| e-texts navigator |
| Wylie |
235a1 བ་ཆེན་པོ་དང་། འབྱུང་བ་ལས་གྱུར་པ་ལ་མཁས་པར་བྱའོ། །ཇི་ལྟར་ན་བྱང་ཆུབ་སེམས་དཔའ་འབྱུང་བ་ཆེན་པོ་དང་། འབྱུང་བ་ལས་གྱུར་པ་ལ་མཁས་པ་ཡིན་ཞེ་ན། བློ་གྲོས་ཆེན་པོ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་ཡང་དག་པར
235a2 རབ་ཏུ་རྟོག་སྟེ། དེ་དོན་དམ་པའི་བདེན་པར་ནི་འབྱུང་བ་ཆེན་པོ་དག་སྐྱེ་བ་མེད་དོ། །འབྱུང་བ་ཆེན་པོ་དག་ལ་སྐྱེ་བ་མེད་པར་དེ་ལྟར་རབ་ཏུ་རྟོག་པར་བྱེད་དེ། དེ་ལྟར་རབ་ཏུ་བརྟགས་ནས་མིང་དང་རྒྱུ་མཚན་རྣམས་ནི་རྣམ་པར་རྟོག་པ་ཙམ་དང་། རང་གི་སེམས་སྣང་བ་ཙམ་དང་། ཕྱི
235a3 རོལ་གྱི་དངོས་པོ་རྣམས་དངོས་པོ་མེད་པར་རྟོགས་པ་ནི་རང་གི་སེམས་སྣང་བ་རྣམ་པར་རྟོག་པ་ཙམ་ཞེས་བྱའོ། །འདི་ལྟ་སྟེ། ཁམས་གསུམ་པའི་འབྱུང་བ་དང་། འབྱུང་བ་ལས་གྱུར་པ་དེ་དག་ལ་རབ་ཏུ་བརྟགས་ན། ངོ་བོ་ཉིད་ཀྱིས་མཐའ་བཞི་དང་བྲལ་བས་ཚུལ་རྣམ་པར་དག་པ
235a4 བདག་དང་བདག་གི་དང་བྲལ་བ། ཡང་དག་པའི་མཚན་ཉིད་རང་གི་མཚན་ཉིད་ཀྱི་དབྱིབས་སུ་གནས་པ། མ་སྐྱེས་པའི་མཚན་ཉིད་དུ་འགྲུབ་པར་མཐོང་ངོ་། །བློ་གྲོས་ཆེན་པོ་ཇི་ལྟར་ན་འབྱུང་བ་ཆེན་པོ་བཞི་པོ་དེ་དག་གིས་རྒྱུར་བྱས་པའི་གཟུགས་རྣམས་སྐྱེད་ཅེ་ན། འདི་ལྟ་སྟེ། གཤེར
235a5 བར་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་ཆུའི་ཁམས་སྐྱེད་དོ། །བྱ་བ་ནུས་པའི་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་མེའི་ཁམས་སྐྱེད་དོ། །གཡོ་བར་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་རླུང་གི་ཁམས་སྐྱེད་དོ། །གཟུགས་གཅད་དུ་རུང་བར
235a6 རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་སའི་ཁམས་སྐྱེད་དོ། །གཟུགས་དང་ནམ་མཁའ་གཉི་ག་ཡང་ལོག་པའི་བདེན་པ་ལ་མངོན་པར་ཞེན་པས་ཕུང་པོ་ལྔ་འདུས་པ་དང་། འབྱུང་བ་ཆེན་པོ་དང་། འབྱུང་བ་ལས་གྱུར་པ་སྐྱེའོ། །བློ་གྲོས་ཆེན་པོ་རྣམ་པར་ཤེས་པ་ནི་གནས
235a7 རྣམ་པ་སྣ་ཚོགས་དང་། ཡུལ་ལ་མངོན་པར་ཆགས་པའི་རྒྱུས་འགྲོ་བ་གཞན་དུ་མཚམས་སྦྱོར་བར་འགྱུར་རོ། །བློ་གྲོས་ཆེན་པོ་ས་ལ་སོགས་པ་ཆེན་པོ་བཞི་དང་། འབྱུང་བ་ལས་གྱུར་པ་རྣམས་ལ་ནི་འབྱུང་བ་ཆེན་པོ་བཞིའི་རྟེན་ཡོད་ཀྱི། འབྱུང་བ་ཆེན་པོ་བཞི་པོ་དག་གི་རྐྱེན་ནི་མ་ཡིན་ནོ། །
iiif viewer powered by OpenSeadragon
