| e-texts navigator |
| Wylie |
234a1 བསྟན་པ་ནི་འདི་ལྟ་སྟེ། འབྲས་བུ་འཐོབ་པར་བྱ་བ་དང་། བསམ་གཏན་འཐོབ་པར་བྱ་བའོ། །དེ་ལ་བསམ་གཏན་ནི་བསམ་གཏན་ལ་ཞུགས་པ་ན། རབ་ཏུ་དབེན་པའི་ཕྱིར་དང་། རང་གི་སེམས་སྣང་བར་སྟོན་པས་འབྲས་བུ་འཐོབ་པའི་མཚན་ཉིད་ནི་འབྲས
234a2 བུ་ཐོབ་པ་ཞེས་བྱའོ། །གཞན་ཡང་བློ་གྲོས་ཆེན་པོ་བསམ་གཏན་དང་། ཚད་མེད་པ་དང་། གཟུགས་མེད་པའི་ཁམས་ལས་ཤིན་ཏུ་བཟླ་བར་འདོད་ན། རང་གི་སེམས་སྣང་བའི་མཚན་ཉིད་ལས་ལྡོག་པར་བྱའོ། །བློ་གྲོས་ཆེན་པོ་འདུ་ཤེས་དང་ཚོར་བ་འགོག་པའི་སྙོམས་པར
234a3 འཇུག་པ་ནི་རང་གི་སེམས་སྣང་བ་ལས་འདས་ཞེས་བྱར་མི་རུང་སྟེ། དེ་ཅིའི་ཕྱིར་ཞེ་ན། སེམས་སྣང་བ་ཡོད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བསམ་གཏན་རྣམས་དང་ཚད་མེད་བཞི། །གཟུགས
234a4 མེད་པ་ཡི་ཏིང་འཛིན་དང་། །ཚོར་བ་འདུ་ཤེས་འགོག་པ་རྣམས། །སེམས་ཙམ་ལ་ནི་དེ་ཡོད་མིན། །རྒྱུན་དུ་ཞུགས་པའི་འབྲས་བུ་དང་། །ལན་ཅིག་ཕྱིར་འོང་ཕྱིར་མི་འོང་། །དགྲ་བཅོམ་པ་ཡི་འབྲས་བུ་རྣམས། །དེ་དག་ཐམས་ཅད་སེམས་འཁྲུལ་པ། །བསམ་གཏན་དང
234a5 ནི་བསམ་གཏན་རྐྱེན། །སྤོང་ཞེས་བདེན་པ་ཡང་དག་མཐོང་། །དེ་དག་རྟོག་པ་ཙམ་ཡིན་པར། །གང་གིས་རྟོགས་པ་དེ་འགྲོལ་ལོ། །གཞན་ཡང་བློ་གྲོས་ཆེན་པོ་བློ་རྣམ་པ་གཉིས་ཡོད་དེ། འདི་ལྟ་སྟེ། རབ་ཏུ་རྣམ་པར་འབྱེད་པའི་བློ་དང་། རྣམ་པར་རྟོག་པའི་མཚན་ཉིད
234a6 འཛིན་པ་ལ་མངོན་པར་ཞེན་པས་རྣམ་པར་གཞག་པའི་བློའོ། །དེ་ལ་བློ་གྲོས་ཆེན་པོ་རབ་ཏུ་རྣམ་པར་འབྱེད་པའི་བློ་ནི་འདི་ལྟ་སྟེ། བློ་གང་གིས་དངོས་པོའི་རང་བཞིན་གྱི་མཚན་ཉིད་རབ་ཏུ་གཞིག་ན་མཐའ་བཞི་དང་བྲལ་བས་མི་དམིགས་པ་འདི་ནི་རབ་ཏུ་རྣམ་པར་འབྱེད་པའི་བློ
234a7 ཞེས་བྱའོ། །དེ་ལ་བློ་གྲོས་ཆེན་པོ་མཐའ་བཞི་ནི་འདི་ལྟ་སྟེ། །གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་ནི་མཐའ་བཞི་ཞེས
iiif viewer powered by OpenSeadragon
