| e-texts navigator |
| Wylie |
230b1 ལྟ་བ་བཞིན་གྱི་གནས་སུ་མཐོང་བ་དག་ལོག་པར་སྨྲ་བར་མི་བྱ་བའི་ཕྱིར་ཏེ། བློ་གྲོས་ཆེན་པོ་ཆོས་ཐམས་ཅད་ཀྱི་ཡང་དག་པར་གནས་པ་ཇི་ལྟ་བ་བཞིན་དུ་མཐོང་བ་ནི་འདི་ལྟ་སྟེ། རང་གི་སེམས་སྣང་བ་ཙམ་ལས་འདས་པའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་བསྟན་པའི་ཕྱིར་ཚིགས་སུ
230b2 བཅད་པ་འདི་གསུངས་སོ། །སྐྱེ་མེད་བྱེད་པ་དངོས་མ་ཡིན། །དངོས་པོས་འཁོར་བ་ཀུན་སྡུད་དེ། །སྒྱུ་མ་ལ་སོགས་འདྲ་མཐོང་ན། །མཚན་ཉིད་ལ་ནི་རྣམ་མི་རྟོག་།གཞན་ཡང་བློ་གྲོས་ཆེན་པོ་མིང་དང་། ཚིག་དང་། ཡི་གེའི་ཚོགས་ཀྱི་མཚན་ཉིད་དུ་རབ་ཏུ་བཤད་པར་བྱ་སྟེ། མིང་དང་། ཚིག
230b3 དང་། ཡི་གེའི་ཚོགས་རབ་ཏུ་རྟོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་དོན་དང་། ཚིག་དང་། ཡི་གེའི་ཚོགས་ཀྱི་རྗེས་སུ་ཞུགས་པ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། མངོན་པར་རྫོགས་པར་སངས་རྒྱས་ནས་སེམས
230b4 ཅན་ཐམས་ཅད་ཀྱང་དེ་བཞིན་དུ་ཁོང་དུ་ཆུད་པར་བྱེད་དོ། །བློ་གྲོས་ཆེན་པོ་དེ་ལ་མིང་གི་ཚོགས་ཞེས་བྱ་བ་ནི་འདི་ལྟ་སྟེ། དངོས་པོ་གང་ལ་བརྟེན་ནས་མིང་དུ་གདགས་པ་ནི་མིང་གི་ཚོགས་ཞེས་བྱའོ། །བློ་གྲོས་ཆེན་པོ་ཚིག་གི་ཚོགས་ནི་འདི་ལྟ་སྟེ། ཚིག་གང་དོན་གྱི་ཚོགས་དང་ལྡན་པ་དང་། རང་གི་ངོ་བོ
230b5 ཉིད་གདོན་མི་ཟ་བ་དང་། མཐར་ཐུག་པ་དེ་ནི་ཚིག་གི་ཚོགས་ཞེས་བྱའོ། །བློ་གྲོས་ཆེན་པོ་ཡི་གེའི་ཚོགས་ནི་འདི་ལྟ་སྟེ། གང་གིས་མིང་དང་ཚིག་གསལ་བར་བྱེད་པ་དེ་ནི་ཡི་གེའི་ཚོགས་ཞེས་བྱའོ། །ཡང་ཡི་གེའི་ཚོགས་ནི་འདི་ལྟ་སྟེ། རིང་པོ་དང་། ཐུང་ངུ་དང་། མཐོ་བ་དང་། དམའ་བའོ། །ཡང
230b6 ཚིག་གི་ཚོགས་ནི་འགྲོ་བའི་རྗེས་ལྟ་བུ་སྟེ། འདི་ལྟར་གླང་པོ་ཆེ་དང་། རྟ་དང་། མི་དང་། ལ་སོགས་པ་གང་ས་ལ་འགྲོ་བའི་རྗེས་རྣམས་ནི་ཚིག་གི་ཚོགས་ཞེས་བྱ་བའི་མིང་འཐོབ་བོ། །བློ་གྲོས་ཆེན་པོ་མིང་དང་ཡི་གེ་ནི་འདི་ལྟ་སྟེ། མིང་གིས་ཕུང་པོ་གཟུགས་མེད་པ་བཞི་བརྗོད་པའི་ཕྱིར་རོ། །རང
230b7 གི་མཚན་ཉིད་སྣང་བར་བྱེད་པས་ནི་ཡི་གེ་སྟེ། དེ་ནི་མིང་དང་། ཡི་གེའི་ཚོགས་ཞེས་བྱའོ། །འདི་ནི་མིང་དང་། ཚིག་དང་། ཡི་གེའི་ཚོགས་རྣམས་བརྗོད་པའི་མཚན་ཉིད་དེ། དེ་ལ་ཁྱོད་ཀྱིས་ནན་ཏན་དུ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད
iiif viewer powered by OpenSeadragon
