| e-texts navigator |
| Wylie |
238a1 པ་མ་ཡིན་པ་དང་། ཡོད་པ་དང་མེད་པར་མངོན་པར་ཞེན་པར་མི་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སེམས་ནི་ཡུལ་གྱིས་ཀུན་དུ་བཅིངས། །རྟོག་པ་རིག་ལས་ཡེ་ཤེས་འཇུག་།སྣང་བ་མེད་དང་ཁྱད
238a2 པར་ལས། །ཤེས་རབ་མཉམ་པར་རབ་ཏུ་བསྐྱེད། །བརྟགས་པའི་རང་བཞིན་གྱིས་ཡོད་དེ། །གཞན་དབང་ལ་ནི་དེ་མེད་དོ། །ཀུན་བརྟགས་དག་ནི་ནོར་པས་བསྡུས། །གཞན་དབང་དེ་ནི་ཀུན་བརྟགས་མིན། །ཡན་ལག་ཐ་དད་འབྱུང་བ་ཡང་། །སྒྱུ་མ་ཇི་བཞིན་མི་འགྲུབ་སྟེ། །དེ་ཡི་མཚན་མ་སྣ་ཚོགས
238a3 ཡོད། །ཀུན་བརྟགས་དེ་ནི་འགྲུབ་མི་འགྱུར། །དེ་ཡི་མཚན་མ་གནས་ངན་ལེན། །སེམས་ཀྱི་འཆིང་ལས་སྐྱེས་པ་སྟེ། །རྣམ་རྟོག་ཤེས་པ་མེད་པ་རྣམས། །གཞན་གྱི་དབང་ལས་རྣམ་པར་རྟོག་།བརྟགས་པའི་དངོས་པོ་འདི་དག་ནི། །དེ་ཉིད་གཞན་གྱི་དབང་ཡིན་ཏེ། །བརྟགས་པ་དག་ནི་སྣ་ཚོགས
238a4 ཡོད། །གཞན་གྱི་དབང་ལ་རྟོག་པར་བྱེད། །ཀུན་རྫོབ་དང་ནི་དོན་དམ་སྟེ། །གསུམ་པ་རྒྱུ་ལས་སྐྱེ་བ་མེད། །བརྟགས་པ་དག་ནི་ཀུན་རྫོབ་བཤད། །དེ་འཆད་འཕགས་པའི་སྤྱོད་ཡུལ་ལོ། །རྣལ་འབྱོར་ཅན་གྱི་དངོས་པོ་ལྟར། །གཅིག་ལ་སྣ་ཚོགས་སྟོན་བྱེད་ཀྱང་། །དེ་ལ་སྣ་ཚོགས་ཡོད་མ་ཡིན། །
238a5 ཀུན་བརྟགས་མཚན་ཉིད་དེ་བཞིན་ནོ། །ཇི་ལྟར་རབ་རིབ་ཅན་དག་གི། །རྣམ་རྟོག་སྣ་ཚོགས་གཟུགས་སུ་སྣང་། །རབ་རིབ་གཟུགས་དང་གཟུགས་མིན་མེད། །གཞན་དབང་མ་རྟོགས་དེ་བཞིན་ནོ། །ཇི་ལྟར་གསེར་ནི་རབ་སྦྱངས་པ། །དྲི་མ་དག་ནི་སྤངས་གྱུར་དང་། །ནམ་མཁའ་དག་ནི་སྤྲིན་མེད་ལྟར། །
238a6 ཀུན་བརྟགས་པ་ཡང་དེ་བཞིན་ནོ། །ཀུན་བརྟགས་པ་ཡི་དངོས་པོ་དང་། །དེ་བཞིན་གཞན་དབང་ཡོད་མིན་ལ། །སྒྲོ་འདོགས་སྐུར་པ་འདེབས་བྱེད་དེ། །རྣམ་བརྟགས་དབང་གིས་འཇིག་པ་ཡིན། །གལ་ཏེ་བརྟགས་པ་དངོས་མེད་ལ། །གཞན་གྱི་དབང་ནི་ཡོད་གྱུར་ན། །དངོས་མེད་དངོས་པོ་ཡོད་པས
238a7 ན། །དངོས་ཡོད་དངོས་པོ་མེད་ལས་འབྱུང་། །ཀུན་བརྟགས་པ་ལ་བརྟེན་པའི་རྒྱུས། །གཞན་དབང་དེ་ནི་ཉེ་བར་དམིགས། །རྒྱུ་མཚན་མིང་དང་འབྲེལ་པ་ལས། །ཀུན་བརྟགས་རྣམས་ནི་སྐྱེ་བར་འགྱུར། །ཤིན་ཏུ་མ་གྲུབ་རྟོགས་པའི་ཚེ། །ཀུན་བརྟགས་ལས་ནི་འདའ་བར་འགྱུར། །དེ་ནས
iiif viewer powered by OpenSeadragon
