| e-texts navigator |
| Wylie |
229b1 གལ་ཏེ་མཚན་མ་ཡང་སྐྱེད་ན། །དེ་ཉིད་ཀྱང་ནི་ནོར་པ་སྟེ། །རབ་རིབ་ཡོངས་སུ་མ་དག་བཞིན། །གཞན་ཡང་བློ་གྲོས་ཆེན་པོ་སྒྱུ་མ་མ་ཡིན་པ་ཆོས་དང་མཚུངས་པ་ཡོད་པ་མ་ཡིན་པས་ཆོས་ཐམས་ཅད་སྒྱུ་མ་ལྟ་བུར་མཐོང་ངོ་། །བཅོམ་ལྡན་འདས་ལ་བློ་གྲོས་ཆེན་པོས་གསོལ་པ།
229b2 བཅོམ་ལྡན་འདས་ནི་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པས་ཆོས་ཐམས་ཅད་སྒྱུ་མ་ལྟ་བུ་ལགས་སམ། འོན་ཏེ་ཐ་དད་པའི་མཚན་ཉིད་ལ་མངོན་པར་ཞེན་པས་ལགས། གལ་ཏེ་སྒྱུ་མ་རྣམ་པ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པས་དངོས་པོ་ཐམས་ཅད་སྒྱུ་མ་ལྟ་བུ་ལགས
229b3 ན་ནི། བཅོམ་ལྡན་འདས་དངོས་པོ་རྣམས་སྒྱུ་མ་ལྟ་བུ་ལགས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་གཟུགས་སྣ་ཚོགས་ཀྱི་མཚན་ཉིད་ནི་རྒྱུ་མ་མཆིས་པ་མ་ལགས་ལ། བཅོམ་ལྡན་འདས་རྒྱུ་གང་ཡང་གཟུགས་སྣ་ཚོགས་ཀྱི་མཚན་ཉིད་སྒྱུ་མ་ལྟ་བུར་སྣང་བར་བགྱིད་པ་མ་མཆིས
229b4 སོ། བཅོམ་ལྡན་འདས་དེའི་སླད་དུ་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པ་དང་ཆོས་འཐུན་པ་མ་མཆིས་པས་དངོས་པོ་རྣམས་སྒྱུ་མ་ལྟ་བུ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པ་དང་། ཆོས
229b5 འཐུན་པས་ཆོས་ཐམས་ཅད་སྒྱུ་མ་ལྟ་བུ་མ་ཡིན་མོད་ཀྱི། འོན་ཀྱང་བློ་གྲོས་ཆེན་པོ་ཆོས་ཐམས་ཅད་ནི་ཡང་དག་པ་མ་ཡིན་ཏེ། མྱུར་དུ་འཇིག་པ་གློག་དང་འདྲ་བས་ན་སྒྱུ་མ་ལྟ་བུ་ཞེས་བྱའོ། །བློ་གྲོས་ཆེན་པོ་དཔེར་ན་གློག་འགྱུ་བ་སྐད་ཅིག་ཏུ་འབྱུང་ལ། བྱུང་ནས་འཇིག་པ་ནི་བྱིས་པ་སོ་སོའི་སྐྱེ
229b6 བོ་རྣམས་ལ་མི་སྣང་སྟེ། དེ་བཞིན་དུ་ཆོས་ཐམས་ཅད་ཀྱང་རང་གི་རྣམ་པར་རྟོག་པའི་རང་དང་སྤྱིའི་མཚན་ཉིད་ལ་དངོས་པོ་མེད་པར་རབ་ཏུ་རྣམ་པར་འབྱེད་པ་མེད་པ་དང་། གཟུགས་ཀྱི་མཚན་ཉིད་ལ་མངོན་པར་མ་ཆགས་པ་མེད་པ་ལས་སྣང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང
229b7 བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །སྒྱུ་མར་མེད་མིན་ཆོས་འཐུན་པས། །དངོས་པོ་རྣམས་ནི་སྒྱུ་མར་བརྗོད། །ཡང་དག་མ་ཡིན་གློག་འདྲ་བས། །དེ་ཕྱིར་སྒྱུ་མ་ལྟ་བུར་བཤད། །བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། འདི་ལྟར་བཅོམ་ལྡན་འདས
iiif viewer powered by OpenSeadragon
