| e-texts navigator |
| Wylie |
212b1 བུད་མེད་རྣམས་ལ་ཆགས་པ་ནི། །མི་གཙང་གནས་ལ་ཁྭ་བཞིན་ནོ། །གང་གིས་ངན་འགྲོར་རབ་འཇུག་པ། །དེ་ནི་བདུད་ཀྱི་སྤྱོད་ཡུལ་ཡིན། །རོ་མྱང་འདུ་ཤེས་ཆགས་གྱུར་པ། །ངན་སྐྱུགས་གནས་ལ་སྲིན་བུ་བཞིན། །གསང་བའི་གཤེད་མ་རྣམས་ཀྱིས་ནི། །ཇི་ལྟར་མི
212b2 ཞིག་བོར་བ་ལྟར། །ཤེས་ན་ཐར་པ་ཐོབ་འགྱུར་ཞིང་། །བུད་མེད་དབང་དུ་འགྲོ་མི་འགྱུར། །འདོད་པ་བུད་མེད་ལྟ་བྱེད་པའི། །ཀུན་ཏུ་སྦྱོར་ལས་འཇིགས་པ་སྐྱེ། །བྱིས་པ་མཚན་མར་འཛིན་པ་རྣམས། །འདོད་པའི་སྲེད་པ་རབ་ཏུ་འཕེལ། །སོས་ཀའི་དུས་ན་མི་ཞིག་ནི། །
212b3 དགོན་པ་ཆེན་པོར་སོང་གྱུར་ནས། །བྱིས་པས་ལན་ཚྭའི་ཆུ་འཐུངས་ན། །སྐོམ་པ་ཕྱིར་ཞིང་རབ་སྐྱེད་ལྟར། །དེ་བཞིན་བདེན་པ་མ་མཐོང་བའི། །བྱིས་པ་རྨོངས་པས་འཚོ་བ་རྣམས། །འདི་ན་ཕྱིར་ཞིང་བུད་མེད་ལ། །འདོད་པའི་སྲེད་པ་བརྟན་པར་འགྱུར། །ཇི་ལྟར་མི་ལུས
212b4 མཛེ་ཅན་ལ། །སྲོག་ཆགས་རྣམས་ནི་ཟ་བ་ལྟར། །འདོད་བརྐམ་སོ་སོའི་སྐྱེ་བོ་རྣམས། །དེ་བཞིན་བུད་མེད་རྣམས་ཀྱིས་ཟོས། །མི་གཙང་བུམ་པ་ཁྲ་བོ་ཞིག་།ཁ་དོག་ལྡན་པར་སྣང་མོད་ཀྱི། །ནང་ན་ཧ་ལ་ཧ་ལའི་དུག་།དྲག་པོ་ཆེན་པོ་ཡོད་པ་ལྟར། །དེ
212b5 བཞིན་བུད་མེད་བརྒྱན་པ་དག་། གང་དང་གང་ན་སྣང་བ་ཡང་། །གཅིན་དང་ཕྱི་སས་གང་བ་ཡི། །རྐྱལ་བ་རླུང་གིས་གང་བ་བཞིན། །འབྲུ་མར་གྱིས་ནི་བདར་བའི་མཚོན། །གོས་ཀྱིས་དཀྲིས་པ་ཇི་བཞིན་དུ། །དེ་བཞིན་བུད་མེད་བརྒྱན་པ་ཡང་། །རལ་གྲི་རླིང་བ
212b6 གཡོགས་པ་བཞིན། །ཇི་ལྟར་མེ་དོང་གང་གྱུར་ལ། །དུ་བ་མེད་ཅིང་འབར་ལྡན་ལྟར། །བུད་མེད་དེ་བཞིན་མེ་འདྲ་ཞིང་། །སྲིན་བུ་གཏུམ་པོ་བཞིན་དུ་གཡོ། །སྲེག་པའི་བསྐལ་པ་འདིར་བྱུང་ན། །ས་འདི་ཀུན་ཏུ་འབར་གྱུར་ལ། །རྩཝ་དང་གེལ་པ་འཇིག་འགྱུར་ཞིང་། །
212b7 ཆུ་ཀླུང་དག་ཀྱང་སྐམས་པར་འགྱུར། །འབྱུང་པོ་ཆེན་པོའི་གནས་གྱུར་པ། །རྒྱ་མཚོ་ཡང་ནི་སྐམ་འགྱུར་ཞིང་། །རི་བོ་ཆེན་པོ་རྣམས་སྲེག་ལ། །དེ་བཞིན་ལྷུན་པོའང་འཇིག་པར་འགྱུར། །རྒྱལ་ཆེན་འབྱུང་པོ་འཛིན་པ་ཡི། །ས་འདིའང་རྣམ་པར་འཇིག་འགྱུར་ཞིང་། །
iiif viewer powered by OpenSeadragon
