| e-texts navigator |
| Wylie |
219b1 དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཆོས་རྣམས་ཐམས་ཅད་མི་སྐྱེ་སྟེ། །རྒྱུ་རྐྱེན་འགག་པའང་ཡོད་མ་ཡིན། །སྐྱེ་དང་འགག་པ་དེ་དག་ལ། །རྒྱུ་དང་རྐྱེན་དུ་རྟོག་པ་སྐྱེད། །འགགས་པ་ལས་ནི་ཡང་སྐྱེ་དང་། །འབྲེལ་པའི
219b2 རྒྱུ་རྐྱེན་བཀག་མིན་ཏེ། །བྱིས་པ་ཤིན་ཏུ་རྨོངས་པ་ཡིས། །རྐྱེན་དུ་རྟོག་པ་རབ་སྤང་ཕྱིར། །ཡོད་དང་མེད་པ་རྟེན་འབྲེལ་ཆོས། །དེ་དག་སྐྱེ་བ་ཡོད་མ་ཡིན། །བག་ཆགས་རྨོངས་པས་རབ་ཏུ་འཇུག་།དེ་ལས་སྲིད་གསུམ་སྣང་བ་ཡིན། །ཡང་དག་རྐྱེན་ལས་སྐྱེ་བ་མེད། །འགག་པའང་ཡོད
219b3 པར་མི་འགྱུར་ཏེ། །འདུས་བྱས་ཐམས་ཅད་རབ་བརྟགས་ན། །ནམ་མཁའི་མེ་ཏོག་ཇི་བཞིན་ནོ། །གཟུང་བ་དང་ནི་འཛིན་པ་ཡི། །ནོར་པར་མཐོང་བ་རབ་ཏུ་སྤོངས། །སྐྱེད་དང་སྐྱེ་བ་མ་ཡིན་ཏེ། །རྒྱུ་རྐྱེན་དག་ཀྱང་ཡོད་མ་ཡིན། །ཐམས་ཅད་སྣང་བ་མེད་པས་ན། །དེ་དག་ཀུན་ནི་བརྗོད་པ
219b4 ཡིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིག་གི་རྣམ་པར་རྟོག་པའི་མཚན་ཉིད་ཀྱི་སྙིང་པོ་ཞེས་བགྱི་བའི་ཆོས་ཀྱི་རྣམ་གྲངས་བཤད་དུ་གསོལ། བཅོམ་ལྡན་འདས་བདག་དང་།
219b5 བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཚིག་རྣམ་པར་རྟོག་པའི་མཚན་ཉིད་ཀྱི་སྙིང་པོ་ཞེས་བགྱི་བའི་ཆོས་ཀྱི་རྣམ་གྲངས་ཤིན་ཏུ་རྟོགས་པ་དེས། བརྗོད་པ་དང་། བརྗོད་པ་རྣམ་པ་གཉིས་ཀྱི་དོན་རྟོགས་པར་ཁོང་དུ་ཆུད་དེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ
219b6 མངོན་པར་རྫོགས་པར་སངས་རྒྱས་ནས། བརྗོད་པ་རྣམ་པ་གཉིས་ཀྱི་ཚུལ་གྱིས་སེམས་ཅན་ཐམས་ཅད་ཡོངས་སུ་དག་པར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ། །
219b7 བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ། །བཅོམ་ལྡན་འདས་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ཚིག་གི་རྣམ་པར་རྟོག་པའི་མཚན་ཉིད་ནི་རྣམ་པ་བཞི་ཡོད་དེ། འདི་ལྟ་སྟེ། མཚན་ཉིད་ཀྱི་ཚིག
iiif viewer powered by OpenSeadragon
