| e-texts navigator |
| Wylie |
236b1 རྣམ་པར་ཤེས་པ་བདུན་རྣམས་འབྱུང་བར་མི་འགྱུར་རོ། །དེ་ལ་ཡིད་ཀྱི་རྣམ་པར་ཤེས་པ་ནི་ཡུལ་རྣམས་བྱེ་བྲག་འབྱེད་ཅིང་མངོན་པར་ཞེན་པས་བག་ཆགས་རྣམས་བསྐྱེད་ནས་ཀུན་གཞི་རྣམ་པར་ཤེས་པ་རྒྱས་པར་བྱེད་དེ། ཡིད་དང་ལྷན་ཅིག་ཏུ་བདག་དང་བདག་གིས་འཛིན་པ་ལ་མངོན་པར་ཞེན་ཅིང་།
236b2 ངར་སེམས་པའི་རྐྱེན་གྱིས་སྐྱེ་བས་ལུས་ཀྱི་མཚན་ཉིད་རྣམ་པར་མི་འཇིག་གོ། །ཀུན་གཞི་རྣམ་པར་ཤེས་པའི་རྒྱུར་གྱུར་ཅིང་དེ་ལ་དམིགས་པ་རང་གི་སེམས་སྣང་བའི་ཡུལ་ལ་མངོན་པར་ཞེན་པས་སེམས་འདུས་པ་གཅིག་གི་རྒྱུར་གཅིག་འབྱུང་སྟེ། དཔེར་ན་རྒྱ་མཚོའི་རླབས་ལྟ་བུར་རང་གི་སྣང་བའི་སྤྱོད
236b3 ཡུལ་གྱི་རླུང་གིས་བསྐྱོད་པས་འཇུག་ཅིང་ལྡོག་པ་ཡང་དེ་བཞིན་ཏེ། དེ་ལྟ་བས་ན་ཡིད་ཀྱི་རྣམ་པར་ཤེས་པ་བཟློག་པས་རྣམ་པར་ཤེས་པ་བདུན་རྣམས་ཀྱང་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བྱ་བ་དང་ནི
236b4 མཚན་ཉིད་དང་། །དངོས་པོར་མྱ་ངན་ང་མི་འདའ། །རྣམ་རྟོག་ཤེས་བྱ་རྣམ་ཤེས་ཏེ། །བཟློག་པས་མྱ་ངན་ང་འདས་སོ། །དེ་རྒྱུ་དེ་ལ་དམིགས་པ་སྟེ། །ཡིད་ཀྱིས་འགྲོ་སོགས་ལུས་མངོན་འགྲུབ། །རྒྱུ་འབྱིན་དེ་ནི་སེམས་ཡིན་ཏེ། །རྣམ་ཤེས་གནས་ནི་རབ་ཏུ་བྱེད། །ཇི་ལྟར་ཆུ་ཆེན་ཟད་ནས་ནི། །
236b5 རླབས་རྣམས་རྒྱུན་དུ་མི་འབྱུང་ལྟར། །དེ་བཞིན་ཡིད་ནི་འགག་པ་ན། །རྣམ་ཤེས་སྣ་ཚོགས་སྐྱེ་མི་འགྱུར། །གཞན་ཡང་བློ་གྲོས་ཆེན་པོ་ཀུན་བརྟགས་པའི་རང་བཞིན་རབ་ཏུ་དབྱེ་བ་དང་། རྟོགས་པའི་ཚུལ་གྱི་མཚན་ཉིད་བཤད་པར་བྱ་སྟེ། ཀུན་བརྟགས་པའི་རང་བཞིན་རབ་ཏུ་དབྱེ་བ་དང་། རྟོགས
236b6 པའི་ཚུལ་གྱིས་མཚན་ཉིད་ལ་མཁས་པ་གང་གིས་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཀུན་དུ་རྟོག་པ་སྤངས་ཤིང་འཕགས་པ་སོ་སོ་རང་གིས་རིག་པ་ལ་གནས་པ་དང་། མུ་སྟེགས་ཅན་གྱི་ཚུལ་རྟོགས་པ་དང་། ཤིན་ཏུ་མཐོང་བའི་བློས་གཟུང་བ་དང་། འཛིན་པའི་རྣམ
236b7 པར་རྟོག་པ་སྤངས་ནས་གཞན་གྱི་དབང་གི་མཚན་ཉིད་སྣ་ཚོགས་ལ་ཀུན་བརྟགས་པའི་རང་བཞིན་གྱི་འདུ་བྱེད་དུ་རྟོག་པར་མི་འགྱུར་རོ། །དེ་ལ་བློ་གྲོས་ཆེན་པོ་ཀུན་བརྟགས་པའི་རང་བཞིན་རབ་ཏུ་དབྱེ་བའི་ཚུལ་གྱི་མཚན་ཉིད་གང་ཞེ་ན། འདི་ལྟ་སྟེ། བརྗོད་པའི་རྣམ་པར་རྟོག་པ་དང་། སྨྲ་བར
iiif viewer powered by OpenSeadragon
