| e-texts navigator |
| Wylie |
209a1 རྭ་དང་མཚུངས་ཤིང་རྟག་པ་དང་། བསམ་གྱིས་མི་ཁྱབ་པ་དེ་ནི་ཚིག་གི་རྣམ་པར་རྟོག་པ་ཙམ་དུ་འགྱུར་ཏེ། མུ་སྟེགས་ཅན་རྣམས་ལ་ཉེས་པ་དེ་ལྟ་བུ་དག་ཡོད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཚིག་རྣམ་པར་རྟོག་པ་ཡང་རི་བོང་གི་རྭ་དང་འདྲ་བས
209a2 རང་གི་རྒྱུའི་མཚན་ཉིད་ཀྱི་དངོས་པོ་ཡོད་པ་མ་ཡིན་ནོ། །བློ་གྲོས་ཆེན་པོ་ངའི་རྟག་པ་དང་། བསམ་གྱིས་མི་ཁྱབ་པའི་རྒྱུ་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཁོང་དུ་ཆུད་པའི་མཚན་ཉིད་ཀྱི་ཕྱིར་བྱས་པའི་དངོས་པོ་དང་། དངོས་པོ་མེད་པ་རྣམ་པར་སྤངས་པས
209a3 རྟག་པ་ཡིན་གྱིས་ཕྱི་རོལ་གྱི་དངོས་པོ་རྣམས་དངོས་པོ་མེད་ཅིང་མི་རྟག་པར་གྱུར་ནས་རྗེས་སུ་དཔག་པས་རྟག་པ་ཉིད་དུ་བརྟགས་པ་ནི་མ་ཡིན་ནོ། །བློ་གྲོས་ཆེན་པོ་གལ་ཏེ་ཡང་ཕྱི་རོལ་གྱི་དངོས་པོ་རྣམས་དངོས་པོ་མེད་ཅིང་མི་རྟག་པ་ལས་རྗེས་སུ་དཔག་པས་རྟག་པ་དང་བསམ་གྱིས་མི་ཁྱབ
209a4 པ་ཉིད་དུ་རྟོག་པར་བྱེད་ན། བསམ་གྱིས་མི་ཁྱབ་པའི་རང་གི་རྒྱུའི་མཚན་ཉིད་མི་ཤེས་སོ། །བློ་གྲོས་ཆེན་པོ་དེ་དག་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཁོང་དུ་ཆུད་པའི་སྤྱོད་ཡུལ་ལས་ཤིན་ཏུ་ཐག་རིང་པོར་གྱུར་པ་སྟེ། དེ་དག་ལ་བཤད་པར་མི་བྱའོ། །གཞན་ཡང
209a5 བློ་གྲོས་ཆེན་པོ་འཁོར་བའི་རྣམ་པར་རྟོག་པའི་སྡུག་བསྔལ་གྱིས་འཇིགས་པས་མྱ་ངན་ལས་འདས་པ་ཡོངས་སུ་ཚོལ་ཏེ། འཁོར་བ་དང་མྱ་ངན་ལས་འདས་པའི་ཁྱད་པར་མི་ཤེས་པས་དངོས་པོ་ཐམས་ཅད་ལས་རྣམ་པར་རྟོག་པ་དངོས་པོ་མེད་པ་དང་། མ་འོངས་པའི་དབང་པོ
209a6 རྣམས་ཀྱི་ཡུལ་ཆད་པ་ལ་མྱ་ངན་ལས་འདས་པར་འདུ་ཤེས་ཏེ། སོ་སོ་རང་གིས་རིག་པ་འཕགས་པའི་ཡེ་ཤེས་ཀུན་གཞི་གྱུར་པ་སྔོན་དུ་བཏང་བ་མ་ཡིན་ནོ། །དེའི་ཕྱིར་བླུན་པོ་དེ་དག་ཐེག་པ་གསུམ་དུ་སྨྲ་བ་ཡིན་ཏེ། སེམས་ཙམ་དུ་སྣང་བ་རྣམས་སྣང་བ་མེད་པར་ནི་མི་སྨྲའོ། །དེ་ལྟ
209a7 བས་ན་བློ་གྲོས་ཆེན་པོ་དེ་དག་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱིས་གསུངས་པའི་རང་གི་སེམས་སྣང་བའི་སྤྱོད་ཡུལ་མངོན་པར་མི་ཤེས་ཤིང་། སེམས་ཉིད་ཀྱིས་ཕྱི་རོལ་གྱི་སྤྱོད་ཡུལ་དུ་སྣང་བ་ལ་མངོན་པར་ཞེན་པར། འཁོར་བའི
iiif viewer powered by OpenSeadragon
