| e-texts navigator |
| Wylie |
214b1 ཚོགས་ཀྱིས་ཡོངས་སུ་བསྐོར་བ་དང་། རང་གི་སེམས་རབ་ཏུ་སྣང་བ་ཙམ་གྱིས་སེམས་ཅན་ཡོངས་སུ་ཟློ་ཞིང་རྣམ་པར་གྲོལ་བར་བྱེད་ལ་ཕྱི་རོལ་གྱི་དངོས་པོ་དངོས་པོ་མེད་པར་རྣམ་པར་ཕྱེ་སྟེ་བསྟན་ནས་ཡོད་པ་དང་མེད་པའི་ལྟ་བ་ཡོངས་སུ་སྤོང་བར་བྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ
214b2 ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་དག་ནི་སེམས་ཙམ་དུ། །རྒྱལ་བའི་སྲས་ཀྱིས་རབ་བརྟགས་ན། །རྣམ་པ་སྣ་ཚོགས་གཟུགས་སྤྲིན་ལ། །མངོན་པར་འདུ་བྱེད་པ་དང་བྲལ། །སྟོབས་དང་མངོན་པར་ཤེས་དང་དབང་། །དེ་དག
214b3 ཐམས་ཅད་འགྲུབ་པར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་བདག་ལ་སོགས་པའི་སླད་དུ་ཆོས་ཐམས་ཅད་ཀྱི་སྟོང་པ་ཉིད་དང་། སྐྱེ་བ་མ་མཆིས་པ་དང་། གཉིས་སུ་མ་མཆིས་པ
214b4 དང་། རང་བཞིན་དང་བྲལ་བའི་མཚན་ཉིད་བཤད་དུ་གསོལ། དེས་བདག་དང་བྱང་ཆུབ་སེམས་དཔའ་གཞན་རྣམས་ཀྱང་སྟོང་པ་ཉིད་དང་། སྐྱེ་བ་མ་མཆིས་པ་དང་། གཉིས་སུ་མ་མཆིས་པ་དང་། རང་བཞིན་དང་བྲལ་བའི་མཚན་ཉིད་རྟོགས་པར་ཁོང་དུ་ཆུད་ཅིང་། མཆིས་པ་དང་མ
214b5 མཆིས་པའི་རྣམ་པར་རྟོག་པ་ཡོངས་སུ་སྤངས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །བློ་གྲོས
214b6 ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ཁྱོད་ལ་རྒྱ་ཆེར་རབ་ཏུ་དབྱེ་ཞིང་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ། །བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ
214b7 སྩལ་པ། བློ་གྲོས་ཆེན་པོ་སྟོང་པ་ཉིད་སྟོང་པ་ཉིད་ཅེས་བྱ་བ་འདི་ནི་ཀུན་བརྟགས་པའི་རང་བཞིན་གྱི་གནས་ཏེ། བློ་གྲོས་ཆེན་པོ་ཀུན་བརྟགས་པའི་རང་བཞིན་ལ་མངོན་པར་ཞེན་པ་རྣམས་ལ་སྟོང་པ་ཉིད་དང་། སྐྱེ་བ་མེད་པ་དང་། གཉིས་སུ་མེད་པ་དང་། རང་བཞིན་དང་བྲལ་བའི་མཚན་ཉིད
iiif viewer powered by OpenSeadragon
