| e-texts navigator |
| Wylie |
222b1 དག་ཀྱང་ལྷུང་བར་བྱེད་དོ། །དཔེར་ན་མགལ་མེའི་འཁོར་ལོ་ནི། འཁོར་ལོ་མ་ཡིན་ཡང་། བྱིས་པ་རྣམས་ཀྱིས་འཁོར་ལོ་ཉིད་དུ་ཡོངས་སུ་རྟོག་སྟེ། མཁས་པ་རྣམས་ནི་མ་ཡིན་ནོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ་ཅན་དག་ཀྱང་གཅིག་པ་དང་། ཐ་དད་པ་དང་། གཉི་ག་དང་།
222b2 གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པར་ཡོངས་སུ་རྟོག་པ་ལ་བརྟེན་ནས། དངོས་པོ་ཐམས་ཅད་སྐྱེད་དོ། །དཔེར་ན་ཆུ་བུར་ནོར་བུ་འདྲ་བ་ལ། བྱིས་པ་བློ་དང་མི་ལྡན་པ་རྣམས་ཀྱིས། ནོར་བུ་ཉིད་དུ་འདུ་ཤེས་ཤིང་།
222b3 མངོན་པར་ཞེན་ནས་རབ་ཏུ་རྒྱུག་ཅིང་ལེན་ཀྱང་། ཆུ་བུར་དེ་དག་ནི་ནོར་བུ་ཡང་མ་ཡིན། ནོར་བུ་མ་ཡིན་པ་ཡང་མ་ཡིན་ཏེ། ལེན་པ་དང་། མི་ལེན་པའི་ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་རྣམ་པར་རྟོག་པའི་བག་ཆགས་ཀྱིས་ཡོངས་སུ་བསྒོས་པ་རྣམས་ཀྱང་། ཡོད་པ་མ་ཡིན་པ་ལ་སྐྱེ
222b4 བ་ཡོད་པར་སྨྲ་བ་དང་། རྐྱེན་གྱིས་ཡོད་པ་ཡང་འཇིག་པར་སྨྲ་བར་འགྱུར་རོ། །གཞན་ཡང་བློ་གྲོས་ཆེན་པོ་ཚད་མ་རྣམ་པ་གསུམ་དང་། སྨྲ་བའི་ཡན་ལག་ལྔ་ཡོད་དོ། །དེ་དག་སོ་སོར་རྣམ་པར་གཞག་པ་བྱས་ནས། འཕགས་པའི་ཡེ་ཤེས་སོ་སོ་རང་གིས་རིག་པར་བྱ་བ། རང་བཞིན་གཉིས་ཀྱི་དངོས་པོ་དང
222b5 བྲལ་བ་རྟོགས་པར་འགྱུར་ཞེས། དངོས་པོ་ཡོད་པ་ཉིད་དུ་རྣམ་པར་རྟོག་ཅིང་མངོན་པར་ཞེན་པར་བྱེད་དེ། བློ་གྲོས་ཆེན་པོ་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་ལུས་དང་། སེམས་གནས་ཤིན་ཏུ་གྱུར་པ། རང་གི་སེམས་སྣང་བའི་གཟུང་བ་དང་། འཛིན་པའི་རྣམ་པར་རྟོག་པ་རབ
222b6 ཏུ་སྤངས་པ། དེ་བཞིན་གཤེགས་པའི་ས། སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པའི་རྣལ་འབྱོར་པས་དེ་ལ་དངོས་པོ་དང་། དངོས་པོ་མེད་པའི་འདུ་ཤེས་སུ་མི་བྱའོ། །གལ་ཏེ་ཡང་རྣལ་འབྱོར་པས་དེ་ལྟ་བུའི་སྤྱོད་ཡུལ་རྣམས་ལ་དངོས་པོ་དང་དངོས་པོ་མེད་པ་འཛིན་པའི་མཚན་མ་སྐྱེད་པར
222b7 བྱེད་ན། དེ་ནི་གསོ་བར་འཛིན་པ་དང་། བདག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་རོ། །བློ་གྲོས་ཆེན་པོ་གང་འདི་ལྟར་དངོས་པོ་དེ་དག་གི་རང་བཞིན་དང་། རང་དང་སྤྱིའི་མཚན་ཉིད་བསྟན་པ་དེ་དག་ཐམས་ཅད་ནི་སྤྲུལ་པའི་སངས་རྒྱས་ཀྱིས་བསྟན་པ་ཡིན་གྱི། ཆོས་ཉིད་ཀྱི་སངས་རྒྱས་ཀྱིས
iiif viewer powered by OpenSeadragon
