| e-texts navigator |
| Wylie |
221b1 མངོན་པར་ཞེན་པས་རྣམ་པར་རྟོག་གོ། །དཔེར་ན་སྐོམ་པས་རབ་ཏུ་གདུངས་པ་རྣམས་དཔྱིད་ཀྱི་སྨིག་རྒྱུ་ལ་ཆུ་ཉིད་དུ་རྣམ་པར་རྟོག་པའི་ནོར་པས་རབ་ཏུ་རྒྱུག་སྟེ། ཆུ་མ་ཡིན་པར་ཡོངས་སུ་མི་ཤེས་སོ། །དེ་བཞིན་དུ་བྱིས་པ་སོ་སོའི་སྐྱེ་བོ་ཐོག་མ་མེད་པའི་དུས་ཀྱིས་སྤྲོས་པའི་རྣམ་པར་རྟོག་པས
221b2 ཡོངས་སུ་བསྒོས་པའི་དུག་གསུམ་གྱི་མེས་སེམས་རབ་ཏུ་གདུངས་པ། གཟུགས་ཀྱི་ཡུལ་ལ་ཤིན་ཏུ་མོས་པ། སྐྱེ་བ་དང་། གནས་པ་དང་། འཇིག་པར་ལྟ་བ། ཕྱི་ནང་གི་དངོས་པོར་ཡོངས་སུ་འཛིན་པ་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་།
221b3 ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པ་ཉིད་དུ་འདུ་ཤེས་ཤིང་། རྣམ་པར་རྟོག་པའི་ལྟ་བ་འཛིན་པར་རབ་ཏུ་ལྟུང་བར་འགྱུར་རོ། །དཔེར་ན་དྲི་ཟའི་གྲོང་ཁྱེར་ལ་བྱིས་པ་སོ་སོའི་སྐྱེ་བོ་བློ་དང་མི་ལྡན་པ་རྣམས་གྲོང་ཁྱེར་གྱི་འདུ་ཤེས
221b4 འབྱུང་སྟེ། ཐོག་མ་མེད་པའི་དུས་ནས། བག་ཆགས་ལ་མངོན་པར་ཞེན་པའི་འདུ་ཤེས་ཀྱིས་སྣང་ཡང་། དེ་ནི་གྲོང་ཁྱེར་ཡང་མ་ཡིན། གྲོང་ཁྱེར་མ་ཡིན་པ་ཡང་མ་ཡིན་ནོ། །དེ་བཞིན་དུ་མུ་སྟེགས་ཅན་ཐོག་མ་མེད་པའི་དུས་ནས་སྤྲོས་པའི་བག་ཆགས་ལ་མངོན་པར་ཞེན་པ་རྣམས་གཅིག་པ
221b5 དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་གནས་པས། རང་གི་སེམས་སྣང་བ་ཙམ་དུ་མི་ཆུད་དོ། །དཔེར་ན་མི་ལ་ལ་ཞིག་རྨི་ལམ་ན། སྐྱེས
221b6 པ་དང་། བུད་མེད་དང་། གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་དང་། གྲོང་དང་། གྲོང་ཁྱེར་དང་། སྐྱེད་མོས་ཚལ་དང་། ནགས་ཚལ་དང་། རི་དང་། འབབ་ཆུ་དང་། རྫིང་རྣམ་པ་སྣ་ཚོགས་ཀྱིས་མཛེས་པར་བྱས་པར་བདག་ཉིད་ཞུགས་པ་སྙམ་པ་ལས་སད་ནས། དེ
221b7 ཉིད་རྗེས་སུ་དྲན་ན། བློ་གྲོས་ཆེན་པོ་ཇི་སྙམ་དུ་སེམས། སྐྱེས་བུ་དེས་སྔར་རྨིས་པ་རྣམས་རྗེས་སུ་དྲན་པར་བྱེད་ཅིང་། ཡོངས་སུ་གཏོང་བར་མི་བྱེད་ན། ཅི་མཁས་པའི་རང་བཞིན་ཅན་ཡིན་ནམ། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་མ་ལགས་སོ། །བཅོམ
iiif viewer powered by OpenSeadragon
