| e-texts navigator |
| Wylie |
210a1 མཚན་ཉིད་དང་། ཡོངས་སུ་སྤང་བ་དང་། ཤེས་པར་འགྱུར་བ་བསྟན་པ་ཐོས་པ་ན། ལུས་ཀྱི་སྤུ་ལྡང་ཞིང་རབ་ཏུ་དགའ་བ་དང་། ཡོངས་སུ་འདྲིས་པར་བྱ་བའི་མཚན་ཉིད་ཀྱི་ཤེས་པ་ལ་མོས་ཤིང་། རྟེན་ཅིང་འབྲེལ་པར་འབྱུང་བ་ཁོང་དུ་ཆུད་པར་བྱ་བའི
210a2 མཚན་ཉིད་ལ་ཡོངས་སུ་འདྲིས་པར་མི་བྱེད་པ་འདི་ནི། ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་སོ། །ཉན་ཐོས་ཀྱི་མངོན་པར་རྟོགས་པས་ས་བརྒྱད་པ་མཐོང་བར་འགྱུར་ཏེ། ཀུན་ནས་ལྡང་བའི་ཉོན་མོངས་པ་རབ་ཏུ་སྤངས་ཤིང་། བག་ཆགས་ཀྱི་ཉོན་མོངས
210a3 པ་རབ་ཏུ་སྤངས་པ། བསམ་གྱིས་མི་ཁྱབ་པའི་རྣམ་པར་འགྱུར་བའི་ཤི་འཕོ་ལས་མ་འདས་ཤིང་། དངོས་པོའི་འཆི་འཕོ་ལས་ཤིན་ཏུ་འདས་པས། བདག་གི་སྐྱེ་བ་ནི་ཟད་དོ། །ཚངས་པར་སྤྱོད་པ་ལ་གནས་སོ། །ཡང་སྲིད་པ་ཕྱི་མ་མི་ལེན་ཏོ་ཞེས་ཡང་དག་པར་སེང་གེའི་སྒྲ
210a4 སྒྲོགས་ཏེ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་། གང་ཟག་ལ་བདག་མེད་པར་སྒོམ་པ་དང་། མྱ་ངན་ལས་འདས་པ་ཐོབ་པའི་བར་གྱི་བློར་འགྱུར་རོ། །བློ་གྲོས་ཆེན་པོ་སོ་སོ་ཐ་དད་པའི་མངོན་པར་རྟོགས་པ་ནི་འདི་ལྟ་སྟེ། བདག་དང་། གང་ཟག་དང་། སེམས
210a5 ཅན་དང་། འཚོ་བ་དང་། སྲོག་དང་། གསོ་བ་དང་། སྐྱེས་བུ་ཞེས་སེམས་ཅན་དེ་དག་དེ་ལྟ་བུའི་བློས་མྱ་ངན་ལས་འདས་པ་ཚོལ་ལོ། །གཞན་ཡང་མུ་སྟེགས་ཅན་ཐ་དད་པ་ཁ་ཅིག་ནི་དངོས་པོ་ཐམས་ཅད་བྱེད་པ་པོ་ལ་རག་ལས་པར་མཐོང་ནས་འདི་སྐད་དུ་འདི་ནི་མྱ་ངན་ལས
210a6 འདས་པའོ་ཞེས་དེ་ལྟ་བུའི་བློར་འགྱུར་ཏེ། ཆོས་བདག་མེད་པར་མཐོང་བའི་སྐལ་བ་མེད་པས་དེ་དག་ལ་ཐར་པ་མེད་དོ། །བློ་གྲོས་ཆེན་པོ་ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བ་དང་། མུ་སྟེགས་ཀྱི་རིགས་དེ་དག་ནི་ངེས་པར་འབྱུང་བ་མ་ཡིན་པ་ལ་ངེས་པར་འབྱུང
210a7 བའི་བློ་ཅན་དག་ཡིན་ཏེ། ལྟ་བ་ངན་པ་དེ་དག་རྣམ་པར་བཟློག་པའི་ཕྱིར་རབ་ཏུ་བརྩོན་པར་བྱའོ། །བློ་གྲོས་ཆེན་པོ་དེ་ལ་རང་སངས་རྒྱས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་ནི་གང་གིས་རྐྱེན་ཐ་དད་པའི་མངོན་པར་རྟོགས་པ་ཐོས་ན། ལུས་ཀྱི་སྤུ་ལྡང་ཞིང་མཆི་མ
iiif viewer powered by OpenSeadragon
