| e-texts navigator |
| Wylie |
222a1 ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། དེ་བཞིན་དུ་བྱིས་པ་སོ་སོའི་སྐྱེ་བོ་ལྟ་བ་ངན་པས་རབ་ཏུ་ཟིན་པ། མུ་སྟེགས་ཀྱི་བློ་ཅན་དག་རང་གི་སེམས་སྣང་བའི་དངོས་པོ་རྨི་ལམ་ལྟ་བུར་མ་ཤེས་པས། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད
222a2 པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་ལྟ་བ་ལ་རབ་ཏུ་བརྟེན་ཏོ། །དཔེར་ན་རི་མོ་བྲིས་པ་ལ་མཐོ་དམན་མེད་ཀྱང་། བྱིས་པ་དེ་དག་མཐོ་དམན་དུ་རྣམ་པར་རྟོག་གོ། །དེ་བཞིན་དུ་མ་འོངས་པའི་དུས་ན་མུ་སྟེགས་ཅན་གྱི་ལྟ་བ་ངན་པའི་བག་ཆགས
222a3 ཤིན་ཏུ་རྒྱས་པས། དེ་དག་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་ལྟ་བ་ལ་བརྟེན་ནས། བདག་དང་གཞན་ཡང་བརླག་པར་བྱེད་ལ། ཡོད་པ་དང་། མེད
222a4 པ་སྤངས་པ། སྐྱེ་བ་མེད་པར་སྨྲ་བ་གཞན་དག་ལ་ཡང་མེད་པ་ཞེས་ཟེར་བ་དག་འབྱུང་སྟེ། འདི་དག་ནི་རྒྱུ་དང་འབྲས་བུར་ལྟ་བ་ལ་སྐུར་པ་འདེབས་ཤིང་། དགེ་བའི་རྩ་བ་འདོན་པར་བྱེད་ལ། རྣམ་པར་དག་པའི་རྒྱུ་འཇིག་པར་བྱེད་པ་ཡིན་པས། མཆོག་ཚོལ་བ་རྣམས་ཀྱིས་རིང་དུ་སྤང་བར་བྱའོ། །དེ་སྐད་དུ
222a5 སྨྲ་བ་དེ་དག་ནི་བདག་དང་གཞན་དང་། གཉི་གའི་ལྟ་བར་ལྟུང་བ། ཡོད་པ་དང་། མེད་པར་རྣམ་པར་བརྟགས་ནས། སྒྲོ་འདོགས་པ་དང་། སྐུར་པའི་ལྟ་བ་ངན་པར་ལྟུང་བ་ཡིན་པས། སེམས་ཅན་དམྱལ་བར་ལྟུང་བར་འགྱུར་རོ། །དཔེར་ན་མིག་ལ་རབ་རིབ་ཡོད་པ་དེ་དག་གིས་སྐྲ་ཤད་འཛིངས་པ
222a6 མཐོང་ནས། སྐྱེ་བོ་མང་པོའི་ཚོགས་རྣམས་ལ་འདི་སྐད་དུ། ཀྱེ་གྲོགས་པོ་དག་འདི་ལྟོས་ཤིག་ཅེས་ཟེར་ཡང་། སྐྲ་ཤད་འཛིངས་པ་དེ་ནི་མཐར་དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་ཡིན་ཏེ། མཐོང་བ་དང་། མི་མཐོང་བའི་ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ
222a7 ཅན་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་རབ་ཏུ་རྟེན་ཅིང་། དམ་པའི་ཆོས་ལ་སྐུར་པ་འདེབས་པས། བདག་ཀྱང་ལྟུང་བར་བྱེད་ལ་གཞན
iiif viewer powered by OpenSeadragon
