| e-texts navigator |
| Wylie |
248b1 སོ། །མ་འགགས་པ་ཡང་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མ་འགགས་པ་བུ་མོས་དྲིས་པའི་ལན་ཐོབ་ཤིག་།ཚེ་དང་ལྡན་པ་མ་འགགས་པས་སྨྲས་པ། བུ་མོས
248b2 ནི་ཤེས་རབ་ཀུན་ཏུ་འཇོམ་པ་དྲིས་པས་དེ་ནི་ལན་གདབ་པར་མི་ནུས་སོ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འདི་ལྟར་ཚེ་དང་ལྡན་པ་ཀུན་དགའ་བོ་ཁྱོད་ནི་བཅོམ་ལྡན་འདས་ཀྱིས་མང་དུ་ཐོས་པ་རྣམས་ཀྱི་མཆོག་ཏུ
248b3 བསྟན་པ་ལགས་ན། ཅི་མང་དུ་ཐོས་པ་ཉིད་དེ་དོན་དུ་བལྟ་འམ། འོན་ཏེ་ཚིག་འབྲུར་བལྟ། གལ་ཏེ་དོན་དུ་བལྟ་ན་དོན་ནི་བརྗོད་དུ་མ་མཆིས་ཤིང་བསྙད་དུ་མ་མཆིས་པ་སྟེ། དེ་ནི་རྣ་བའི་རྣམ་པར་ཤེས་པས་ཤེས་པར་བགྱི་བ་མ་ལགས་པ་ནས་ཡིད་ཀྱི་རྣམ་པར་ཤེས་པའི
248b4 བར་གྱིས་ཤེས་པར་བགྱི་བ་མ་ལགས་པ་སྟེ། རྣམ་པ་དེ་ལྟ་བུ་གང་ལགས་པ་དེ་ནི་བསྟན་དུ་མ་མཆིས་པའོ། །ཅི་སྟེ་ཚིག་འབྲུར་བལྟ་ན་ནི་བཅོམ་ལྡན་འདས་ཀྱིས་དོན་ལ་རྟོན་པ་ཡིན་གྱི་ཚིག་འབྲུར་རྟོན་པ་མ་ཡིན་ནོ་ཞེས་གསུངས་པས་དེ་བས་ན་ཚེ་དང་ལྡན་པ་ཀུན་དགའ
248b5 བོའི་མང་དུ་ཐོས་པ་ཉིད་ནི་རྟོན་པ་མ་ལགས་སོ། །དེ་ནས་ཚེ་དང་ལྡན་པ་ཀུན་དགའ་བོ་ཡང་ཅང་མི་སྨྲ་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་བུ་མོས་དྲིས་པའི་ལན་ཐོབ
248b6 ཤིག་། ཀུན་དགའ་བོས་སྨྲས་པ། བུ་མོ་ནི་ཡི་གེ་དང་བྲལ་བ་འདྲི་སྟེ། དེ་ནི་སྒྲས་ཚིམ་པར་བྱེད་པར་མི་ནུས་སོ། །བུ་མོ་ནི་སེམས་དང་བྲལ་བའི་མཉམ་པ་ཉིད་འདྲི་སྟེ། སློབ་པ་རྣམས་ཀྱི་ས་མ་ཡིན་ན་དེ་ཇི་ལྟར་བསྟན་པར་བྱ་སྟེ། ཆོས་ཀྱི་མངའ་བདག་དེ་བཞིན་གཤེགས
248b7 པ་ལ་ཞུ་དགོས་པའོ། །དེ་ནས་བུ་མོ་དྲི་མ་མེད་ཀྱིས་བྱིན་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ནི་དེ་བཞིན་གཤེགས་པས་ཟབ་མོ་ལ་མོས་པའི་བྱང་ཆུབ་སེམས་དཔའ་རྣམས་ཀྱི་མཆོག་ཏུ་བསྟན་པ་ལགས་ན། ཅི་རྟེན་ཅིང་འབྲེལ
iiif viewer powered by OpenSeadragon
