| e-texts navigator |
| Wylie |
236a1 རྟོག་པས་སྣང་ངོ་། །དེ་ནི་ཕུང་པོ་རྣམས་ཀྱི་རང་བཞིན་གྱི་མཚན་ཉིད་དེ། ཁྱོད་ཀྱིས་བཟློག་པར་བྱའོ། རྣམ་པར་བཟློག་ནས་རབ་ཏུ་དབེན་པའི་ཆོས་བསྟན་པས་སངས་རྒྱས་ཀྱི་ཞིང་ཐམས་ཅད་དུ་མུ་སྟེགས་ཅན་གྱི་ལྟ་བ་རྣམས་བཟློག་པར་བྱའོ། །བློ་གྲོས་ཆེན་པོ་རབ་ཏུ་དབེན་པའི་ཆོས
236a2 བསྟན་པའི་ཚེ་ཆོས་བདག་མེད་པ་མཐོང་བ་རྣམ་པར་དག་པར་འགྱུར། མི་གཡོ་བའི་ས་ལ་ཡང་རབ་ཏུ་འཇུག་པར་འགྱུར་རོ། །དེ་མི་གཡོ་བའི་སར་རབ་ཏུ་ཞུགས་ནས། ཏིང་ངེ་འཛིན་ཚད་མེད་པ་ལ་དབང་བྱེད་པར་འགྱུར་རོ། །ཡིད་ཀྱི་ལུས་ཐོབ་པས་སྒྱུ་མ་ལྟ་བུའི་ཏིང་ངེ་འཛིན་རབ་ཏུ་འཐོབ་བོ། །སྟོབས་དང་།
236a3 མངོན་པར་ཤེས་པ་དང་། དབང་རྣམས་རྟོགས་པར་ཁོང་དུ་ཆུད་པས་སེམས་ཅན་ཐམས་ཅད་སྡུད་ཅིང་ཕན་འདོགས་པར་འགྱུར་རོ། །དཔེར་ན་ས་ཆེན་པོ་ནི་སེམས་ཅན་རྣམས་འདེག་ཅིང་ཕན་འདོགས་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སེམས་ཅན་ཐམས་ཅད་ལ་ཕན
236a4 འདོགས་པ་ཡིན་ནོ། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ལ་མྱ་ངན་ལས་འདས་པ་རྣམ་པ་བཞི་ཡོད་དེ་བཞི་གང་ཞེ་ན། འདི་ལྟ་སྟེ། དངོས་པོའི་རང་བཞིན་དངོས་པོ་མེད་པའི་མྱ་ངན་ལས་འདས་པ་དང་མཚན་ཉིད་སྣ་ཚོགས་ཀྱི་དངོས་པོ་དངོས་པོ་མེད་པའི་མྱ་ངན་ལས་འདས་པ་དང་། རང་གི་མཚན
236a5 ཉིད་ཀྱི་རང་བཞིན་དངོས་པོ་མེད་པར་རྟོགས་པའི་མྱ་ངན་ལས་འདས་པ་དང་། ཕུང་པོ་རྣམས་ཀྱི་རང་དང་སྤྱིའི་མཚན་ཉིད་ཀྱི་རྒྱུད་ཀྱི་རྒྱུན་ཆད་པའི་མྱ་ངན་ལས་འདས་པའོ། །དེ་དག་ནི་མུ་སྟེགས་ཅན་རྣམས་ཀྱི་མྱ་ངན་ལས་འདས་པ་ཡིན་ཏེ། ངའི་གསུང་རབ་ལ་མ་ཡིན་ནོ། །བློ་གྲོས་ཆེན་པོ་ངའི་གསུང
236a6 རབ་ལ་ནི་རྣམ་པར་རྟོག་པ་དང་བཅས་པའི་རྣམ་པར་ཤེས་པ་ལ་ཟློག་པ་ནི་མྱ་ངན་ལས་འདས་པ་ཞེས་བྱའོ། །བློ་གྲོས་ཆེན་པོས་གསོལ་པ། བཅོམ་ལྡན་འདས་ཀྱིས་རྣམ་པར་ཤེས་པ་བརྒྱད་དུ་རྣམ་པར་མ་གཞག་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྣམ་པར་གཞག་གོ། །
236a7 བློ་གྲོས་ཆེན་པོས་གསོལ་པ། བཅོམ་ལྡན་འདས་གལ་ཏེ་རྣམ་པར་བཞག་ན་ཇི་ལྟར་ཡིད་ཀྱི་རྣམ་པར་ཤེས་པ་ལོག་པས་བསལ། རྣམ་པར་ཤེས་པ་བདུན་རྣམས་ནི་མ་ལགས། བཅོམ་ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། དེ་དག་གི་རྒྱུ་དང་། དེ་དག་གིས་དམིགས་པ་རྐྱེན་ཡིན་པའི་ཕྱིར
iiif viewer powered by OpenSeadragon
