| e-texts navigator |
| Wylie |
231a1 པ་འདི་གསུངས་སོ། །མིང་དང་ཚིག་གི་ཚོགས་རྣམས་དང་། །ཡི་གེའི་ཚོགས་ལ་བྱེ་བྲག་ཏུ། །མི་ཤེས་བྱིས་པ་ཆགས་པ་ནི། །ཇི་ལྟར་གླང་ཆེན་རྫབ་བྱིང་བཞིན། །གཞན་ཡང་བློ་གྲོས་ཆེན་པོ་མ་འོངས་པའི་དུས་ན་མཁས་པ་དག་གིས་གཅིག་པ་དང་། ཐ་དད་པ་དང་། གཉི
231a2 ག་དང་། གཉི་ག་མ་ཡིན་པར་ལྟ་བའི་མཚན་ཉིད་ལས་རྣམ་པར་གྲོལ་བ། ངས་རྟོགས་པའི་དོན་རྣམས་མི་མཁས་པ་དེ་དག་ལ་དྲིས་པ་ན་དེ་དག་འདི་སྐད་དུ་འདི་ནི་ཚུལ་བཞིན་འདྲི་བ་མ་ཡིན་ནོ་ཞེས་ཟེར་ཞིང་འདི་ལྟ་སྟེ། གཟུགས་ལ་སོགས་པ་དང་། མི་རྟག་པ་གཅིག་གམ་ཐ་དད་ཅེས་བྱ་བ་དང་། དེ་བཞིན
231a3 དུ་མྱ་ངན་ལས་འདས་པ་ལས་འདུ་བྱེད་དང་། མཚན་ཉིད་ལས་མཚན་ཉིད་ཀྱི་གཞི་དང་། ཡོན་ཏན་ལས་ཡོན་ཏན་ཅན་དང་། འབྱུང་བ་ལས་འབྱུང་བ་ལས་གྱུར་པ་དང་། མཐོང་བ་ལས་མཐོང་བར་བྱ་བ་དང་། རྡུལ་ལས་རྡུལ་ཕྲ་མོ་དང་། སྒྲུབ་པ་ལས་རྣལ་འབྱོར་པ་དང་། དེ་བཞིན་དུ་གཅིག་ལ
231a4 གཅིག་ཕན་ཚུན་དཔག་པའི་མཚན་ཉིད་ཀྱི་ཚུལ་གྱིས་དེ་དག་ལ་སོགས་པ་དྲིས་པ་རྣམས་བཅོམ་ལྡན་འདས་ཀྱིས་ལུང་བསྟན་ཏོ། །ཞེས་ཟེར་རོ། དེ་ལ་གཞག་པའི་ལུང་བསྟན་པ་ནི་སྐྱེས་བུ་གཏི་མུག་ཅན་དེ་དག་གིས་ཤེས་པར་འགྱུར་བ་མ་ཡིན་ཏེ། འདི་ལྟར་ཉན་པའི་བློ་དང་མི་ལྡན་པའི་ཕྱིར་དེ་བཞིན་གཤེགས
231a5 པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དེ་དག་སྐྲག་པའི་གནས་སྤང་བའི་ཕྱིར་ལུང་མི་བསྟན་པ་རྣམས་ལུང་མི་སྟོན་ཏོ། །གཞན་ཡང་མུ་སྟེགས་ཅན་གྱི་ལྟ་བར་སྨྲ་བ་གཞིག་པའི་ཕྱིར་མ་བཤད་དོ། །བློ་གྲོས་ཆེན་པོ་མུ་སྟེགས་ཅན་ནི་འདི་སྐད་དུ་སྨྲ་སྟེ། འདི་ལྟར་སྲོག་དེ་ཉིད་ནི་ལུས་ཡིན་ནོ
231a6 ཞེས་བྱ་བ་ལ་སོགས་པ་ལུང་དུ་མི་སྟོན་པ་སྨྲ་བ། བློ་གྲོས་ཆེན་པོ་མུ་སྟེགས་ཅན་རྒྱུ་ལ་རྣམ་པར་རྨོངས་པ་རྣམས་ནི་ལུང་མི་སྟོན་པ་སྨྲའི། དེའི་གསུང་རབ་ལ་ནི་མ་ཡིན་ནོ། །བློ་གྲོས་ཆེན་པོ་ངའི་གསུང་རབ་ནི་གཟུང་བ་དང་། འཛིན་པ་རྣམ་པར་སྤངས་ཤིང་རྣམ་པར་རྟོག་པ་མི་སྐྱེ་བའོ། །ཇི་ལྟར་དེ་དག་བཟློག
231a7 ཅེ་ན། བློ་གྲོས་ཆེན་པོ་གང་གཟུང་བ་དང་། འཛིན་པ་ལ་མངོན་པར་ཞེན་ཅིང་རང་གི་སེམས་སྣང་བ་ཙམ་དུ་མི་ཤེས་པ་དེ་དག་ལ་ནི་རྣམ་པར་བཟློག་པ་ཡོད་དོ། །བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ལུང་བསྟན་པ་རྣམ་པ་བཞིས་སེམས་ཅན་རྣམས
iiif viewer powered by OpenSeadragon
