| e-texts navigator |
| Wylie |
231b1 ལ་ཆོས་སྟོན་ཏོ། །བློ་གྲོས་ཆེན་པོ་གཞག་པའི་ལུང་བསྟན་པ་དེ་ནི་ངས་སྐབས་སྐབས་སུ་དབང་པོ་ཡོངས་སུ་མ་སྨིན་པ་རྣམས་ལ་བཤད་པ་ཡིན་གྱི། དབང་པོ་ཡོངས་སུ་སྨིན་པ་ལ་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་ཆོས་ཐམས་ཅད་ནི་བྱ་བའི་རྒྱུ་རྐྱེན་དང་བྲལ་བའི་ཕྱིར་མི་སྐྱེ་ལ། བྱེད་པ་མེད་པའི་ཕྱིར
231b2 ཡང་ཆོས་ཐམས་ཅད་མི་སྐྱེའོ། །བློ་གྲོས་ཆེན་པོ་ཇི་ལྟར་ན་དངོས་པོ་ཐམས་ཅད་ངོ་བོ་ཉིད་མེད་པ་ཡིན་ཞེ་ན། འདི་ལྟར་རང་གི་བློས་རྣམ་པར་དཔྱད་པའི་ཚེ་རང་དང་སྤྱིའི་མཚན་ཉིད་ཀྱི་དངོས་པོ་མི་དམིགས་པས་ན། དེའི་ཕྱིར་ཆོས་ཐམས་ཅད་མི་སྐྱེ་བར་བཤད་དོ། །བློ་གྲོས་ཆེན་པོ་ཇི་ལྟར་ན་ཆོས་ཐམས་ཅད
231b3 འོང་བ་དང་། འགྲོ་བ་མེད་པ་ཡིན་ཞེ་ན། འདི་ལྟར་རང་དང་སྤྱིའི་མཚན་ཉིད་བླང་བར་འདོད་ན་ཡང་འོང་བའི་གནས་མེད་ལ། དོར་བར་འདོད་ན་ཡང་འགྲོ་བའི་གནས་མེད་པས། དེའི་ཕྱིར་ཆོས་ཐམས་ཅད་འོང་བ་དང་། འགྲོ་བ་དང་བྲལ་བ་ཡིན་ནོ། །བློ་གྲོས་ཆེན་པོ་ཅིའི་ཕྱིར་ཆོས་ཐམས་ཅད་མི་འགག
231b4 པ་ཡིན་ཞེ་ན། འདི་ལྟར་དངོས་པོའི་རང་བཞིན་གྱི་མཚན་ཉིད་མེད་པའི་ཕྱིར་དང་། ཆོས་ཐམས་ཅད་དམིགས་སུ་མེད་པའི་ཕྱིར། ཆོས་ཐམས་ཅད་མི་འགག་པ་ཡིན་ནོ། །བློ་གྲོས་ཆེན་པོ་ཇི་ལྟར་ན་ཆོས་ཐམས་ཅད་མི་རྟག་པ་ཡིན་ཞེ་ན། འདི་ལྟ་སྟེ། མཚན་ཉིད་སྐྱེ་བ་མི་རྟག་པ་ཡོད་པས། དེའི་ཕྱིར་ཆོས
231b5 ཐམས་ཅད་མི་རྟག་པ་ཞེས་བཤད་དོ། །བློ་གྲོས་ཆེན་པོ་ཇི་ལྟར་ཆོས་ཐམས་ཅད་རྟག་པ་ཡིན་ཞེ་ན། འདི་ལྟ་སྟེ། མཚན་ཉིད་སྐྱེ་བ་མི་སྐྱེ་བའི་དངོས་པོ་མི་རྟག་པས་རྟག་སྟེ། དེའི་ཕྱིར་ཆོས་ཐམས་ཅད་རྟག་པ་ཞེས་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི
231b6 ཕྱིར་ཚིགས་སུ་བཅད་པ་འདི་དག་གསུངས་སོ། །ལུང་བསྟན་པ་ནི་རྣམ་བཞི་སྟེ། །མགོ་གཅིག་དང་ནི་དྲི་བ་དང་། །རྣམ་པར་དབྱེ་དང་གཞག་པ་རྣམས། །མུ་སྟེགས་སྨྲ་བ་བཟློག་པའོ། །ཡོད་དང་མེད་ལས་སྐྱེ་བར་ནི། །གྲངས་ཅན་དང་ནི་ཁྱད་པར་ཤེས། །ལུང་དུ་མི་སྟོན་ཐམས་ཅད
231b7 ཀྱང་། །དེ་དག་ཉིད་ཀྱིས་རབ་ཏུ་བསྟན། །བློ་ཡིས་རྣམ་པར་གཞིགས་ན་ཡང་། །རང་བཞིན་དག་ནི་མི་དམིགས་ཏེ། །བརྗོད་པ་དག་དང་བྲལ་བའི་ཕྱིར། །རང་བཞིན་བྲལ་བ་རབ་ཏུ་བསྟན། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ
iiif viewer powered by OpenSeadragon
