །རྣལ་འབྱོར་ཅན་གྱིས་དེ་བསྒོམས
238b2 ན། །དེ་བཞིན་ཉིད་ལས་མི་འདའོ། །མཚན་མ་དག་དང་གཞན་གྱི་དབང་། །མིང་དེས་ཀུན་དུ་བརྟགས་པ་སྐྱེད། །ཀུན་བརྟགས་མཚན་མ་དེ་དག་ནི། །གཞན་དབང་དེ་ལས་བྱུང་བའོ། །བློ་ཡིས་སོ་སོར་རབ་བརྟགས་ན། །གཞན་དབང་མེད་ཅིང་བརྟགས་པའང་མེད། །ཡོངས་གྲུབ་ལ་ནི་དངོས
238b3 མེད་ན། །བློ་ཡིས་ཅི་ཞིག་རྣམ་པར་བརྟགས། །ཀུན་བརྟགས་རང་བཞིན་དེ་དག་ལ། །རང་བཞིན་གཉིས་ནི་རྣམ་པར་གཞག་།བརྟགས་པ་དག་ནི་སྣ་ཚོགས་སྣང་། །རྣམ་དག་འཕགས་པའི་སྤྱོད་ཡུལ་ལོ། །ཀུན་བརྟགས་རི་མོའི་རྣམ་པ་བཞིན། །གཞན་གྱི་དབང་ལས་བརྟགས་པ་སྟེ། །རྣམ
238b4 པ་གཞན་དུ་བརྟགས་ན་ནི། །མུ་སྟེགས་སྨྲ་ལ་གནས་པར་འགྱུར། །རྟོགས་པས་བརྟགས་ཞེས་བརྗོད་པ་སྟེ། །འདུས་ལས་སྐྱེ་བར་མཐོང་བའི་རྒྱུས། །རྣམ་རྟོག་གཉིས་ལས་གྲོལ་བ་ནི། །དེ་ཉིད་ཡོངས་སུ་གྲུབ་པ་ཡིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས
238b5 ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕགས་པ་སོ་སོ་རང་གིས་རིག་པའི་ཡེ་ཤེས་དང་། ཐེག་པ་གཅིག་གི་མཚན་ཉིད་བཤད་དུ་གསོལ། འཕགས་པ་སོ་སོ་རང་གིས་རིག་པའི་ཡེ་ཤེས་ཀྱི་མཚན་ཉིད་དང་། ཐེག་པ་གཅིག་རྟོགས་པའི་མཚན་ཉིད
238b6 དེས་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་འཕགས་པ་སོ་སོ་རང་གིས་རིག་པའི་ཡེ་ཤེས་ཀྱི་མཚན་ཉིད་དང་། ཐེག་པ་གཅིག་ལ་མཁས་ཤིང་གཞན་གྱི་དྲིང་ལ་མི་འཇོག་པར་སངས་རྒྱས་ཀྱི་ཆོས་ཐམས་ཅད་རྟོགས་པར་འགྱུར་རོ། །བཅོམ་ལྡན་འདས
238b7 ཀྱིས་བཀའ་སྩལ་པ། །བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས
iiif viewer powered by OpenSeadragon
